Jeremías
46 Nacionkunawan imachus pasananmanta willakuytan profeta Jeremiasqa Jehová Diosmanta chaskirqan.+ 2 Egiptopaq,+ Éufrates mayu patapi kashaq Egipto rey faraón Nekopa+ soldadonkunapaq. Josiaspa churin Judá rey Jehoiaquin+ tawa wataña kamachikushaqtinmi, Babilonia rey Nabucodonosorqa paykunata Carquemispi atiparqan, paykunatan Dios nin:
3 “Jark’apakuna jatun escudoykichista, juch’uy* escudoykichista alistaychis,
maqanakuq lloqsiychis.
4 Caballopi sillakuqkuna, caballoykichista alistaspa sillakuychis.
Cascoykichista churakuspa maypichus kanaykichispi churakuychis.
Lanzaykichista filoyachiychis, maqanakuna chalecoykichiswan* churakuychis.
5 Jehová Diosmi nin: ¿Imaraykun paykunata sinchi mancharisqata rikushani?
Kutipushankun, soldadonkunaqa atipasqan kapunku.
Soldadonkunaqa qhepankuta mana qhawarikuspan sinchi mancharisqa ayqekunku.
Sinchi manchakuyllan tukuy ladopi kashan.
6 Allin phawaqkunaqa manan ayqeyta atinkuchu,
soldadokunaqa manan escapayta atinkuchu.
Wichay ladopin, Éufrates mayu patapin misk’aspa urmanku,+ nispa.
7 ¿Pin kay Nilo mayu jinaraq wichamushan?
¿Pin kay sinchi phoqchiqeq mayu jinaraq jamushan?
8 Egipton Nilo mayu jinaraq wichamushan,+
phoqchiqeq mayu jinaraqmi jamushan,
nintaq: Wichaspan jallp’ata p’ampasaq,
llaqtatan runakunantinta chinkachisaq, nispa.
9 ¡Caballokuna, wichamuychis!
¡Carretakuna, loco jinaraq phawaychis!
Soldadokuna lloqsillaychisña,
jark’apakuna escudota+ jap’iq Cus runakuna, Puj runakuna lloqsillaychisña,
flechana arcota jap’iq, flechana arcota chutaq+ Lud runakuna+ lloqsillaychisña.
10 ”Chay p’unchayqa tukuy munayniyoq Señorpa, ejercitokunata kamachiq Jehová Diospa p’unchayninmi, enemigonkunamanta vengakunan p’unchaymi. Espadan sajsanankama paykunata wañuchinqa, yawarninkuwan amikunankaman wañuchinqa, tukuy munayniyoq Señormi, ejercitokunata kamachiq Jehová Diosmi wichay ladopi, Éufrates mayu patapi sacrificiota ruwanqa.*+
11 Sipas Egipto, Galaadta wichay,
balsamota maskhamuy.+
Yanqan jampikunataqa maskharqanki,
qanpaqqa manan jampi kanchu.+
12 Nacionkunan pisichasqa kasqaykita yachanku,+
qaparisqaykin jallp’antinpi uyarikun.
Soldadokunan misk’achinakuspa iskayninku urmanku”, nispa.
13 Babilonia rey Nabucodonosor Egipto jallp’aman phawaykunanmantan+ Jehová Diosqa profeta Jeremiasta nirqan:
14 “Egiptopi willaychis, Migdolpi willaychis.+
Nof llaqtapi,* Tapanés llaqtapi willaychis.+
Khaynata niychis: Maychus kanaykichispi churakuychis, alistakuychis,
espadan muyuriqniykichispi kaqkunata lliuta ch’usaqyachinqa.
15 ¿Imaraykun kallpasapa runaykikuna chinkachisqa kapurqanku?
Jehová Dios atipasqanraykun paykunaqa mana sayayta atirqankuchu.
16 Askhan misk’aspa urmashanku.
Jujkuna jujkunawanmi ninakushanku:
Jaku llaqtanchisman kutipusun, jallp’anchisman kutipusun,
millay espadamanta ayqesun, nispa.
17 Chaypin willarqanku:
18 Noqa ejercitokunata kamachiq Jehová sutiyoq reymi nini,
noqa wiñaypaq kausaq Diosmi jurani:
19 Egiptopi tiyaqkuna,
q’epiykichista alistakuychis preso apasqa kanaykichispaq.
Nof llaqtan* mancharikunaman tukuchisqa kanqa,
20 Egiptoqa munay malta waka jinan.
Ichaqa wichay ladomantan ch’uspikuna k’utunanpaq jamunqa.
21 Mink’asqa soldadonkunapas wira torillokuna jinan kanku,
paykunapas kutirispan kuska ayqepunku.
Manan qaqata sayayta atirqankuchu,+
ñak’arinanku p’unchaymi paykunaman chayarqan,
cuentata qonanku tiempon paykunaman chayarqan, nispa.
22 Payqa mach’aqway jinan silbaspa ayqen,
enemigonkunaqa paypa qhepantan hachantin tukuy kallpankuwan phawanqaku,
sach’a wit’uq* runakuna jinan phawanqaku.
23 Sach’a-sach’antan wit’unqaku,
mana jaykuy atina jinaña kashaqtinpas.
Langostakunamantapas* aswan askhan kanku,
mana yupay atiymi kanku, ninmi Jehová Dios.
24 Egipto runakunaqa p’enqachisqan kanqaku,
wichay lado llaqtaq makinmanmi entregasqa kanqaku,+ ninmi Diosqa.
25 ”Ejercitokunata kamachiq Jehová Diosmi, Israelpa Diosninmi nin: No+ llaqtaq* Amón+ diosninta, faraonta, Egiptota, diosninkunata,+ reyninkunata iman castigasaq. Arí, faraonta llapa paypi confiaqkunatawanmi castigasaq,+ nispa.
26 ”Wañuchiyta munaqninkunamanmi entregasaq, Babilonia rey Nabucodonosormanmi,+ kamachinkunamanwanmi entregasaq. Chaymantan ichaqa wajmanta ñaupa tiempopi jina runakuna tiyapunqaku, ninmi Jehová Dios.+
27 Qan ichaqa kamachiy Jacob, ama manchakuychu,
Israel llaqtalláy, ama sinchita mancharikuychu.+
Karu jallp’amantan kutichimpusayki,
preso apasqa kasqanku jallp’amantan+ mirayniykita kutichimpusaq.
Jacobqa kutimpunqan, allillanmi kashanqa, thajmi kashanqa,
manan pipas manchachinqachu.+
28 Chhaynaqa kamachiy Jacob, ama manchakuychu, qanwanmi kashani.