Lucas
17 Chaymantataq Jesusqa discipulonkunata nirqan: “Juchaman urmachiqkunaqa* kanqapunin. Ichaqa, ¡ay imaraqmi kanqa chay urmachiqkunamantaqa! 2 Aswan allinmi paypaqqa kanman molino rumita kunkanman warkuruspa lamar-qochaman wijch’uykusqa kaynin, kay juch’uykunamanta jujninta juchaman urmachinanmantaqa.+ 3 Chhaynaqa, qankuna kikiykichista allinta qhawarikuychis. Wayqeykichus qan contra juchallikun chayqa, payta anyay;+ juchanmantachus perdonta mañakun chayqa, perdonapuy.+ 4 Juj p’unchaypi qanchis kutitaña qan contra juchallikuspa, qanchis kutillatataq qanman kutimuspa nisunkiman: Perdonaway, nispa chayqa, perdonapunkin”,+ nispa.
5 Apostolkunan Señorta nirqanku: “Yanapawayku aswan iñiyniyoq kanaykupaq”,+ nispa. 6 Jinan Señorqa paykunata nirqan: “Iñiyniykichischus mostaza muju sayayllapas kanman chayqa, kay mora sach’atan niwaqchis: T’irakuspa lamar-qochapi mallkikamuy, nispa; chay sach’ataq kasusunkichisman.+
7 ”¿Mayqenniykichistaq kamachiykichis chajrapi yapumusqanmanta* uywa michimusqanmantapas kutimuqtin niwaqchis: Usqhaylla kayman jamuy, jinaspa mesapi mijuy, nispa? 8 ¿Manachu aswanpas niwaqchis: Cenanaypaq imallatapas wayk’urapuway, jinaspa mandilta churakuspa servimuway, mijuyta ujayta tukunaykama; chaymantaña qanqa mijunkipas ujankipas, nispa? 9 Kamachiqa imachus ruwanantataq ruwashan chayqa, manan patronqa gracias ninmanchu ¿riki? 10 Chhaynaqa, qankunapas ima kamachitapas ruwaspaykichisqa ninkichismi: Noqaykuqa mana valeq kamachikunallan kayku, imachus ruwanayku karqan chayllatan ruwayku,+ nispa”.
11 Jerusalenman rishaspan Jesusqa Samariawan Galileawan tupayninta pasasharqan. 12 Juj aylluman jaykushaqtinmi lepra onqoyniyoq chunka runakuna payta rikurqanku, karullapi sayaykuspataq+ 13 fuerteta nirqanku: “¡Jesús, yachachikuq, khuyapayaykuwayku!”, nispa. 14 Jesustaq paykunata rikuruspa nirqan: “Phaway riychis, jinaspa sacerdotekunawan qhawachikamuychis”,+ nispa. Rishaqtinkutaq lepra onqoyninkuqa chinkapurqan.+ 15 Jinan jujnin runaqa lepra onqoyninmanta qhaliyapusqanta reparaspa alto kunkawan Diosta jatunchaspa kutimurqan. 16 Jesuspa ñaupanpi pampakama k’umuykuspataq agradecekurqan, payqa Samaria llaqtayoq runan karqan.+ 17 Jesustaq nirqan: “¿Manachu chunka runakuna qhaliyachisqa karqanku? Chhaynaqa, ¿maytaq wakin isqon runakunari? 18 ¿Imaraykutaq paykunari mana jujnillankupas kutimunchu Diosta jatunchaq? ¿Imaraykutaq waj nacionmanta runallari kutimun?”, nispa. 19 Jinan chay runata nirqan: “Sayarispa ripuy, iñiyniykin qhaliyachisunki”,+ nispa.
20 Juj kutinmi fariseokuna Jesusta tapurqanku jayk’aqchus Diospa gobiernon jamunan karqan chayta,+ jinan payqa nirqan: “Diospa gobiernonqa manan llapa runaq reparananpaq jinachu jamunqa, 21 nitaq pipas ninqachu: ¡Qhawariychis, kaypin kashan! Otaq ¡jaqaypin kashan!, nispaqa. Diospa gobiernonqa qankuna chaupipin kashan”,+ nispa.
22 Chaymantataq Jesusqa discipulonkunata nirqan: “Tiempon chayamunqa, chaypin qankunaqa runaq Churinpa jujnin p’unchayninta rikuyta munankichis, ichaqa manan rikunkichischu. 23 Runakunan nisunkichis: ¡Qhawariychis, jaqaypin kashan! Otaq ¡kaypin kashan!, nispa. Ichaqa aman creenkichischu, amataq qhepankutapas phawankichischu.+ 24 Imaynan llifllikiyqa cieloq juj ladonmanta cieloq juj ladonkamaraq k’ancharin, chhaynallataqmi runaq Churinpas+ kanqa p’unchayninpi.+ 25 Ñaupaqtan ichaqa imaymanapiraq ñak’arinan, kay tiempo runakunaq pisichasqan imaraqmi kanan.+ 26 Imaynan Noepa p’unchayninkunapi karqan,+ chhaynallataqmi runaq Churinpa p’unchayninkunapipas kanqa.+ 27 Runakunan mijusharqanku, ujasharqanku, qharikunapas casarakusharqanku, warmikunapas casarachisqa kasharqanku, Noepa arcaman jaykusqan p’unchaykama;+ chayllamanmi jatun para chayamurqan, jinaspa llapankuta millp’upurqan.+ 28 Chhaynallataqmi Lotpa p’unchayninkunapipas karqan;+ runakunan mijusharqanku, ujasharqanku, rantisharqanku, vendesharqanku, tarpusharqanku, wasitapas ruwasharqanku. 29 Sodoma llaqtamanta Lotpa lloqsimusqan p’unchaymi ichaqa cielomanta azufreyoq nina para chayamurqan, jinaspa llapankuta ch’usaqyachipurqan.+ 30 Chhaynallataqmi kanqa runaq Churinpa rikuchikunan p’unchaypipas.+
31 ”Chay p’unchaypiqa wasi patapi kashaqqa amaña uraykuchunchu kaqninkunata orqomunanpaq, chajrapi kashaqpas amaña kutimuchunchu ima saqesqanmanpas. 32 Lotpa esposanta imachus pasasqanta yuyariychis.+ 33 Pipas vidanta waqaychayta munaqqa chinkachinqan, pipas vidanta chinkachiqmi ichaqa tarinqa.+ 34 Niykichismi: Chay tutapin juj puñunapi iskay kashanqaku; jujninmi apasqa kanqa, jujnintaq saqerparisqa kanqa.+ 35 Iskay warmikunan kutanapi kuska kutashanqaku; jujninmi apasqa kanqa, jujnintaq saqerparisqa kanqa”, nispa. 36 *—— 37 Jinan paykunaqa nirqanku: “Señor, ¿maypin chay kanqa?”, nispa. Jesustaq paykunata nirqan: “Maypichus wañusqa cuerpo kashanqa, chaypin ankakunapas juñukunqa”,+ nispa.