2 Reyes
1 Ajabpa wañupusqan qhepamanmi Moab+ runakuna Israel contra sayarirqanku.
2 Chay tiempopin Ocoziasqa Samaria llaqtapi kasharqan, wasin patapi kaq cuartopi kashaspataq k’aspikunawan churasqa t’oqonta urmaykamuspa sinchita k’irikurqan. Jinan kamachinkunata nirqan: “Phaway riruychis, Ecrón+ llaqta runakunaq diosnin Baal-Zebubta tapuramuychis qhaliyasaqchus icha manachus chayta”,+ nispa. 3 Jehová Diospa angelninmi ichaqa Tisbe llaqtayoq Eliasta*+ nirqan: “Phaway Israel* reypa kamachinkunaman ayparuy, paykunatan ninki: ¿Imaraykun Ecrón llaqta runakunaq diosninku Baal-Zebubta tapuq rishankichis? ¿Manachu Israelpi Dios kan?+ 4 Jehová Diosmi Ocoziasta nin: Puñunaykimantaqa manañan jatarinkichu, qanqa wañunkin, nispa”. Jinan Eliasqa angelpa nisqanman jina willaq rirqan.
5 Kamachinkuna kutimuqtintaq Ocoziasqa paykunata tapurqan: “¿Imaraykun ratulla kutiramunkichis?”, nispa. 6 Chaymi paykunaqa nirqanku: “Juj runan ayparamuwaspanku niwanku: Kutipuychis, reyta nimuychis: Jehová Diosmi nin: ¿Imaraykun kamachiykikunata kachashanki Ecrón llaqta runakunaq diosninku Baal-Zebubta tapumunankupaq? ¿Manachu Israelpi Dios kan? Chayta ruwasqaykiraykun puñunaykimantaqa manaña jatarinkichu, qanqa wañunkin,+ nispa”. 7 Chayta uyarispan Ocoziasqa kamachinkunata tapurqan: “¿Chay runari imayna runataq kasqa?”, nispa. 8 Jinan kamachinkunaqa nirqanku: “Chay runaqa willmayoq qarawan p’achasqan kasqa,+ qaramanta chumpiwan chumpirusqa”,+ nispa. Jinan Ocoziasqa kaq ratupacha nirqan: “Tisbe llaqtayoq Eliaspunin payqa”, nispa.
9 Jinan rey Ocoziasqa Eliasta maskhamunankupaq kacharqan pisqa chunka soldadokunaq umallinta pisqa chunka soldadokunantinta. Chaymi paykunaqa rispanku Eliasta tarirqanku orqo patapi tiyashaqta, jinaspan soldadokunaq umallinqa nirqan: “¡Diospa profetan,*+ uraykamuy, reymi wajashasunki!”, nispa. 10 Eliasmi ichaqa chay soldadokunaq umallinta nirqan: “Sichus Diospa profetan kani chayqa, janaq pachamanta nina rauray uraykamuchun+ qantawan pisqa chunka soldadoykikunatawan ruphanasuykichispaq”, nispa. Chaymi nina raurayqa janaq pachamanta uraykamuspa pisqa chunka soldadonkunantinta ruphapurqan.
11 Jinan reyqa juj pisqa chunka soldadokunaq umallintañataq kacharqan pisqa chunka soldadokunantinta. Chay soldadokunata umalliqpas Eliaspa kasqanman chayaspan nirqan: “¡Diospa profetan, usqhaylla uraykamuy, reymi wajashasunki!”, nispa. 12 Eliasmi ichaqa nirqan: “Sichus Diospa profetan kani chayqa, janaq pachamanta nina rauray uraykamuchun qantawan pisqa chunka soldadoykikunatawan ruphanasuykichispaq”, nispa. Chaymi Diosqa janaq pachamanta nina raurayta kachaykamurqan, jinan ninaqa pisqa chunka soldadonkunantinta ruphapurqan.
13 Jinan reyqa kinsa kaq kutipi juj umallita kachallarqantaq pisqa chunka soldadokunantinta. Chay pisqa chunka soldadokunaq umallinmi ichaqa Eliaspa kasqanman chayaspa ñaupanpi qonqorikurqan, jinaspa valekurqan: “Diospa profetan rogakuykin, noqatapas pisqa chunka soldadoykunatapas khuyapayawayku. 14 Manan wañuyta munanichu, janaq pachamanta nina uraykamuspaqa ñan iskay umallikunataña rupharapun pisqa chunka soldadokunantintakama, chaymi rogakuyki khuyapayawanaykipaq”, nispa.
15 Jinan Jehová Diospa angelninqa Eliasta nirqan: “Rillay, ama manchakuychu”, nispa. Chaymi Eliasqa tiyasqanmanta sayarispa chay umalliwan kuska reypa kasqanman rirqan. 16 Reypa kasqanman chayaspataq Eliasqa nirqan: “Jehová Diosmi kayta nisunki: ¿Imaraykun kamachiykikunata kacharqanki Ecrón+ llaqta runakunaq diosninku Baal-Zebubta tapumunankupaq? ¿Manachu Israelpi Dios kan?+ Paytachá riki tapuwaq karqan. Chayta ruwasqaykiraykun puñunaykimantaqa manaña jatarinkichu, qanqa wañunkin, nispa”. 17 Jinan Ocoziasqa wañupurqan Eliaswan Jehová Diospa willachisqanman jina. Ocoziasqa mana wawayoqmi karqan, chaymi paypa rantinpi wayqen Jehoram+ rey kapurqan. Jehoramqa Israelpin rey kapurqan Judá ayllupi Jehosafatpa churin Jehoram+ iskay wataña kamachikushaqtin.
18 Ocoziaspa+ wakin ruwasqankunaqa lliumi Israel reykunamanta willaq libropi qelqasqa kashan.