1 Samuel
8 Samuelqa machuchañan kasharqan chaymi wawankunata churarqan Israel llaqtapi juez kanankupaq. 2 Phiwi* churinpa sutinmi karqan Joel, jujnin kaq churinpa sutintaq karqan Abías.+ Paykunan Ber-Seba llaqtapi juez karqanku. 3 Ichaqa manan papanku jinachu karqanku, aswanpas mana allinkunata ruwaspan qhapaqyaqku,+ runakunamantan lluk’iykusqata chaskikuqku,+ mana chanintataqmi juzgaqkupas.+
4 Tiempoq pasasqanman jinan Israelpi umalliqkunaqa* juñukurqanku, jinaspa Ramá llaqtaman rirqanku Samuelpa kasqanman. 5 Chaypin paykunaqa Samuelta nirqanku: “Ñan machuyapushankiña, wawaykikunapas manan qan jinachu imatapas ruwanku. Juj reytayá churapuwayku pay kamachiwanankupaq,* waj nacionkuna jina reyniyoq kanaykupaq”,+ nispa. 6 Samuelmi ichaqa mana allinpaqchu qhawarirqan: “Juj reyta churapuwayku kamachiwanankupaq”, nispa nisqankuta, chaymi payqa Jehová Diosmanta mañakurqan. 7 Jehová Diostaq payta nirqan: “Chay runakunaq tukuy imachus mañakusqankuta ruway. Manan qantachu wijch’ushasunkiku, noqatan wijch’ushawanku, manan munankuchu reyninku kanayta.+ 8 Egiptomanta pusamusqay tiempomantapachan kay runakunaqa kaqlla kashanku. Waj dioskunata yupaychaspan+ sapa kuti saqewanku.+ Chaytan qanwanpas ruwashanku. 9 Chhaynaqa imachus mañakusqankuman jina ruwapuy, ichaqa sut’inta willay imakunachus paykunawan pasanqa chayta. Reyninkuqa imaymanakunatan paykunamanta mañayta atinqa”, nispa.
10 Jinan Samuelqa reyniyoq kayta munaq Israel runakunaman Jehová Diospa tukuy nisqanta willarqan. 11 Nirqanmi: “Pichus kamachisunkichis chay reyqa imaymanakunatan mañasunkichis:+ Churiykichiskunatan apanqa+ carretakunata manejanankupaq,+ caballokunapi sillakuq soldadokuna kanankupaq,+ carretakunaq ñaupanta phawanankupaq. 12 Wakintan ejercitopi waranqa soldadokuna umalliqta churanqa,+ wakintataq pisqa chunka soldadokuna umalliqta.+ Wakintan chajra llank’anankupaq+ cosechanankupaq+ ima apanqa, wakintataq armakunata ruwanankupaq carretakunata ruwanankupaq+ ima apanqa. 13 Ususiykichiskunatataq apanqa q’apaq jawinakunata* ruwanankupaq, t’antakunata ruwanankupaq, wayk’unankupaq ima.+ 14 Allin chajraykichiskunatan jap’ikapunqa, jap’ikapullanqataqmi allin uvas chajraykichiskunata allin aceituna chajraykichiskunatapas,+ chaykunatataq kamachinkunaman qopunqa. 15 Chajraykichismanta cosechasqaykichistapas uvas pallasqaykichistapas chunka kaq partentan jap’ikapunqa, chaytataq palacionpi autoridadkunaman kamachinkunaman ima qopunqa. 16 Chaymantapas qhari kamachiykichiskunata warmi kamachiykichiskunata iman apakapunqa. Apakapullanqataqmi allinnin wakaykichiskunata, allinnin asnoykichiskunatapas, chay animalkunatan paypaq llank’achinqa.+ 17 Ovejaykichiskunatapas chunka kaq partentan apakapunqa,+ qankunatapas kamachinkunamanmi tukuchipusunkichis. 18 Jinan juj p’unchay reyta ajllakusqaykichismanta mayta ñakapakunkichis.+ Jehová Diostan wajakunkichis, paymi ichaqa mana uyarimusunkichischu”, nispa.
19 Chay runakunan ichaqa mana kasukuspa Samuelta nirqanku: “¡Imapas kachun! ¡Juj reytapunin munayku! 20 Chhaynapin waj nacionkuna jina reyniyoq kasaqku, paymi kamachiwanqaku,* paymi pusawanqaku, paytaqmi guerrapipas umalliwanqaku”, nispa. 21 Chay runakunaq imachus nisqantan Samuelqa Jehová Diosman willarqan. 22 Jehová Diostaq Samuelta nirqan: “Kasullay chay runakunaq nisqanta, jinaspa juj reyta ajllapuy paykunata kamachinanpaq”,+ nispa. Jinan Samuelqa chay Israel runakunata nirqan: “Sapankaykichis llaqtaykichisman kutipuychis”, nispa.