Deuteronomio
6 ”Kay kamachikuykunata leykunata iman Jehová Diosqa qankunaman yachachinaypaq qomuwarqan. Chay kamachikuykunaman jinan kausankichis maymanchus jaykunkichis chay jallp’apiqa. 2 Chhaynapin qankunapas wawaykichiskunapas nietoykichiskunapas tukuy tiempo Jehová Diosta manchakunkichis. Kasukunkichismi kay qosqay kamachikuykunatapas leykunatapas,+ chhaynapin unayta kausankichis.+ 3 Israel runakuna, llapan chay kamachikuykunatan makilla kasukunkichis, chhaynapin ñaupa taytaykichiskunaq Diosnin Jehová Diospa prometesqanman jina allillan imapas kasunkichis, askhataqmi kankichis maypichus lechepas mielpas askha kashan chay jallp’apiqa.
4 ”Israel runakuna, uyariychis, Jehová Diosninchisqa ch’ulla Jehová Diosllan.+ 5 Jehová Diosniykitan munakunki tukuy sonqoykiwan, tukuy almaykiwan,*+ tukuy kallpaykipiwan.+ 6 Llapa kay kamachisqaykunatan sonqoykipi waqaychanki. 7 Sapa kutillanmi chaykunata wawaykikunaman yachachinki,+ rimapayashallankipunin wasipi kaspapas, ñanpi purishaspapas, puñuykushaspapas, jatarispapas.+ 8 Makiykiman mat’iykiman iman chaykunata watakunki yuyarichinasuykipaq.+ 9 Wasiyki punku k’aspikunapi, llaqtayki punkukunapi iman chaykunata qelqanki.
10 ”Jehová Diosniykin ñaupa taytaykichis Abrahanman, Isaacman, Jacobmanwan prometesqan jallp’aman pusaykusunkichis,+ mana perqasqaykichis jatun llaqtakunaman, munay llaqtakunaman,+ 11 mana llank’asqaykichis askha mijuykunayoq wasikunaman, mana t’oqosqaykichis pozokunaman, mana plantasqaykichis uvas chajrakunaman, aceituna chajrakunamanwan. Chaykunata sajsata mijuspaykichistaq+ 12 Egiptomanta orqomuqniykichis Jehová Diosta qonqapuwaqchis,+ paqtataq esclavo kasqaykichismanta libraqniykichista qonqapuwaqchis. 13 Jehová Diosniykitan manchakunki,+ payllatan servinki,+ paypa sutinpin juranki.+ 14 Aman waj dioskunataqa servinkichischu, amapunin muyuriqniykichis llaqtakunapi runakunaq diosninkunataqa servinkichischu.+ 15 Qankuna ukhupi tiyaq Jehová Diosqa payllata servinatan munan.+ Sichus waj dioskunata servinkichis chayqa, sinchitan Jehová Diosniykichisqa qankunawan phiñakunqa,+ jinaspa kay pachamanta chinkachisunkichis.+
16 ”Aman Jehová Diostaqa pruebaman churankichischu+ imaynan Masá nisqapi churarqankichis jinataqa.+ 17 Jehová Diosniykichispa llapa imachus kamachisqankunata, yuyarichiyninkunata leyninkunatawanmi makilla kasukunkichis. 18 Jehová Diosniykichispa ñaupanpi imachus allin kaqtan ruwankichis, chhaynapin allillan imapas kasunkichis, jaykunkichismi Jehová Diosniykichispa ñaupa taytaykichiskunaman jurasqan jallp’amanpas.+ 19 Jehová Diospa prometesqanman jinan llapa enemigoykichiskunata chay jallp’amanta qarqonkichis.+
20 ”Jamuq tiempopi churiykichiskuna tapusunkichis: ¿Imaraykutaq Jehová Diosninchisri kay kamachikuykunata, leykunatapas, yuyarichiykunatapas qorqasunkichis?, nispa chayqa, 21 ninkichismi: Noqaykuqa Egiptopin faraonpa* esclavonkuna karqayku, chaymantan Jehová Diosqa atiyninwan orqomuwarqanku. 22 Rikushaqtiykun Jehová Diosqa Egiptoman chayachimurqan manchakuy jatun señalkunata, milagrokunatawan;+ faraonman wasinpi kaq runakunaman iman chaykunataqa chayachirqan.+ 23 Chaymanta orqomuspan payqa kay jallp’aman apamuwarqanku, kay jallp’atan payqa ñaupa taytanchiskunaman prometesqa.+ 24 Chhaynapin Jehová Diosqa kay kamachikuykunata qowarqanku. Jehová Diosqa payta manchakunaykupaq iman kamachiwarqanku chhaynapi allillan kananchispaq,+ kausananchispaq ima.+ Chaymi kunankama allillan kausashanchis. 25 Sichus Jehová Diosninchista kasukuspa kay kamachikuyninkunata makilla junt’asun chayqa, chaninpaq jap’isqan kasunchis,+ nispa.