2 Reyes
13 Ocoziaspa+ churin Jehoás+ iskay chunka kinsayoq wataña Judá ayllupi kamachikushaqtinmi Jehupa+ churin Jehoacazqa Israelpi kamachikuyta qallarirqan, chunka qanchisniyoq watataqmi Samaria llaqtamanta Israelta kamachirqan. 2 Jehoacazqa Jehová Diospa cheqnisqan ruwaykunatan ruwarqan, payqa imaynatachus Nebajpa churin Jeroboán Israel runakunata juchallichirqan chay juchakunatan ruwallarqantaq.+ 3 Chayraykun Jehová Diosqa Israel runakunapaq sinchita phiñakurqan,+ chaymi paykunata entregarqan Siria rey Azaelpa+ makinman Azaelpa churin Ben-Adajpa+ makinmanwan.
4 Watakuna qhepamanmi Jehoacazqa Jehová Diospa yanapayninta rogakurqan. Jehová Diosqa rikumusharqanmi imaynatachus Siria rey Israel runakunata ñak’arichishasqanta,+ chaymi Jehoacazpa rogakusqanta uyarirqan. 5 Jinan Jehová Diosqa Israel runakunaman juj libraqta kachamurqan,+ paymi Siria runakunaq makinmanta librarqan; chhaynapin paykunaqa ñaupaqpi jina thajpi tiyapurqanku. 6 (Chaywanpas Jeroboanpa familian jinan Israel runakunaqa juchallikushallarqanku.+ Paykunaqa imaynatachus Jeroboán Israel runakunata juchallichirqan chay juchakunatan ruwashallarqanku, yupaychana sayashaq k’ullupas*+ kaqllan Samaria llaqtapi sayasharqan). 7 Siria reyqa yaqan Israel runakunata ch’usaqman tukuchirqan,+ imaynan trigota eraspa polvotaraq sayarichinku jinata,+ chaymi Jehoacazpa soldadonkunaqa chunka waranqallaña kapurqan, caballopi sillaykusqa soldadonkunataq pisqa chunkallaña, carretankunataq chunkallaña.
8 Jehoacazpa kausayninmanta wakin willakuykunapas, atiyninwan ruwasqankunapas, lliu ruwasqankunapas Israel reykunamanta willaq libropin qelqasqa kashan. 9 Chaymantataq Jehoacazqa ñaupa taytankuna jina wañukapurqan, jinaspa Samaria llaqtapi p’ampapurqanku.+ Chay qhepamantaq churin Jehoás rey kapurqan.
10 Kinsa chunka qanchisniyoq wataña Judá ayllupi Jehoás+ kamachikushaqtinmi Jehoacazpa churin Jehoasqa Israelpi kamachikuyta qallarirqan, chunka soqtayoq watataqmi Jehoasqa Samaria llaqtamanta kamachikurqan. 11 Jehoasqa Jehová Diospa cheqnisqan ruwaykunatan ruwarqan, payqa imaynatachus Nebajpa churin Jeroboán Israel runakunata juchallichirqan chay juchakunatan ruwallarqantaq.+
12 Jehoaspa kausayninmanta wakin willakuykunapas, atiyninwan ruwasqankunapas, Judá rey Amasiaswan+ maqanakusqanpas lliumi Israel reykunamanta willaq libropi qelqasqa kashan. 13 Chaymantataq Jehoasqa ñaupa taytankuna jina wañukapurqan, jinaspa Israel reykunawan kuskata Samaria llaqtapi p’ampapurqanku.+ Chay qhepamantaq churin Jeroboán+ Israelpi rey kapurqan.
14 Profeta Eliseon+ onqopurqan jinan chay onqoywan wañukapurqan. Ichaqa onqosqallaraq kashaqtinmi Israel rey Jehoás pay watukuq rirqan. Jinan waqaykuspa pay pataman k’umuykurqan, jinaspa nirqan: “¡Taytalláy! ¡Taytalláy! ¡Kayqa Israelpa carretanmi caballopi sillakuqninkunapiwan!”,+ nispa. 15 Jinan Eliseoqa nirqan: “Apamuy juj flechana arcota iskay kinsa flechakunatawan”, nispa. Chaymi payqa juj flechana arcota apamurqan iskay kinsa flechakunatawan. 16 Chaymantataq Eliseoqa Israel rey Jehoasta nirqan: “Flechanaykipaq jina chay flechana arcota jap’iy”, nispa. Flechana arcota jap’iqtintaq Eliseoqa Jehoaspa makin pataman makinta churaykurqan. 17 Jinaspataq Eliseoqa nirqan: “Inti lloqsimuy ladoman qhawaq ventanata kichay”, nispa. Chay ventanata kichaqtintaq Eliseoqa nirqan: “¡Kunanqa flechay!”, nispa. Jinan Jehoasqa chay ventananta jawaman flecharqan. Chaymantataq Eliseoqa nirqan: “¡Kayqa Jehová Diospa atipanan flechan! ¡Kay flechawanmi payqa Siria runakunata atipanqa!”, nispa. Chaymantataq Jehoasta nirqan: “Qanmi Afec+ llaqtapi Siria runakunata ch’usaqyachinaykikama atipanki”, nispa.
18 Chaymantapas nillarqantaqmi: “Chay flechakunata jap’iy”, nispa. Chay flechakunata jap’iqtintaq Eliseoqa nirqan: “Chay flechakunawan pampata waqtay”, nispa. Jinan Israel rey Jehoasqa kinsa kutillata pampata waqtarqan. 19 Chaymi profeta* Eliseoqa reypaq phiñakurqan, jinaspa nirqan: “¿Imaraykun kinsa kutillata pampata waqtarqanki? Pisqa kutita otaq soqta kutita waqtawaq karqan chayqa chinkachinaykikaman Siria runakunata atipawaq karqan. Ichaqa kinsa kutillata waqtasqaykiraykun kinsa kutillata Siria runakunata atipanki”,+ nispa.
20 Chaymantataq Eliseoqa wañukapurqan, jinaspa p’ampapurqanku. Sapa watanmi wata qallariyta jina Moab+ runakunamanta suwa t’aqa soldadokuna Israelman jaykumuqku. 21 Juj p’unchaymi runakuna wañusqa runata p’ampasharqanku, jinan rikurqanku suwa t’aqa soldadokuna jamushaqta, chaymi manchakuymanta chay wañusqa runata Eliseoq sepulturanman wijch’uykuspa ayqekurqanku. Chay wañusqa runaq cuerpon Eliseoq tullunkunata tupaykuqtintaq chay wañusqa runaqa kausarimpurqan,+ jinaspan sayarirqan.
22 Jehoacazpa lliu kamachikusqan tiempopin Siria rey Azaelqa+ Israel runakunata ñak’arichirqan.+ 23 Jehová Diosmi ichaqa Israel runakunata khuyapayarqan+ Abrahanwan,+ Isaacwan,+ Jacobwan+ rimanakusqanrayku. Chaymi paykunataqa mana chinkachirqanchu, kunankamataqmi paykunallawanpuni kashan. 24 Siria rey Azael wañupuqtinqa churin Ben-Adajmi Siriapi rey kapurqan. 25 Ben-Adajpa taytan Azaelmi Jehoaspa taytan Jehoacazmanta Israelpi kaq llaqtakunata qechurqan, chay llaqtakunatan Jehoasqa Ben-Adajmanta lliuta qechukapurqan. Jehoasqa kinsa kutipi+ Ben-Adajta atipaspan chay llaqtakunata qechukapurqan.