2 Crónicas

25 Amasiasqa iskay chunka pisqayoq watanpi kashaspan kamachikuyta qallarirqan, iskay chunka isqonniyoq watataqmi Jerusalenmanta kamachikurqan. Paypa mamanmi karqan Jerusalén llaqtayoq Jehoadán.+ 2 Amasiasqa Jehová Diospa munasqanman jinan ruwarqan, ichaqa manan tukuy sonqowanchu. 3 Kamachikuynin allin tajyasqa kaqtin jinataq Amasiasqa papan wañuchiq runakunata wañuchipurqan.+ 4 Chay runakunaq churinkunatan ichaqa mana wañuchirqanchu. Payqa Moisespa qelqasqan kamachikuy simiman jinan ruwarqan, chaypin Jehová Diosqa kamachikurqan: “Taytaqa manan churinpa juchallikusqanmantaqa wañuchisqachu kanan, nitaq churipas taytanpa juchallikusqanmantaqa wañuchisqachu kanan, aswanpas sapankan kikinkuq juchankumantaqa wañunanku”,+ nispa.

5 Amasiasmi Judá ayllumanta Benjamín ayllumanta llapa runakunata juñurqan. Jinan paypa ñaupanpi sayaykurqanku sapanka familiakuna, waranqa runakunaq umallinkuna, pachaj runakunaq umallinkunapiwan.+ Chaypin payqa iskay chunka watayoqmanta wichayman llapa qharikunata yuparqan,+ yupasqanpin tarirqan kinsa pachaj waranqa allin maqanakuq qharikunata. Chay qharikunaqa allintan yacharqanku lanzakunawan jark’apakuna jatun escudokunawan maqanakuyta. 6 Chaymantapas Amasiasqa pachaj waranqa allin kallpasapa soldadokunatan Israelmanta contratarqan, chay soldadokunamantataq pagarqan pachaj talento* pesaq qolqeta. 7 Ichaqa Diospa profetanmi jamuspa nirqan: “Reyníy, Jehová Diosqa manan Israel runakunatapas nitaq Efraín ayllu runakunatapas yanapanchu,+ chayrayku Israelmanta contratamusqayki soldadokunataqa ama pusaychu. 8 Aswanpas qan sapallayki ama manchakuspa maqanakuq riy, sichus paykunawan rinki chayqa Diosmi enemigoykiq makinman entregasunki. Diosqa atiyniyoqmi yanapananpaqpas+ urmachinanpaqpas”, nispa. 9 Chayta uyarispan Amasiasqa cheqaq Diospa profetanta nirqan: “¿Israel soldadokunaman pachaj talento pesaq qolqe qosqaytari pitaq kutichipuwanqa?”, nispa. Diospa profetantaq nirqan: “Jehová Diosqa chay qolqemantapas mastaraqmi qosunki”,+ nispa. 10 Jinan Amasiasqa Efraín ayllumanta jamuq soldadokunata wasinkuman kutichipurqan. Chaymi Efraín runakunaqa sinchi phiñasqa Judá ayllu runakunapaq kasharqanku, jinan wasinkuman phiñasqallaña kutipurqanku.

11 Chaymantataq Amasiasqa kallpachakurqan, jinaspa soldadonkunata Kachi wayq’oman pusarqan.+ Chaypin payqa chunka waranqa Seír runakunata wañuchirqan.+ 12 Chunka waranqa runakunatataq Judá ayllu runakunaqa kausashaqllata jap’imurqanku, jinan chay runakunata alto qaqa pataman apaspa tanqaykamurqanku, chhaynapin paykunaqa pampaman ñut’u chayarqanku. 13 Amasiaspa kutichipusqan Israel soldadokunataq+ Judá ayllupi kaq llaqtakunaman phawaykurqanku, paykunan Samariamanta+ Bej-Oronkama+ phawaykurqanku. Jinaspa kinsa waranqa runakunata wañuchirqanku, imaymana kaqninkutataq apapurqanku.

14 Edom runakunata wañuchisqanmanta kutimuspan Amasiasqa Seír runakunaq diosninkunata apamurqan, jinaspa diosninkunaman tukuchipurqan.+ Chaykunamanmi k’umuykurqan sacrificiokunatapas q’osñichirqan. 15 Chayraykun Jehová Diosqa Amasiaspaq sinchita phiñakurqan, jinan juj profetata payman kacharqan. Chay profetan Amasiasta nirqan: “¿Imaraykun chay runakunaq diosninkunaman k’umuykunki? ¿Acaso chay dioskuna makiykimanta chay runakunata salvarqanchu?”,+ nispa. 16 Chay profeta rimashallaqtinraqmi reyqa nirqan: “¡Upallay!+ ¿Pin qanta reypa yuyaychaqnin kanaykipaq ajllarqasunki?+ ¿Icha wañuytachu munanki?”, nispa. Chay profetan ichaqa nirqan: “Chaykunata ruwasqaykirayku yuyaychasqaytapas mana uyarisqaykiraykun Diosqa ña ninña wañunaykita”,+ nispa. Chayta nispan profetaqa manaña rimarqanchu.

17 Yuyaychaqnin runakunata tapuspataq Judá rey Amasiasqa Israel rey Jehoasman kay willakuyta apachirqan: “¡Jamuy noqawan maqanakuq!”,*+ nispa. Jehoasqa Jehoacazpa churinmi karqan, Jehoacaztaq Jehupa churin karqan. 18 Jinan Israel rey Jehoasqa Judá ayllu rey Amasiasman willachimurqan: “Juj kutinsi Líbano orqokunapi wiñaq kiskayoq qoraqa Líbano orqokunapi wiñaq cedro sach’aman willachisqa: Ususiykita qoway churiywan casarakunanpaq, nispa. Chayllamansi ichaqa Líbano orqokunapi tiyaq salqa animalqa chay kiskayoq qorata sarurapusqa. 19 Qanmi nishanki: Noqaqa Edom runakunatan atiparuni,+ nispa. Chayraykun qanqa jatunchakushanki runakunaq jatunchanantataq munashankipas. Chay runakunata atipasqaykimantaqa kusirikushallay, ichaqa wasillaykipi* qhepakuy, ¿imapaqtaq noqawanri maqanakuyta munanki atipachikunaykipaq? Llapa Judá ayllu runakunatachá sasachakuyman churawaq”, nispa.

20 Amasiasmi ichaqa mana kasukurqanchu.+ Diospunin chay pasanantaqa munarqan chhaynapi enemigonkunaman entregananpaq.+ Amasiastan enemigonkunaman entregayta munarqan Edom runakunaq diosninkunata yupaychasqanrayku.+ 21 Chaymi Israel rey Jehoasqa Judá ayllu rey Amasiaswan maqanakuq rirqan, jinaspa Judá ayllupi kaq Bej-Semes llaqtapi+ maqanakurqanku. 22 Chaypin Israel runakunaqa Judá ayllu runakunata atiparqanku, jinan Judá ayllu runakunaqa sapankanku wasinkuman* ayqekapurqanku. 23 Israel rey Jehoasmi ichaqa Judá ayllu rey Amasiasta Bej-Semes llaqtapi jap’irqan, jinaspa Jerusalén llaqtaman apamurqan. Amasiasqa Jehoaspa churinmi karqan, Jehoastaq Jehoacazpa* churin karqan. Jinan Jehoasqa Jerusalén llaqta perqata thunirqan Efraín Punku+ nisqamanta Esquina Punku+ nisqakama, chay thunisqan perqaqa yaqa pachaj pusaq chunka metron* karqan. 24 Jinan Diospa wasinmanta, reypa wasinpi* valorniyoq cosaskuna waqaychanamantawan llapanta aparqan qoritapas, qolqetapas, valorniyoq cosaskunatapas.+ Chay kutipiqa Obed-Edommi Diospa wasinta cuidarqan. Chaymantapas wakin runakunatan presota apallarqantaq. Chaymantataq Samaria llaqtaman kutipurqan.

25 Judá ayllu rey Jehoaspa churin Amasiasqa+ chunka pisqayoq watatawanraqmi kausarqan Israel rey+ Jehoacazpa churin Jehoaspa+ wañupusqan qhepamanqa. 26 Amasiaspa kausayninmanta wakin willakuykunaqa lliumi Judá ayllu reykunamanta Israel reykunamanta willaq libropi qelqasqa kashan. 27 Jehová Diosta Amasías saqepusqanmantapachan runakunaqa pay contra Jerusalén llaqtapi jatarirqanku,+ jinan payqa Lakís llaqtaman ayqekurqan. Chay llaqtaman ayqekuqtinpas qhepantan runakunata kachallarqankutaq, jinan chay llaqtapi wañuchipurqanku. 28 Chaymantataq caballopi Jerusalén llaqtaman apapurqanku, jinaspa ñaupa taytankunatawan kuskata Judá llaqtapi p’ampapurqanku.