Hechos
18 Chaymantataq payqa Atenas llaqtamanta ripuspa Corinto llaqtaman chayarqan. 2 Chay llaqtapin tuparqan Ponto ladomanta Áquila+ sutiyoq judío runawan esposan Priscilapiwan, paykunaqa Italia llaqtamantan chayllaraq chayamusqaku rey Claudio “llapa judiokunan Romamanta ripunanku” nispa kamachikusqanrayku. Jinan Pabloqa paykunaqta rirqan, 3 paykunapas karpakuna ruwaqmi kasqaku, chaymi paykunaq wasinpi qhepakurqan paykunawan kuska llank’aspa.+ 4 Ichaqa sapa samana p’unchaymi*+ sinagogapi+ yachachispa judiokunaq griegokunaq imaynachus piensasqankuta cambiachiq, chhaynapi iñinankupaq.
5 Silaswan+ Timoteowan+ Macedoniamanta chayamuqtinkun ichaqa Diospa siminmanta willaspallaña Pabloqa purirqan, judiokunamanmi sut’inta rikuchirqan Jesusqa Cristopuni kasqanta.+ 6 Paykunan ichaqa contranpi churakuqku millaytataq k’amiqkupas. Chaymi Pabloqa p’achanta chhafchirparispa+ paykunata nirqan: “Qankunamantachá kanqa imapas pasasunkichis chayqa,*+ noqaqa manan ima juchayoqpaschu kasaq.+ Kunanmantaqa waj nacionkunamanta runakunamanmi ripusaq”,+ nispa. 7 Jinaspan payqa chaymanta* ripuspa Diosta adoraq Ticio Justo sutiyoq runaq wasinpi yachachiyta qallarirqan, paypa wasinqa sinagogaq ladollanpin kasharqan. 8 Sinagogapi umalli Crispo+ sutiyoq runan ichaqa Señorpi iñipurqan wasinpi llapa kaqkunapiwan. Corinto llaqtayoq runakunapas allin willakuykunata uyarispan askha iñipurqanku, jinaspa bautizakapurqanku. 9 Tutapin Señorqa juj rijuriypi Pablota nirqan: “Ama manchakuychu, aswanpas rimashallay ama upallaspa, 10 noqaqa qanwanmi kashani,+ manan pipas imanasunkipaschu; kay llaqtapiqa askhan noqapi iñinqaku”, nispa. 11 Chaymi payqa wata soqta killata chaypi tiyarqan Diospa siminta runakunaman yachachispa.
12 Acaya provinciapi Galión kamachikuq kashaqtinmi judiokunaqa rimanakuspanku Pablo contra jatarirqanku, jinaspa juzgana wasiman aparqanku, 13 chaypin nirqanku: “Kay runan runakunata yachachishan leykunata p’akispa jujniraymanta Diosta adoranankupaq”, nispa. 14 Pablo rimarinanpaqña kashaqtinmi Galionqa judiokunata nirqan: “Yau judío runakuna, kay runachus ima mana chanintapas ima jatun juchatapas ruwanman karqan chayqa, pacienciawanmi uyariykichisman. 15 Ichaqa ima rimaymantachus, runakunamantachus, kamachikuyniykichiskunamantachus kay quejakusqaykichis kashan chayqa,+ manan chaykunamantaqa juzgayta atiymanchu, qankunañachá chaytaqa yachakunkichis”, nispa. 16 Jinaspan juzgana wasimanta paykunata qarqorqan. 17 Jinan paykunaqa sinagogapi umalli Sósenes+ sutiyoq runata jap’ispa juzgana wasiq ñaupanpi llapanku maqayta qallarirqanku. Galionqa manan reparaqpas tukurqanchu chaykuna ruwasqankutaqa.
18 Pabloqa askha p’unchaykunatawanraqmi chaypi qhepakurqan, chaymantataq iñiqkunamanta despedikapurqan, jinaspa Priscilawan Aquilapiwan barcoman seqaspa Siria provinciaman rirqanku. Cencreas llaqtapin+ payqa chujchanta q’alata rutuchikurqan, Diosman juj promesata ruwasqanrayku. 19 Éfeso llaqtaman chayaspankutaq Pabloqa paykunata chaypi saqespa sinagogaman jaykurqan, jinaspa allinta piensachispa judiokunata yachachirqan.+ 20 Astawanraq qhepakunanpaq nisharqanku chaypas, payqa manan munarqanchu, 21 aswanpas despedikuspan nirqan: “Jehová* Dios munaqtinqa wajmantan qankunaman kutimusaq”, nispa. Jinaspa barcoman seqaspa Éfeso llaqtamanta 22 Cesarea llaqtaman rirqan. Jinaspa Jerusalén llaqtata wicharqan iñiq t’aqata napaykuq, chaymantataq Antioquía llaqtaman rirqan.+
23 Chaypi juj tiempo qhepakuspataq llaqtan-llaqtanta purirqan Galacia provinciantinpi Frigia provinciantinpi+ llapa iñiqkunata kallpachaspa.+
24 Éfeso llaqtamanmi chayamurqan Alejandría llaqtayoq judío runa, paypa sutinmi kasqa Apolos;+ payqa allin rimaqmi kasqa, allintataqmi Diospa simin qelqamantapas yachasqa. 25 Paymanqa allintan yachachisqaku Jehová* Diospa ñanninta. Paymi santo espirituwan junt’a kaspa tukuy sonqowan, iman kaqtapuni Jesusmanta willasharqan yachachisharqan, ichaqa Juanpa yachachisqan bautismollamantan yachasqa. 26 Chaymantapas sinagogapin payqa tukuy sonqowan rimayta qallarirqan, payta uyarispan Priscilawan Aquilawanqa+ juj ladoman pusarqanku, jinaspa aswan allinta entiendechirqanku Diospa ñanninta. 27 Payqa Acaya provinciamanmi riyta munasharqan, chaymi iñiqkunaqa juj cartata qelqarqanku chaypi kaq iñiqkunapaq, chhaynapi Apolosta sumaqta chaskinankupaq. Chayman chayaspan payqa allinta yanaparqan Diospa ancha sumaq sonqo kayninpi iñiqman tukuqkunata; 28 llapa runaq ñaupanpin payqa tukuy sonqowan rimaspa allintapuni rikuchirqan judiokunaqa pantasqa kashasqankuta; Diospa simin qelqawanmi sut’itapuni rikuchirqan Jesuspuni Cristo kasqanta.+