Éxodo

40 Chaymantataq Jehová Diosqa Moisesta nirqan: 2 “Ñaupaq kaq killa qallariy p’unchaypin yupaychana karpata, noqawan tupana karpata armanki.+ 3 Chay karpa ukhumanmi cortinaq+ qhepanman apaykunki rimanakuyniy arcata.+ 4 Apaykullankitaqmi mesatapas,+ jinaspa chay pataman llapa imaymanankunata churanki. Apaykunkin candelerotapas,+ jinaspa mecheronkunata* jap’ichinki.+ 5 Rimanakuyniy arcaq ñaupanpin incienso q’apachina+ qori altarta churanki. Chaymantataq karpa jaykunaman cortinata warkunki.+

6 ”Ofrenda ruphachina altartataq+ yupaychana karpaq, tupana karpaq ñaupanpi churanki. 7 Jatun puruñatataq tupana karpawan altarwan chaupipi churanki, jinaspa chayman unuta junt’achinki.+ 8 Chaymantataq karpa muyuriq patiota+ cercanki, punku jaykunamanpas cortinata+ warkunki. 9 Chaymantataq jawina aceitewan+ jich’aykunki karpata+ tukuy imaymanankunatawan. Jinaspa karpatapas llapa servicionkunatapas ch’uyanchanki, chhaynapin chaykunaqa ch’uya kanqa. 10 Ofrenda ruphachina altartapas tukuy imaymanantapas jawina aceitewanmi jich’aykunki, jinaspa ch’uyanchanki, chhaynapin chay altarqa ch’uyay-ch’uya kanqa.+ 11 Jatun puruñatapas tiyanantapas jawina aceitewanmi jich’aykullankitaq, jinaspa ch’uyanchanki.

12 ”Chaymantataq Aaronta churinkunatawan tupana karpa punkuman asuykachinki, jinaspa paykunata unuwan maqchinki.+ 13 Aarontan sacerdote p’achawan p’achachinki,+ jinaspa jawina aceitewan jich’aykunki+ ch’uyanchanki ima, chhaynapin payqa sacerdotey kapunqa. 14 Churinkunatapas asuykachimuspan jatun p’achakunawan churanki,+ 15 jinaspa jawina aceitewan papankuta jina jich’aykunki+ sacerdoteykuna kanankupaq. Chay ruwasqaykin rikuchinqa paykunapas lliu mirayninkunapas sacerdotekuna kanankuta”,+ nispa.

16 Moisesqa Jehová Diospa llapa kamachisqantan ruwarqan.+ Paypa kamachisqanman jinapunin tukuy imatapas ruwarqan.

17 Iskay kaq watapi,* ñaupaq kaq killapi ñaupaq kaq p’unchaypin yupaychana karpaqa sayarichisqa karqan.+ 18 Karpata armananpaqqa sayanakunatan+ Moisesqa churarqan, chay patamantaq marcokunata+ sayachirqan, jinaspa marcokuna jap’iq k’aspikunata+ pasachirqan. Chaymantataq columnakunata sayachirqan. 19 Chay patamantaq karpapaq telata mast’arirqan+ jinaspa qatanakunawan qatarqan.+ Jehová Diospa kamachisqanman jinan ruwarqan.

20 Chaymantataq Moisesqa rimanakuy p’alta rumikunata+ Diospa rimanakuynin arcaman+ churarqan, jinaspa tapanwan taparqan.+ K’aspikunatapas suskhuchirqanmi arcaq ninrinkunaman.+ 21 Diospa rimanakuynin arcatataq karpa ukhuman apaykurqan jinaspa t’aqaq cortinata+ warkurqan, chhaynatan Diospa rimanakuynin arcata pakarqan.+ Jehová Diospa kamachisqanman jinan chayta ruwarqan.

22 Jinamantaq Moisesqa mesata+ Dioswan tupana karpa ukhuman apaykurqan, jinaspa cortinaq ñaupanman churarqan, karpapi paña ladoman. 23 Chay patamantaq Jehová Diospa ñaupanpi t’antata+ tauqarqan. Jehová Diospa kamachisqanman jinan chaytapas ruwarqan.

24 Chaymantataq candelerota+ apaykurqan, jinaspa karpapi lloq’e ladoman churarqan, mesaq chimpanman. 25 Chay candeleropi mecherokunatan+ Jehová Diospa ñaupanpi jap’ichirqan Jehová Diospa kamachisqanman jina.

26 Chaymantataq Moisesqa qori altarta+ chay tupana karpa ukhuman apaykurqan, jinaspa cortinaq ñaupanman churarqan, 27 chay altarpi inciensota q’apachikunanpaq.+ Jehová Diospa kamachikusqanman jinan chaykunataqa ruwarqan.

28 Jinamantaq yupaychana karpa jaykunaman cortinata+ warkurqan.

29 Chaymantataq ofrenda ruphachina altarta+ churarqan yupaychana karpaq ñaupanpi, tupana karpaq ñaupanpi, chaypi ruphachina ofrendakunata+ jak’u ofrendakunatawan jaywananpaq. Jehová Diospa kamachisqanman jinan chaykunataqa ruwarqan.

30 Dioswan tupana karpawan altarwan chaupipin churarqan jatun puruñata, jinaspa chayman unuta junt’achirqan chaywan maqchikunankupaq.+ 31 Chaypin Moisespas, Aaronpas, Aaronpa churinkunapas makinkuta chakinkutawan maqchikurqanku. 32 Jehová Dios Moisesta kamachisqanman jinan paykunaqa Dioswan tupana karpaman jaykunankupaq altarman asuykunankupaqwan chay puruñapi unuwan maqchikuqku.+

33 Chaykuna qhepatataq Moisesqa karpa muyuriq patiota+ lliu altar muyuriqtawan cortinakunawan cercarqan, punku jaykunamanpas warkurqanmi cortinakunata.+

Chhaynatan Moisesqa yupaychana karpa ruwayta tukurqan. 34 Chaymantataq phuyu pakaykurqan Dioswan tupana karpata, Jehová Diospa k’anchayninpas karpaman junt’aykurqan.+ 35 Chaymi Moisesqa mana atirqanchu tupana karpaman jaykuyta, chay patapi phuyu kashasqanrayku, Jehová Diospa k’anchayninpas karpaman junt’aykusqanrayku.+

36 Karpamanta phuyu oqarikuqtinmi Israel runakunaqa karpankuta oqarispa puririqku,+ chhaynatan tukuy purisqankupipas ruwaqku. 37 Phuyu mana oqarikuqtinqa kaqllapin kaqku, manataqmi karpankuta oqariqkuchu chay phuyu oqarikunankama.+ 38 Jehová Diospa phuyunqa yupaychana karpa patapin p’unchayqa kaq, tutapin chay phuyuqa nina phuyuman tukuq.+ Israel runakunaqa tukuy purisqanku tiempopin rikullaqkupuni chay phuyuta.