1 Samuel
11 Najás sutiyoq Anmón runan+ runankunata pusarikuspa jamurqan Galaadpi Jabés+ runakunawan maqanakuq, jinaspa chay llaqta qayllapi karpakurqan. Jinan Jabés llaqta runakunaqa Najasta nirqanku: “Noqaykuwan rimanakuy, kamachiykikunan kapusaqku”, nispa. 2 Najastaq paykunata nirqan: “Noqawan rimanakuyta munankichis chayqa, sapankaykichispa paña ñawiykichistan orqosaykichis. Chhaynapi llapa Israel runakunata pisichanaypaq”, nispa. 3 Jinan Jabés llaqta umalliqkunaqa* nirqanku: “Qanchis p’unchayta suyariwayku, llapa Israel runakunamanraq kayta willachimusaqku. Manachus pipas libraqniyku jamunqa chayqa, qantan servipusaykiku”, nispa. 4 Jinan chay willaqkuna Saulpa tiyasqan Guibeá+ llaqtaman chayarqanku, imachus pasashasqanta llaqtantinman willaqtinkutaq runakunaqa waqayta qallarirqanku.
5 Chay ratun Saulqa michisqanmanta wakankunata qatimpusharqan, jinan runakunata tapurqan: “¿Iman pasarun? ¿Imaraykun waqashankichis?”, nispa. Jinan willarqanku Jabés llaqtamanta jamuq runakuna imachus nisqankuta. 6 Chayta uyariqtin jinan Diospa espiritun Saulman junt’aykurqan,+ jinan payqa sinchitapuni phiñakurqan. 7 Jinaspa iskay torota ñak’aspa askhaman kuchurparirqan, chaytataq Israelpi llapa llaqtakunaman apachirqan. Sapanka llaqtaman chayaspankun chay apaqkunaqa nirqanku: “¡Pipas Samueltapas Saultapas mana riysinqachu chayqa, uywankunan khayna ruwasqa kanqa!”, nispa. Chaywanmi llapa llaqtantin runakuna Jehová Diosta mancharikurqanku, jinan llapanku juj nisqalla lloqsimurqanku. 8 Chay runakunatan Saulqa Bezecpi yuparqan. Judá ayllumantan karqanku kinsa chunka waranqa runakuna, Israelpi wakin ayllukunamantataq karqanku kinsa pachaj waranqa runakuna. 9 Chaymantataq Jabés llaqtamanta jamuq runakunata nirqanku: “Galaadpi Jabés llaqta runakunata nimuychis: Paqarinmi chaupi p’unchayta jina librasqa kankichis, nispa”. Jinan chay runakunaqa ripuspanku chayta willarqanku Jabés llaqta runakunaman, chaywanmi paykunaqa anchata kusikurqanku. 10 Qhepamantaq Jabés llaqta runakunaqa Anmón runakunata nirqanku: “Paqarinmantan qankunata servisaykiku, jinan ima munasqaykichistapas ruwawankiku”,+ nispa.
11 Tutamantantaq Saulqa runankunata kinsa grupoman t’aqarqan. Kuska tuta pasayta* jinataq Anmón runakunaq+ karpakusqankuman jaykuspa wañuchiyta qallarirqanku, chaytan ruwarqanku yaqa chaupi p’unchaykama. Wakin mana wañuchisqa Anmón runakunataq lliu ch’eqerirqanku. 12 Chaymantataq Israel runakunaqa Samuelta nirqanku: “¿Pikunan mana munasharqankuchu Saúl rey kananta?+ Chay runakunata apamuchunku wañuchinanchispaq”, nispa. 13 Saulmi ichaqa nirqan: “Manan pipas kunan p’unchayqa wañunqachu+ Jehová Dios salvawasqanchisrayku”, nispa.
14 Chaykuna qhepamantaq Samuelqa llapa llaqtantin runakunata nirqan: “Jaku Guilgal+ llaqtata risun, llapa runa yachachun Saúl rey kasqanta”,+ nispa. 15 Jinan Israel runakunaqa llapanku Guilgal llaqtata rirqanku, chaypin Jehová Diospa ñaupanpi Saulta reyta churarqanku. Chaymantataq Jehová Diosman jaywarqanku sumaq kausay sacrificiota.+ Saulwan llapa Israel runakunawantaq chaypi anchata kusirikurqanku.+