Éxodo

39 Azul q’aytumanta, azulniraq puka q’aytumanta, k’anchaq puka q’aytumantawanmi+ artesanokunaqa ch’uya partepi servinapaq allin awasqa munay p’achakunata ruwarqanku. Aaronpaqpas ruwapurqankun sacerdote p’achata+ Jehová Dios Moisesta kamachisqanman jina.

2 Bezalelmi ruwarqan uma sacerdotepaq unkuta.*+ Chaymi awasqa karqan qori q’aytumanta, azul q’aytumanta, azulniraq puka q’aytumanta, k’anchaq puka q’aytumanta, ñañuy-ñañu k’antisqa lino q’aytumantawan. 3 Paykunaqa martillowanmi qorita takarqanku ñañu, llaflla* kanankama, chaytan Bezalelqa q’aytuta jina k’utuchirqan jinaspa azul q’aytuman, azulniraq puka q’aytuman, k’anchaq puka q’aytuman, sumaq lino q’aytumanwan churarqan, chaywanmi unkuta bordarqan. 4 Qhasqonta wasantawanmi ruwarqanku, chaymantataq iskayninta rijranpi jap’inachirqanku. 5 Unkuman sirasqa chumpipas+ qori q’aytumanta, azul q’aytumanta, azulniraq puka q’aytumanta, k’anchaq puka q’aytumanta, ñañuy-ñañu k’antisqa lino q’aytumanta imallataqmi awasqa karqan. Jehová Dios Moisesta kamachisqanman jinan chaytapas ruwarqanku.

6 Ónice rumikunapin Israelpa churinkunaq sutinta sellota jina k’iñarqanku,*+ chaytataq qori jap’inakunaman ch’olqochirqanku.* 7 Chaytan Bezalelqa unkuq iskaynin rijrankunaman churarqan Israel runakunata yuyarichiq rumi kananpaq.+ Chaytapas Jehová Dios Moisesta kamachisqanman jinan ruwarqan. 8 Chaymantataq qhasqo* ch’uspata+ ruwarqan, chaytapas unkuta jinan bordarqan qori q’aytuwan, azul q’aytuwan, azulniraq puka q’aytuwan, k’anchaq puka q’aytuwan, ñañuy-ñañu k’antisqa lino q’aytuwan ima.+ 9 Chay ch’uspaqa cuadradon karqan, anchonpas largonpas juj cuartan* karqan. 10 Chay ch’uspamanmi k’askachirqanku tawa fila rumikunata. Ñaupaq filapin kasharqan rubí rumi, topacio rumi, esmeralda rumipiwan. 11 Iskay kaq filapitaq kasharqan turquesa rumi, zafiro rumi, jaspe rumipiwan. 12 Kinsa kaq filapitaq kasharqan lésen rumi,* ágata rumi, amatista rumipiwan. 13 Tawa kaq filapitaq kasharqan crisólito rumi, ónice rumi, jade rumipiwan. Sapanka rumin qori jap’inaman ch’olqochisqa karqan. 14 Chay rumikunapin k’iñasqa karqan Israelpa chunka iskayniyoq churinkunaq sutin. Sapanka rumin juj aylluwan tuparqan. Sapanka rumipitaqmi juj aylluq sutin sello jina k’iñasqa karqan.

15 Chaymantataq qhasqo ch’uspapaq qori watukunata ruwarqanku, chaykunaqa qori q’aytumantan simp’asqa karqan.+ 16 Ruwallarqankutaqmi iskay qori jap’inakunata, iskay juch’uy qori argollakunatapas; chay juch’uy argollakunatan qhasqo ch’uspaq iskaynin wichay lado esquinankunaman churarqanku. 17 Chaynintan ruwasqanku qori watukunata pasachirqanku. 18 Chaymantataq chay watukunaq iskaynin puntanta qori jap’inakunaman pasachirqanku jinaspa chay jap’inakunata unkuq rijranman jap’ichirqanku. Unkuq qhasqonpin ch’uspaqa warkurayasharqan. 19 Ruwallarqankutaqmi waj iskay juch’uy qori argollakunatapas, chaytan churarqanku qhasqo ch’uspaq uray ladonpi iskaynin qhepa esquinankunaman.+ 20 Chaymantapas ruwallarqankutaqmi waj iskay qori argollakunatapas, chaykunatan churarqanku unkuq ñaupaq ladonpi iskaynin rijranpa uranpi, unkupi sirasqa chumpiq jawanpi. 21 Chay argollakunamanmi azul watuta churarqanku, chaytataq qhasqo ch’uspaq qhepanpi churasqanku argollakunaman jap’ichirqanku. Chhaynapi chay qhasqo ch’uspaqa chumpiq jawallanpi mana kuyuspa k’askarayananpaq. Jehová Dios Moisesta kamachisqanman jinan chaykunataqa ruwarqanku.

22 Bezalelqa mana makiyoq jatun p’achatawanmi ruwarqan, chayqa azul q’aytumanta awasqan karqan.+ 23 Chay p’achaq umapaq t’oqonqa maqanakuna chalecoq* t’oqon jinan ruwasqa karqan. Llapa muyuriqnintaq bordasqa karqan, chhaynapi mana llik’ikunanpaq. 24 Ura cantonmantaq azul q’aytuta, azulniraq puka q’aytuta, k’anchaq puka q’aytutawan k’antispa granadakunata ruwarqanku. 25 Ruwallarqankutaqmi qori campanillakunatapas, chaytan churarqanku mana makiyoq p’achaq ura cantonman granadakunawan chaupinasqata. Granadakunaq chaupinmanmi campanillakunata churarqanku. 26 Granadaq qhepanmanmi rirqan campanilla, chaymantaq rirqan granada, chaymantaq campanilla, chaymantaq granada. Chhaynan karqan chay p’achaq llapa muyuriq cantonpas. Jehová Dios Moisesta kamachisqanman jinan ruwarqanku.

27 Ruwallarqankutaqmi Aaronpaq wawankunapaqwan linomanta jatun p’achakunatapas,+ chay p’achakunaqa awasqan karqan. 28 Ruwallarqankutaqmi uma k’uyunatapas,+ Aaronpa wawankunapaq uma k’uyunakunatapas,+ ñañuy-ñañu k’antisqa linomanta trusakunatapas,+ 29 chumpitapas. Chay chumpiqa ñañuy-ñañu k’antisqa lino q’aytumanta, azul q’aytumanta, azulniraq puka q’aytumanta, k’anchaq puka q’aytumanta iman awasqa karqan. Chaykunatapas Jehová Dios Moisesta kamachisqanman jinan ruwarqanku.

30 Chaymantataq ruwarqanku k’anchashaq llaflla qori tablillata. Chay tablillan rikuchirqan chayta apaqqa Diospaq t’aqasqa kasqanta. Chay tablillapin sellotapas churashankuman jina k’iñarqanku: “Ch’uya kayqa Jehová Diospan”,+ nispa. 31 Jinaspa azul watuta churarqanku chaywan uma k’uyunaman watanankupaq. Chaytapas Jehová Dios Moisesta kamachisqanman jinan ruwarqanku.

32 Chhaynatan ruwayta tukurqanku yupaychana karpata, Dioswan tupana karpata. Israel runakunaqa Jehová Dios Moisesta kamachisqanman jinan ruwarqanku.+ Diospa nisqanman jinapunin tukuy imatapas ruwarqanku.

33 Chaymantataq paykunaqa chay ch’uya karpata+ llapa imaymanankunatawan Moisesman apamurqanku. Paykunan apamurqanku ganchokunata,+ marcokunata,+ rejakunata,+ columnakunata, t’oqoyoq sayanakunatawan.+ 34 Apamullarqankutaqmi oveja qara qatanata,+ foca qara qatanata, t’aqaq cortinata ima.+ 35 Diospa rimanakuynin arcata, tapanta,+ k’aspinkunatawan;+ 36 mesata tukuy imaymanankunata,+ Diospaq t’aqasqa t’antatawan; 37 qori candelerota, filapi churasqa mecheronkunata,*+ tukuy imaymanankunata,+ mecheropaq aceitetawan;+ 38 qori altarta,+ jawina aceiteta,+ sumaq q’apaq inciensota,+ karpa punkupaq cortinatawan;+ 39 cobre altarta,+ cobremanta ruwasqa rejillankunata, k’aspinkunata,+ llapa imaymanankunatawan;+ cobremanta ruwasqa jatun puruñata, tiyanantawan;+ 40 karpa muyuriqpaq cortinakunata, postenkunata, sayanankunata,+ karpa patio punkupaq cortinata,+ waskhakunata, estacakunata,+ Dioswan tupana karpapaq llapa serviciokunatawan; 41 ch’uya partepi servinapaq allin awasqa munay p’achakunata, Aaronpaq sacerdote p’achakunata,+ wawankunapaq sacerdote p’achakunatawan.

42 Israel runakunaqa Jehová Dios Moisesta kamachisqanman jinapunin tukuy imatapas ruwarqanku.+ 43 Paykunaq llapa ruwasqankuta qhawaspan Moisesqa repararqan Jehová Diospa kamachisqanman jinapuni ruwasqankuta. Chaymi Moisesqa paykunata bendecirqan.