Marcos
11 Jerusalén llaqtaman qayllaykushaspankun Olivos orqoman chayarqanku, Bejfagué llaqtachaq, Betania+ llaqtachaq kasqanman, jinan Jesusqa iskay discipulonkunata kacharqan:+ 2 “Jaqay rijurimushaq aylluman riychis, chayman jaykuspaykichis jinan mana piqpa sillakusqan malta asnota watasqata tarinkichis, jinaspa paskaruspa aysamunkichis. 3 Sichus pipas nisunkichis: ¿Imatan ruwashankichis?, nispa chayqa, Señormi munashan, kunallanmi kutichimpunqa, nispan ninkichis”, nispa. 4 Jinan paykunaqa chay aylluman rispa ñan patapi kaq wasi punkuq chimpanpi juj malta asnota watasqata tarirqanku, jinaspa paskarqanku.+ 5 Chaypi sayashaq wakin runakunataq nirqanku: “¿Imapaqmi chay asnota paskashankichis?”, nispa. 6 Paykunataq Jesuspa nisqanman jina nirqanku, jinan chay runakunaqa mana jark’arqankuchu.
7 Chaymi paykunaqa chay malta asnota Jesusman aysamurqanku,+ jinaspa jawa p’achankuwan caronaykurqanku, Jesustaq chay asnoman sillaykukurqan.+ 8 Askha runakunan jawa p’achankuta ñan pataman mast’arqanku, wakintaq campomanta raphisapa k’allmakunata wit’umuspa chayta mast’arqanku.+ 9 Ñaupanta riqkuna qhepanta jamuqkunapiwanmi fuerteta qaparisharqanku: “¡Salvasqa kachun!+ ¡Sumaqpaq qhawarisqa kachun Jehová* Diospa sutinpi jamuqqa!+ 10 ¡Sumaqpaq qhawarisqa kachun jamuq gobiernoqa, taytanchis Davidpa gobiernonqa!+ ¡Janaq pachapi tiyaq payta* salvachun!”, nispa. 11 Jerusalén llaqtaman jaykuspataq temploman rirqan, chaypin muyuriqninpi tukuy imaymana kaqkunata qhawarirqan, ichaqa tardeña kaqtinmi chunka iskayniyoq apostolninkunapiwan Betaniaman kutipurqan.+
12 Qhepantin p’unchaytaq Betaniamanta lloqsimushaqtinku Jesusqa yarqachikurqan.+ 13 Chaymi raphiyoq higos sach’ata karullamantaraq rikuspa “rurushanpaschá” nispa chayman rirqan. Chayaspan ichaqa mana ima rurutapas tarirqanchu, aswanpas raphillatan tarirqan mana higos tiempochu kasqanrayku. 14 Chaymi Jesusqa nirqan: “Amaña jayk’aqpas pipas qanmanta ruruta mijuchunchu”,+ nispa. Discipulonkunaqa uyarisharqankun chay nisqanta.
15 Chaymantataq paykunaqa Jerusalén llaqtaman chayarqanku. Chaypin Jesusqa temploman jaykuspa vendeqkunata rantiqkunatawan jawaman qarqomuyta qallarirqan, qolqe cambiaqkunaq mesankunatapas paloma vendeqkunaq tiyanankunatapas t’ijrarparirqanmi,+ 16 jark’arqantaqmi templonta imatapas pasachiy munaqkunata. 17 Yachachishaspan Jesusqa paykunata nirqan: “¿Manachu qelqasqa kashan: Wasiyqa llapa nacionmanta runakunaq mañakunan wasi nisqan kanqa,+ nispa? Qankunataq ichaqa suwakunaq t’oqonman tukuchipusqankichis”,+ nispa. 18 Chayta uyarispan umalli sacerdotekunaqa kamachikuy simita yachachiqkunapiwan imaynatachus Jesusta wañuchinankupaq piensayta qallarirqanku.+ Ichaqa llapa runakuna yachachisqanwan sinchi admirasqa kasqankuraykun payta manchakurqanku.+
19 Inti jaykuyta jinataq llaqtamanta lloqsipurqanku. 20 Qhepantin p’unchaytaq tutallamanta rishaspanku higos sach’ata rikurqanku saphinmantapacha ch’akisqata.+ 21 Jinan Pedroqa ñaupaq p’unchaypi imachus pasasqanta yuyarispa nirqan: “¡Yachachikuq,* qhawariy! Ñakasqayki higos sach’a ch’akirapusqa”,+ nispa. 22 Jesustaq paykunata nirqan: “Diospi iñiychis. 23 Cheqaqtan niykichis: Pipas kay orqota ninman: Jatarispa lamar-qochaman wijch’uykukuy, nispa, manataq sonqonpi iskayanmanchu, aswanpas iñinman chay nisqan junt’akunanpi chayqa, chhaynapunin kanqa.+ 24 Chaymi niykichis: Tukuy imatapas mañakuspaykichisqa iñiywan mañakuychis, chaskiwaqchisñapas jinatataq rikuychis, jinan chaskinkichis.+ 25 Mañakushaspaykichisqa contraykichispi juchallikuqkunata perdonaychis, chhaynapi janaq pachapi kaq Taytaykichispas juchaykichiskunata perdonanasuykichispaq”,+ nispa. 26 *——
27 Paykunaqa wajmantan Jerusalén llaqtaman jaykurqanku. Templo patiopi Jesús purishaqtintaq umalli sacerdotekuna, kamachikuy simita yachachiqkuna, umalliq runakunapiwan* jamuspa 28 payta tapurqanku: “¿Piqpa kamachisqantaq qanri kaykunata ruwanki? ¿Pin kachamurqasunki kaykunata ruwanaykipaq?”,+ nispa. 29 Jinan Jesusqa paykunata nirqan: “Noqapas jujta tapullasaykichistaq. Kutichiwankichis chayqa, noqapas nillasaykichistaqmi piqpa kamachisqanchus kaykunata ruwani chayta. 30 ¿Pin Juanta kachamurqan bautizananpaq?+ ¿Dioschu* icha runakunachu? Niwaychis”,+ nispa. 31 Jinan paykunapura ninakurqanku: “Diosmi nisunchis chayqa, ¿imaraykun mana creerqankichischu?, niwasunchá riki. 32 Runakunan nisunchis chayqa, imaraqchá pasawasunman”, nispa. Paykunaqa manchakurqankun runakunata llapallanku Juanta profetapaqpuni jap’isqankurayku.+ 33 Chaymi Jesusta nirqanku: “Manan yachaykuchu”, nispa. Jesustaq paykunata nirqan: “Chhaynaqa manan noqapas nisaykichischu piqpa kamachisqanchus kaykunata ruwani chayta”, nispa.