1 Samuel

30 Kinsa punchaymantataq Davidqa runankunantin Ziclag+ llaqtaman chayarqanku. Ichaqa chaypi mana kashanankukaman Amalec runakunaqa+ Négueb ladopi* kaq llaqtakunaman phawaykusqaku, Ziclag llaqtatataq lliuta kanaykusqaku. 2 Chay llaqtapi runakunataqa lliutan presota apapusqaku, jatuntapas juch’uytapas, jinallataq warmikunatapas.+ Ichaqa manan pitapas wañuchisqakuchu. 3 Davidwan runankunawan Ziclag llaqtaman chayanankupaqqa lliumi chay llaqtaqa ninawan kanaykusqa kapushasqa. Esposankuta, churinkuta, ususinkuta iman ichaqa presota apapusqaku. 4 Chaymi Davidqa runankunantin qaparisparaq khuyayta waqaykurqanku. Paykunaqa mana atinankukaman sinchita waqaykurqanku. 5 Davidpa iskaynin esposankunatapas apapullasqakutaqmi; paykunan karqanku Jezrel llaqtayoq Ainoan, Carmelo llaqtayoq Nabalpa viudan Abigailpiwan.+ 6 Davidpa runankunaqa sinchi phiñasqan kasharqanku churinkuta ususinkuta apapusqankumanta, chaymi rimanakusharqanku rumiwan ch’aqespa Davidta wañuchinankupaq, chayraykun Davidqa sinchi llakisqa kasharqan. Ichaqa Jehová Diospa yanapaynintan mañakurqan kallpachasqa kananpaq.+

7 Jinan Davidqa Aimelecpa churin Abiatarta+ nirqan: “Ama jinachu kay, sacerdote unkuta* apamuway”,+ nispa. Abiatartaq sacerdote unkuta Davidman aparqan. 8 Jinan Davidqa Jehová Diosta tapurqan:+ “¿Qatipasaqchu chay suwakunata? ¿Ayparuymanraqchu?”, nispa. Diostaq kutichirqan: “Arí rillay, ayparunkin, jinaspapas lliu apasqankutan kutichikampunki”,+ nispa.

9 Chayta niqtin jinan Davidqa soqta pachaj runankunantin+ usqhaylla qatiparqanku. Jinan Besor wayq’oman chayarqanku, chaypin wakin runankunaqa qhepakurqanku. 10 Davidqa tawa pachaj runankunantinmi qatiparqanku, iskay pachaj runankunataq qhepakurqanku Besor wayq’ota chimpanankupaq sinchi sayk’usqa kasqankurayku.+

11 Davidpa runankunan qatipashaspanku Egipto llaqtayoq runata tarirqanku, jinaspa Davidman aparqanku. Chay runamanmi mijunata, unutawan qorqanku. 12 Chaymantapas qollarqankutaqmi pasasmanta iskay tortakunata, juj chhikan ch’akisqa higos tortatawan,* chayta mijuspan chay runaqa kallpata jap’irqan. Payqa kinsa p’unchay kinsa tutan mana imatapas mijusqachu nitaq unutapas ujasqachu. 13 Jinan Davidqa chay runata tapurqan: “¿Maymantan kanki? ¿Piqpa kamachinmi kanki?”, nispa. Chay runataq nirqan: “Noqaqa Egiptomantan kani, Amalec runaq kamachin. Kinsa p’unchayñan onqosqa kashani, chaymi patronniy wijch’upuwan. 14 Noqaykun suwaq phawaykurqayku keretita runakunaq+ jallp’anpa uray ladonta, Caleb+ runakunaq jallp’anpa uray ladonta, Judá ayllutawan. Chaymantapas Ziclag llaqtatan ninawan kanaykamurqayku”, nispa. 15 Chayta niqtinmi Davidqa nirqan: “¿Pusawankimanchu chay suwakunaq kasqanman?”, nispa. Chay runataq nirqan: “Sichus Diospa sutinpi jurawanki ama wañuchiwanaykipaq, patronniymanpas ama entregawanaykipaq chayqa pusasaykin chay runakunaq kasqanman”, nispa.

16 Jinan chay runaqa Davidta pusarqan chay runakunaq kasqanman. Chay runakunaqa lliu pampantinpin mijuspa ujaspa kashasqaku. Paykunaqa Filistea runakunamanta, Judá ayllu runakunamanta imaymanata qechumusqankuraykun fiestata ruwaykushasqaku. 17 Jinan Davidqa chay runakunaman phawaykurqan, jinaspa paykunawan maqanakurqan illarimuymanta tutayanankama. Lliutan wañuchirqanku,+ tawa pachaj Amalec runakunallan camellopi sillaykusqa ayqekurqanku. 18 Davidqa Amalec runakunaq apasqankutan lliuta qechukampurqan,+ jinallataq iskaynin esposankunatapas pusakampurqan. 19 Manan pipas faltarqanchu, jatunpas juch’uypas kutimpurqanmi. Churinkutapas ususinkutapas pusakampurqankun, jinallataq tukuy kaqninkunatapas apakampurqanku.+ Davidqa Amalec runakunaq lliu apasqantan kutichimpurqan. 20 Chaymantapas Davidqa chay runakunaq ovejankuta wakankuta iman lliuta jap’ikapurqan. Chay uywakunatan Davidpa runankunaqa uywankunaq ñaupanta qatimurqanku. Paykunan nisharqanku: “Kayqa Davidpa qechumusqanmi”, nispa.

21 Jinan Davidqa iskay pachaj runankuna maypichus qhepakurqanku chayman kutirqan. Chay runakunaqa Besor wayq’opin qhepakurqanku sinchi sayk’usqa kasqankurayku.+ Wakin runakunapiwan David jamushasqanta rikuspataq chay qhepakuq runakunaqa aypaq lloqsirqanku. Jinan Davidqa paykunata tapurqan imayna kashasqankuta. 22 Ichaqa Davidwan riq wakin runakunaqa millay runakunan karqanku, paykunan ninakusharqanku: “Paykunaqa manamá yanapawanchischu riki. Qechumusqanchismantaqa ama imatapas qosunchu. Esposankuta wawankuta imalla apakapuchunku, jinaspa ripuchunku”, nispa. 23 Davidmi ichaqa nirqan: “Wayqeykuna, ama chaytaqa ruwaychischu, chaykunataqa Jehová Diosmá riki qoshawanchis. Jinaspapas paymi cuidawarqanchis, paytaqmi suwawaqninchis runakunatapas makinchisman entregawarqanchis.+ 24 Sichus chhayna millayta paykunamanta rimankichis chayqa manan pipas kasusunkichischu. Tukuy apamusqanchismantaqa lliumi igualta chaskinqa; maqanakuq riqkunapas, kaypi q’epita qhawaspa qhepakuqkunapas.+ Lliumanmi igualta rakikunqa”,+ nispa. 25 Chay p’unchaymantapachan Davidqa Israelpi chay ruwayta kamachikuyta jina churarqan. Chaymi chay kamachikuyqa kunankamapas chhaynallapuni kashan.

26 Ziclag llaqtaman kutimuspataq Davidqa qechumusqankumanta wakinta apachirqan Judá ayllupi kaq umalliqkunaman.* Chay umalliqkunaqa Davidpa amigonkunan karqanku, paykunatan nirqan: “Kay regalotan* apachimushaykichis, kaykunatan qechumuyku Jehová Diospa enemigonkunamanta”, nispa. 27 Davidqa kay llaqtakunapi kaq umalliqkunamanmi regalota apachirqan: Betelpi+ kaqkunaman, Neguebpi* kaq Ramoj llaqtapi kaqkunaman, Jatir+ llaqtapi kaqkunaman, 28 Aroer llaqtapi kaqkunaman, Sifmoj llaqtapi kaqkunaman, Estemoa+ llaqtapi kaqkunaman, 29 Rajalpi kaqkunaman, Jeramel runakunaq+ tiyasqan llaqtakunapi kaqkunaman, quenita runakunaq+ tiyasqan llaqtakunapi kaqkunaman, 30 Ormá+ llaqtapi kaqkunaman, Borasanpi kaqkunaman, Atac llaqtapi kaqkunaman, 31 Hebrón+ llaqtapi kaqkunaman ima. Jinallataq maykunapichus David runankunapiwan pakakurqanku chay llaqtakunapi kaq umalliqkunamanwan.