2 Corintios
1 Diospa munayninpi Cristo Jesuspa apostolnin* noqa Pablon qelqamushaykichis iñiqmasinchis Timoteowan+ kuska qankuna Corinto llaqtapi kaq iñiq t’aqaman, jinallataq Acaya provinciapi+ kaq llapa iñiqmasikunamanwan.*
2 Qankunawan kachun Taytanchis Diospa, jinallataq Señor Jesucristoq ancha sumaq sonqo kaynin thaj kayninpas.
3 Jatunchasqa kachun Señorninchis Jesucristoq Taytan Diosqa;+ paymi may khuyapayakuq Taytaqa,+ tukuy ima llakipi kallpachaq Diospas.+ 4 Paymi tukuy imaymana pruebakunapi* kallpachawanchis,+ chhaynapi noqanchispas ima pruebapiña tarikuqkunatapas+ paypa kallpachayninwan kallpachananchispaq.+ 5 Imaynan noqanchisqa Cristoq* discipulon kasqanchisrayku imaymana ñak’ariypi tarikunchis,+ chhaynallataqmi Cristorayku imaymanapi kallpachasqa kanchis. 6 Chhaynaqa, ima pruebapiña kashayku chaypas, qankuna llakikuyniykichispi kallpachasqa kanaykichispaq, salvasqa kanaykichispaq iman chhayna kashayku. Noqaykuchus ima llakikuypipas kallpachasqa kashayku chayqa, qankuna kallpachasqa kanaykichispaqmi, chhaynapi qankunapas noqaykuq ñak’arisqayku ñak’ariykunata aguantanaykichispaq. 7 Chayraykun noqaykuqa allinta yachayku qankunaqa mana kuyurispa qaqa sayanaykichista; imaynan qankunaqa noqayku jina ñak’arishankichis, chhaynatan llakikuyniykichispipas noqayku jina kallpachasqa kankichis.+
8 Wayqeykuna,* Asia provinciapi ñak’arisqaykumantaqa yachanaykichistan munayku;+ chaypiqa sinchi sasachakuypin kasharqayku, manañan kallpaykupas karqanñachu, “kunanqa wañupullasunñachá” nisharqaykuraqmi.+ 9 Arí, wañupunallaykupaqñan piensakusharqayku; ichaqa chay pasasqaykuwanmi yacharqayku noqaykupi confianaykumantaqa wañusqakunata kausarichiq Diospi confiayta.+ 10 Paymi chhayna wañuy patapiña kashaqtiyku librawarqanku, qhepakunamanpas librawanqakupunin; noqaykuqa yachaykun payqa jayk’a kutitapas librawananku kasqanta.+ 11 Qankunapas yanapawankikumanmi noqaykupaq rogakuspa,+ chhaynapin askha runakuna Diosman graciasta qonqaku pay askha runakunaq mañakusqanta uyarispa sumaqta qhawariwasqankumanta.+
12 Noqaykuqa allin concienciayoqmi kashayku, kay pacha runakuna ukhupi kashaspa, astawanqa qankuna ukhupi kashaspa, ch’uya kaywan, Diosmanta jamuq ch’uya sonqo kaywan ima allinta kausasqaykurayku. Chaymantapas noqaykuqa manan kay pacha yachayman jinachu kausarqayku,+ aswanpas Diospa ancha sumaq sonqo kayninman jinan. Chaykunamantan noqaykuqa alabakuyku. 13 Noqaykuqa leey atiyllata, entiendey atiyllatan qelqamushaykichis; maytan munayman chaykunata entiendeshanallaykichista, 14 imaynan wakinniykichis entiendeshankichis jinata; arí, wakinniykichisqa entiendenkichismi noqaykuqa qankunaq alabakunaykichispaq kasqaykuta; noqaykupas alabakusaqkun qankunamanta Señorninchis Jesuspa p’unchayninpi.
15 Chayta allinta yachaspan noqaqa ñaupaqta qankunata watukuq jamuyta munasharqani, chhaynapi jujtawan* kusisqa kanaykichispaq. 16 Ichaqa Macedonia provinciaman riq jinan qankunawanqa tupayta munasharqani, chaymantataq Macedoniamanta qankunaman kutimuyta, chhaynapi Judeaman kachapuwanaykichispaq.+ 17 Qankunaman jamuyta munashaspaqa manan yanqallachu “jamusaq” nirqani; icha, ¿runaq piensasqanman jinalla imatapas qhawarinaypaqchu piensankichis? Noqaqa manan jayk’aqpas “arí, arí” nishaspaqa “manan, manan” niymanchu. 18 Diospi confiaychis, noqaykuqa cheqaqllatan nishaykiku, manan “arí” nishaspaykuqa “manan” niykumanchu. 19 Noqawan, Silvanowan,* Timoteopiwan+ qankunaman willasqayku Diospa Churin Jesucristopas manapunin “arí” nishaspaqa “manan” ninmanchu; paypa “arí” nisqanqa “arí” nisqallapunin kanqa. 20 Jayk’aña Diospa promesankuna karqan chaypas, llapanmi Jesuswan “arí” nisqa kapun,+ chaymi noqanchispas paypa sutinpi “amén”* ninchis,+ chhaynapi Dios jatunchasqa kananpaq. 21 Qankunapas noqaykupas Cristoqmi kasunchis, Diospunin chaytaqa prometen, paymi ajllawarqanchispas.+ 22 Chaymantapas paymi sellawarqanchis;+ arí, espirituntan+ sonqonchispi churarqan imakunachus chaskinanchismanta garantiata* jina.
23 Kunanqa Diospa ñaupanpin noqa kikiyrayku jurani; noqaqa qankuna ama astawan llakikunaykichisraykun mana Corinto llaqtata jamurqanichu. 24 Noqaykuqa manan iñiyniykichispi kamachikuqkunachu kayku,+ aswanpas kusisqa kanaykichispaq llank’aqmasiykichiskunallan kayku, qankunaqa iñiyniykichisraykun qaqata sayashankichis.