Jueces

17 Efraín orqo-orqopin+ tiyarqan Miqueas sutiyoq runa. 2 Paymi mamanta nirqan: “¿Yuyashankichu waranqa pachaj qolqeykiq chinkasqanta? Chay oqarikuqtan qanqa ñakarqanki ¿riki? Qhawariy, noqan chay qolqeykitaqa jap’ishani, noqan oqarikurqani”, nispa. Chayta uyarispan mamanqa nirqan: “Jehová Dios wawaytaqa bendecichun”, nispa. 3 Jinan Miqueasqa chay waranqa pachaj qolqeta mamanman qopurqan. Mamantaq payta nirqan: “Kay qolqetaqa Jehová Diospaqmi qopusaq.* Chhaynaqa wawáy jap’ikapuy kay qolqeta, chaywan iskay idolokunata ruwachikamuy”,+ nispa.

4 Chay qolqeta Miqueas qopuqtin jinan mamanqa iskay pachaj qolqeta t’aqarqan, jinaspa chayta qorqan qolqe takaq* runaman, paymi ruwarqan iskaynin idolokunata, chaytataq Miqueaspa wasinpi churarqanku. 5 Miqueaspan karqan idolokuna yupaychanan wasi. Paymi ruwarqan juj sacerdote unkuta*+ terafim* idolokunatawan.+ Chaymantapas juj kaq wawantan churarqan sacerdote kananpaq.+ 6 Chay tiempopiqa manan Israel llaqtapiqa rey karqanchu.+ Runakunaqa sapankankun imatachus allinpaq qhawarisqankuman jina imatapas ruwaqku.+

7 Judá ayllupi kaq Belenpin+ Judá familiamanta* Leví aylluyoq+ wayna runa tiyarqan. 8 Chay runan Judapi kaq Belén llaqtata saqespa tiyananpaq wasita maskhaspa purirqan, jinan chayarqan Efraín orqo-orqopi Miqueaspa+ wasinman. 9 Jinan Miqueasqa tapurqan: “¿Maymantan jamushanki?”, nispa. Paytaq nirqan: “Judapi kaq Belenmantan jamushani, Leví ayllumantan kani. Juj wasitan maskhakushani tiyanaypaq”, nispa. 10 Chaymi Miqueasqa nirqan: “Kayllapiña tiyakapuy, qan kanki yuyaychawaqniypas* sacerdoteypas. Watapi chunka qolqeta pagapusayki, mijunatapas p’achatapas qosaykin”, nispa. Jinan chay runaqa Miqueaspa wasinman jaykurqan. 11 Chaypin qhepakapurqan Miqueaswan kuska, wawan jinataqmi kapurqanpas. 12 Chaymantapas Miqueasqa chay Leví ayllumanta waynatan sacerdote kananpaq nombrarqan.+ Jinan chay waynaqa paypa wasinpi tiyapurqan. 13 Chaymantataq Miqueasqa nirqan: “Leví runataq sacerdotey kapun chayqa, allinpaqchá kunanqa Jehová Diosqa qhawariwanqa”, nispa.