Nahúm
2 Juj ch’eqerichiqmi qanman* jamushan.+
Llaqtaq perqankunata allinta cuidaychis,
ñanmanpas qhawaqkunata churaychis,
maqanakuypaq allinta kallpachakuychis.
2 Jehová Diosmi jujmanta Jacobman jatun kayninta kutichipunqa,
jujmantan Israelman jatun kayninta qopunqa.
Chinkachiqkunan paykunataqa chinkachipurqan,+
llapantapunin ch’ijchinkunatapas chinkachipurqan.
3 Enemigoq soldadonkunaq escudonkunaqa puka tiñisqan kashan,
p’achankupas azulniraq pukan kashan.
Maqanakunanpaq alistakusqan p’unchayqa
carretankunaq fierronkunapas nina jinaraqmi k’ancharin.
Soldadonkunan enebro sach’amanta lanzakunata oqarinku.
4 Maqanakuna carretakunaqa ima jinaraqmi callekunapi phawarinku.
Wichayman uraymanmi plazakunapi phawarinku,
k’ancharishaq nina jinaraqmi k’ancharinku, rayo jinaraqmi llifllikinku.
5 Payqa* allin soldadonkunatan juñunqa.
Paykunaqa purisqankupin misk’anqaku.
Perqa k’uchumanmi perqata allichapanankupaq phawanqaku,
pakakunatan jatarichinqaku.
6 Mayukunaq punkunmi kicharikunqa,
palacion pampaman kumpakamunqa.
7 Willasqañan kashan. Kay warmiqa* pisichasqan kapun,
preso apasqan kapun, warmi kamachinkunaqa khuyaytan waqashanku,
sonqonkuta takakuspan urpi jina waqashanku.
8 Nínive llaqtaqa+ qallariymantapachan askha unuyoq estanque jina karqan,
kunanmi ichaqa runakuna ayqekushanku.
Wakinmi nishanku: “¡Chayllapi sayaychis! ¡Chayllapi sayaychis!”, nispa.
Ichaqa manan pipas qhepamanqa kutirimunchu.+
9 ¡Qolqenta qechuychis! ¡Qorinta qechuychis!
Askhan kashan paypa qhapaq kayninkunaqa.
Junt’an kashan ancha valeq cosasninkunaqa.
10 Llaqtaqa thunisqan kashan, ch’inmi kashan, ch’usaqmi kashan.+
Sonqonkun manchakuymanta phataqeshan, moqonkun* mana tajyanchu, chakankun khatatatashan,*
uyankupas q’elluraqmi kashan.
11 ¿Maypitaq leonkunaq t’oqonri kashan?+
Chaypin malta leonkunaqa mijun,
chaymantan leonqa uñankunantin lloqsimun, manataqmi pipas manchachinchu.
12 Leonqa askhatan uñankunapaq animalkunata jap’iq,
askhatan chinankunapaq animalkunata wañuchiq,
jap’imusqan aychan t’oqonpiqa junt’a kaq,
animalkunaq partenkunan tiyasqanpiqa junt’a kaq.
13 Ejercitokunata kamachiq Jehová Diosmi* nin: “Qan contran jatarimushani,+
maqanakuna carretaykikunatan lliuta kanaykusaq,+
espadan malta leonniykikunata tukunqa,
manañan kay pachapiqa imatapas jap’inkichu,
willaqniykikunapas ch’innipunqan”,+ nispa.