1 Samuel
24 Filistea runakunata qatipasqanmanta kutimuqtin jinan Saulta nirqanku: “Davidqa En-Guedí ch’inneqpin kashan”,+ nispa.
2 Chaymi Saulqa lliu Israelmanta kinsa waranqa aswan allin soldadokunata ajllarqan. Paykunawanmi Davidta runankunatawan maskhaq rirqanku cabrakunaq purinan qaqa-qaqa qhatakunata. 3 Jinan Saulqa chayarqan ñan patapi kaq rumimanta ruwasqa oveja kancha-kanchaman. Jinaspan chay qayllapi kaq qaqa t’oqoman jisp’akuq jaykurqan, aswan ukhupitaq ichaqa Davidwan runankunapiwan tiyasharqanku.+ 4 Chaymi runankunaqa Davidta nirqanku: “Kay p’unchaymi Jehová Dios nishasunki: Qhawariy, makiykimanmi enemigoykita entregashayki,+ ima munasqaykitapas paywan ruway, nispa”. Jinan Davidqa sumaqllata Saulman qayllaykuspa jawa p’achanpa cantonta wit’urqan. 5 Davidpa sonqonmi* ichaqa juchacharqan+ Saulpa jawa p’achanpa cantonta wit’usqanmanta. 6 Chaymi runankunata nirqan: “Manapunin reyniytaqa imanaymanpaschu, payqa Jehová Diospa ajllakusqanmi. Jinaspapas Jehová Diosqa cheqnikunmi chay ruwaytaqa, ¿chayta yachaspaychu kunan Jehová Diospa ajllakusqanta imatapas ruwayta munayman?”,+ nispa. 7 Chhaynatan Davidqa runankunata jark’arqan Saulta ama imatapas ruwanankupaq. Saultaq chay qaqa t’oqomanta lloqsipurqan.
8 Jinan Davidqa chay t’oqomanta lloqsispa Saulta wajarqan: “¡Wiraqocháy! ¡Reyníy!”,+ nispa. Qhepanta Saúl qhawarikuqtintaq Davidqa qonqorikuspa pampakama k’umuykurqan. 9 Jinan Davidqa Saulta nirqan: “¿Imaraykun Davidmi wañuchiyta munashasunki nispa nisqankuta creenki?+ 10 Qhawariy, rikusqayki jina, kay p’unchaymi Jehová Diosqa qaqa t’oqopi kashaqtiy qanta makiyman entregawarqan. Wañuchiy niwaqtinkun+ noqaqa qanta khuyapayaspa nirqani: Manapunin reyniytaqa imanaymanpaschu, payqa Jehová Diospa ajllakusqanmi,+ nispa. 11 Wiraqocháy, qhawariy, makiypin jap’ishani jawa p’achaykiq cantonta. Kayta wit’ushaspaqa wañuchiykimanmi karqan, ichaqa manan imanarqaykipaschu. Rikusqayki jina, manan noqaqa qan contrachu kashani, manan imanaytapas munaykichu. Manapunin noqaqa qan contraqa juchallikurqanichu,+ qantaq ichaqa wañuchiyta munashawanki.+ 12 Jehová Diosmi juezqa, paymi qantapas noqatapas juzgawasunchis.+ Jehová Diosmi tukuy ruwawasqaykimantaqa castigasunki,+ noqan ichaqa manapuni imanasaykipaschu.+ 13 Ñaupa rimaypin nin: Mana allin runakunamantan mana allinqa paqarimun, nispa. Chayraykun noqaqa manapuni imanasaykipaschu. 14 Israel llaqtaq reynin, ¿imaraykutaq noqatari jap’iyta munashawanki? ¿Imataq noqari kani? Noqaqa wañusqa alqo jinallan kani, piki jinallan kani.+ 15 Jehová Diosmi juezqa, paymi qantapas noqatapas juzgawasunchis. Paymi kay ruwawasqaykita qhawarispa defiendewanqa.+ Paymi justiciata ruwawanqa, paymi makiykimantapas librawanqa”, nispa.
16 David rimayta tukuruqtinmi Saulqa tapurqan: “Wawáy David, ¿qanchu kashanki?”,+ nispa. Jinan Saulqa fuerteta waqayta qallarirqan. 17 Nirqantaq: “Qanqa noqamanta aswan chanin runan kanki. Qanqa khuyapayawarqankin, noqataq ichaqa mana allinta ruwarqayki.+ 18 Kay p’unchaymi Jehová Diosqa makiykiman entregawarqan, qantaq ichaqa khuyapayawaspa mana wañuchiwarqankichu.+ Chaytan kunan p’unchay sut’ita rikuchiwanki. 19 Manan pipas enemigonta tarispaqa jinallataqa kacharipunmanchu, qanmi ichaqa chayta ruwarqanki. Chayrayku Jehová Dios kutichipusunki+ kay p’unchay khuyapayawasqaykimanta. 20 Kunanqa allintan yachani rey kanaykita,+ Israelpiqa qanllan unay tiempo kamachikunki. 21 Kunantaq Jehová Diospa sutinpi juraway,+ wañupusqay qhepaman wawaykunata* amapuni wañuchinaykipaq, amapuni sutiytapas taytaypa familianmanta chinkachinaykipaq”,+ nispa. 22 Jinan Davidqa Saulpa mañakusqanman jina jurarqan. Chaymantataq Saulqa wasinman kutipurqan,+ Davidtaq runankunantin kutipurqan pakakunanku cheqasman.+