1 Samuel
3 Samuelqa sacerdote Elita yanapaspan Jehová Diosta servisharqan.+ Chay tiempopiqa manañan pitapas Jehová Diosqa rimaykuqñachu, manañan pipas ima rijuriytapas rikuqchu.+
2 Juj kutinmi Eliqa puñunan cuartopi puñusharqan, paypa ñawinqa ñausayapusharqanmi manañan imatapas rikuqchu.+ 3 Diospa wasinpi* mecheropas*+ k’anchashallarqanraqmi, Samueltaq Jehová Diospa wasinpi puñusharqan.+ Chay wasipin Diospa rimanakuynin arcapas* kasharqan. 4 Chayllamanmi Jehová Diosqa Samuelta wajamurqan, Samueltaq nirqan: “Kaypin kashani”, nispa. 5 Jinaspan Elipa kasqanman usqhaylla rispa nirqan: “Papáy, wajamushawankichu, kaypin kashani”, nispa. Elitaq nirqan: “Manan noqaqa wajamuykichu, phaway puñukamullay”, nispa. Jinan Samuelqa puñunanman kutipurqan. 6 Jehová Diosqa jujmantan wajamullarqantaq: “¡Samuel!”, nispa. Samueltaq jatarispa Elipa kasqanman rirqan, jinaspa nirqan: “Papáy, wajamushawankichu, kaypin kashani”, nispa. Elitaq nirqan: “Manan wajamuykichu wawáy, phaway puñukamullay”, nispa. 7 Samuelqa manaraqmi Jehová Diosta allintaraqchu reqsirqan, manaraqmi Jehová Diosqa paywan rimarqanraqchu.+ 8 Jehová Diostaq kinsa kaq kutipi wajamullarqantaq: “¡Samuel!”, nispa. Samueltaq jatarispa Elipa kasqanman rirqan, jinaspa nirqan: “Qanpunin wajamushawanki, kaypin kashani”, nispa.
Chay ratun Eliqa repararqan Jehová Dios Samuelta wajamushasqanta. 9 Jinan Eliqa Samuelta nirqan: “Phaway puñunaykiman riy, jujmanta wajamusunki chayqa: Kaypin kashani Jehová Diosníy, noqaqa kamachiykin kani, uyarishaykin, nispa ninki”, nispa. Chayta niqtinmi Samuelqa jujmanta puñunanman kutipurqan.
10 Chay qhepamanmi Jehová Diosqa Samuelta wajamullarqantaq: “¡Samuel! ¡Samuel!”, nispa. Samueltaq nirqan: “Kaypin kashani Diosníy, noqaqa kamachiykin kani, uyarishaykin”, nispa. 11 Jehová Diostaq Samuelta nirqan: “Israel llaqtapin manchakunapaq ruwayta ruwasaq, chayta uyariqkunaqa mancharisqan khatatatanqakuraq.*+ 12 Chay p’unchaymi Elipa contranpi familianpa contranpi imachus rimasqayta qallariymantapacha tukukunankama llapanta junt’asaq.+ 13 Payman willamuy familianman wiñaypaq juicio apamunaymanta, payqa yachanñan imaraykuchus chay ruwanayta.+ Churinkunan mana respetawankuchu, millaytan k’amishawanku,+ paytaq jinallata chayta qhawashan.+ 14 Chayraykun noqaqa Elipa familian contra jurarqani. Paykunaq juchantaqa manan jayk’aqpas ima sacrificiopas ni ima ofrendapas pichanqachu”,+ nispa.
15 Samuelqa kaqllapin puñurqan illarimunankama, chaymantataq Jehová Diospa wasin punkukunata kicharqan. Payqa manchakusharqanmi imachus uyarisqanta Eliman willayta. 16 Elí sacerdoten ichaqa Samuelta wajarqan: “¡Samuel! ¡Wawalláy!”, nispa. Samueltaq nirqan: “Kaypin kashani”, nispa. 17 Elitaq tapurqan: “¿Imatan Dios nirqasunki? Llapallanta sut’inta willaway. Imatapas pakawanki chayqa Diosmi sinchita castigasunki”, nispa. 18 Jinan Samuelqa mana imata pakaspa llapanta willarqan. Chayta uyarispan Eliqa nirqan: “Kayqa Jehová Diospa munayninmi. Imachus allinpaq qhawarisqanman jina ruwachun”, nispa.
19 Samuelqa watakunaq pasasqanman jinan wiñasharqan, Jehová Diospas paywanmi kasharqan.+ Chaymantapas Diosqa Samuelpa imachus rimasqantan lliuta junt’achiq. 20 Llapa Israel runakunan Dan ayllumanta Ber-Seba llaqtakama yacharqanku Samuelqa Jehová Diospa profetan kasqanta. 21 Jehová Diosqa Samuelmanmi rijurishallarqan Siló llaqtapi. Chay llaqtapin Jehová Diosqa Samuelwan reqsichikurqan, chaypin Jehová Diosqa Samuelta rimaykurqan.+