Ezequiel

47 Chaymantan payqa jujmanta pusawarqan templo punkuman,+ chaymantan punku k’uchumanta unu lloqsimushasqa, chay unuqa inti lloqsimuy ladomanmi rishasqa;+ temploq punkunqa chay ladomanmi karqan. Unuqa temploq punkun paña ladomantan lloqsimushasqa, altarpa paña ladontan pasashasqa.

2 Chaymantataq payqa wichay lado punkunta orqowarqan,+ chayninta muyuchimuwaspan inti lloqsimuy lado punkuman pusawarqan.+ Chay punkuq paña ladontan unuqa pisilla lloqsimushasqa.

3 Inti lloqsimuy ladoman jamuspan chay runaqa medinan waskhawan+ chay unuta medirqan, k’uchumantan waranqa codota* medirqan, jinaspa chayninta chimpachiwarqan, chimpaqtiytaq chaki moqochuykamalla unuqa kasqa.

4 Chaymantan payqa waranqa codota medillarqantaq, jinaspa chimpachiwarqan, chayqa moqoykaman* kasqa.

Waranqa codota medispan chimpachiwallarqantaq, chaypi unuqa cinturaykamañan kasqa.

5 Chaymantan waranqa codota medillarqantaq, chayqa nishu ukhun kasqa, nadaspa chimpanañan kasqa. Chayneqqa jatun mayuñan kasqa.

6 Chaypin payqa tapuwarqan: “Runaq churin, ¿rikushankichu kayta?”, nispa.

Chaymantataq kaqta mayu pataman kutichimuwarqan. 7 Kutimuqtiymi mayuq sapanka ladonpi askha sach’akuna kashasqa.+ 8 Chaymantataq payqa niwarqan: “Kay unuqa inti lloqsimuy ladomanmi rishan, Arabá ladomanmi+ jaykushan, lamar-qochakaman chayashan,+ chay qochan jampisqa kapunqa.* 9 Chay unuq purisqanpiqa imaymanan kausanqa, challwakunapas askhan kanqa. Chay unuq chayasqan lamar-qochapas jampisqan kapunqa; chay mayuq purisqanpiqa tukuy iman kausanqa.

10 ”Challwaqkunaqa En-Guedimantapacha+ En-Eglainkaman qocha patallapi qhepakunqaku, maypichus challwananku llikata ch’akichinku chayllapin qhepakunqaku. Jatun lamar-qochapi*+ jinan chay qochapipas imaymana challwakuna askha kanqa.

11 ”Askha t’uru qochakuna, phusu qochakunan kanqa, chaykunaqa manan jampisqachu kanqa, kachisapallan kanqa.+

12 ”Chay mayu patapin imaymana fruta sach’akuna wiñanqa. Raphinkunaqa manan ch’akinqachu, rurunkunapas manan ismunqachu. Sapa killanmi rurunqa, templomanta+ lloqsimuq unu qarpasqanraykun sapa killan rurunqa. Rurunqa mijunapaqmi kanqa, raphinkunataq jampipaq kanqa”,+ nispa.

13 Tukuy munayniyoq Señor Jehová Diosmi nin: “Kay jallp’atan qankunaqa herenciata jina Israelpi chunka iskayniyoq ayllukunaman rakinkichis, Joseqa iskay t’aqa jallp’atan chaskinqa.+ 14 Llapaykichispas kasqan sayayllatan chaskinkichis. Ñaupa taytaykichiskunamanmi jurarqani kay jallp’ata qonaypaq,+ chaytan qankunaqa rakinakunkichis; chayqa qankunaq herenciaykichismi kanqa.

15 ”Wichay ladoman linderoqa* Jatun lamar-qochamantan qallarinqa, chaytaq rinqa Etlón ñanninta+ jinaspa pasanqa Zedaj ladonta,+ 16 Amaj llaqtanta,+ Berotá ladonta,+ Sibrain ladonta ima; chaykunaqa Damasco llaqtawan Amaj llaqtawan chaupipin kashan. Chaymantataq rinqa Azer-Aticonkama, chayqa Auranpa+ ladollanpin kashan. 17 Chay linderoqa lamar-qochamanta Azar-Enonkaman+ rinqa, wichay ladopi Damasco llaqtaq linderontakaman rinqa, Amaj llaqtaq+ linderontakaman rinqa. Chaymi kanqa wichay lado lindero.

18 ”Inti lloqsimuy ladoman linderotaq kanqa Aurán ladowan Damasco llaqtapiwan, chayqa Jordán mayuntan jaykunqa, Galaad jallp’awan+ Israel llaqtawan chaupintan jaykunqa. Wichay lado linderomantan qochakama* medinkichis. Chaymi kanqa inti lloqsimuy ladoman lindero.

19 ”Uray ladoman linderotaq kanqa Tamar llaqtamanta Meribaj-Cadespi unukunakama,+ chaymantataq rinqa Egipto mayukama, chayninta rispataq Jatun lamar-qochaman chayanqa.+ Chaymi kanqa uray ladoman lindero.

20 ”Inti jaykuy ladoman linderotaq kanqa Jatun lamar-qocha, chayqa uray lado linderomanta Lebó-Amajpa*+ chimpankaman jamunqa. Chaymi inti jaykuy ladoman lindero kanqa.

21 ”Chay jallp’atan qankunaqa rakinakunkichis, Israelpi chunka iskayniyoq aylluntinmi t’aqanakunkichis. 22 Chaytan herenciata jina rakinakunkichis, qankunapas, qankuna ukhupi tiyaq waj llaqtayoq runakunapas, qankunawan tiyashaspa wawakunayoq kaq runakunapas. Paykunaqa nacesqankumantapachapas Israel llaqtayoq kankuman jinan kanqaku. Chaymi paykunapas Israelpi ayllukuna jina qankunawan kuska herenciankuta chaskikunqaku. 23 Waj llaqtayoq runaqa mayqen ayllupichá tiyashan chaypin herencianta chaskinqa” nispan nin tukuy munayniyoq Señor Jehová Dios.