Marcos

9 Paykunatan nillarqantaq: “Cheqaqtan niykichis: Kaypi sayashaqkunamanta wakinqa manapunin wañunqakuchu ñaupaqta Diospa gobiernonta jatun atiywan churasqa kasqanta rikunankukama”,+ nispa. 2 Soqta p’unchay qhepamantaq Jesusqa Pedrota, Santiagota, Juantawan juj alto orqoman pusarqan. Jinan paykunaq ñaupanpi Jesuspa rijch’ayninqa jujnirayman tukurqan,+ 3 jawa p’achankunapas yuraqllatañan k’ancharirqan; kay pachapiqa manan pi p’acha t’aqsaqpas p’achataqa chhaynata yuraqyachiyta atinmanchu. 4 Chaypin paykunaqa rikurqanku Eliasta Moisestawan Jesuswan rimashaqta. 5 Jinan Pedroqa Jesusta nirqan: “Yachachikuq,* noqaykupaqqa ancha allinmi kaypi kasqaykuqa. Kinsa karpakunata ruwarusaqku, jujta qanpaq, jujta Moisespaq, jujtataq Eliaspaq”, nispa. 6 Paykunaqa sinchi mancharisqan kasharqanku, chaymi Pedroqa mana ima ruwaytapas atisharqanchu. 7 Chayllamanmi chaypi phuyu phuyuchakurqan, jinaspa paykunata pakaykurqan, phuyu ukhumantataq juj kunka+ nimurqan: “Kaymi munakusqay Churiyqa,+ payta uyariychis”,+ nispa. 8 Muyuriqninkuta qhawarispankutaq manaña pitapas rikurqankuñachu, aswanpas Jesusllataña.

9 Orqomanta uraykamushaqtinkun Jesusqa allin-allinta paykunata kamachirqan, runaq Churin wañusqanmanta jatarimpunankama+ imachus rikusqankuta ama pimanpas willanankupaq.+ 10 Paykunaqa kasukurqankun* Jesuspa chay nisqanta, ichaqa paykunapuran ninakurqanku: “¿Imaninantataq nishan wañusqanmanta jatarimunankama nispari?”, nispanku. 11 Chaymantataq Jesusta tapurqanku: “¿Imaraykutaq kamachikuy simita yachachiqkunari, Eliasraqmi+ ñaupaqtaqa jamunan, ninku?”,+ nispa. 12 Jinan Jesusqa nirqan: “Arí, Eliasqa ñaupaqtan jamunqa, paymi tukuy imatapas allichanqa,+ ichaqa ¿imaynapin chay tupan runaq Churin imaymanapi ñak’arinanmanta+ pisichasqa kananmantapas+ qelqasqa kasqanwan? 13 Noqan niykichis: Eliasqa+ ñan jamurqanña, tukuy ima munasqankutataqmi paytaqa ruwarqankupas, paymanta qelqasqa kasqanman jina”,+ nispa.

14 Wakin discipulonkunaq kasqanman qayllaykunankupaqmi askha runakuna paykunaq muyuriqninpi kasharqanku, kamachikuy simita yachachiqkunapas chaypin paykunawan discutisharqanku.+ 15 Jesusta rikuruspankutaq runakunaqa anchata admirakurqanku, jinaspa payta napaykuq phawarirqanku. 16 Jesustaq paykunata tapurqan: “¿Imamantan paykunawan discutishankichis?”, nispa. 17 Jinan runakuna ukhumanta jujnin nimurqan: “Yachachikuq, wawaymanmi junt’aykun upayachiq espíritu,+ chaymi qanman apamurqayki. 18 Maypiña jap’ispapas pampamanmi wijch’un, jinan wawayqa phosoqota aqtumun kirunkunatapas k’achachachin, manataq kallpanpas kanchu. Discipuloykikunatan nini chay espirituta qarqonankupaq, ichaqa manan atinkuchu”, nispa. 19 Jinan Jesusqa nirqan: “Yau mana iñiyniyoq runakuna,+ ¿jayk’aqkaman qankunawan kasaq? ¿Jayk’aqkaman aguantasaykichis? Pusamuwaychis chay waynachata”,+ nispa. 20 Jinan payman pusamurqanku, chay espiritutaq Jesusta rikuspa jina waynachata ataquewan jap’ichispa pampaman wijch’urqan, chaymi waynachaqa phosoqota aqtuspa qhospakacharqan. 21 Jesustaq taytanta tapurqan: “¿Jayk’aqmantapachan khayna kashan?”, nispa. Taytantaq nirqan: “Juch’uychanmantapachan. 22 Sapa kutillanmi chay espirituqa wañuchiyta munaspa ninamanñataq unumanñataq wijch’uykun. Imallatapas ruwayta atinki chayqa, khuyapayaykuwayku jinaspa yanapaykuwayku”, nispa. 23 Jesustaq nirqan: “¿Imanaqtinmi ninki: Atinki chayqa, nispa? Iñiqpaqqa tukuy imapas atikunmi”,+ nispa. 24 Jinan erqechaq taytanqa kaq ratu fuerteta nirqan: “¡Iñinin! ¡Yanapaykuway astawan iñinaypaq!”,+ nispa.

25 Jinan Jesusqa askha runakuna phawaylla jamushasqanta reparaspa chay millay espirituta phiñarikuspa nirqan: “Yau upayachiq roqt’uyachiq espíritu, noqan kamachiyki: Lloqsiy paymanta, amañataq jayk’aqpas paymanqa jaykunkichu”,+ nispa. 26 Jinan chay espirituqa qaparkachaspa ataquewan jap’ichispa ima chay waynachamanta lloqsirqan, waynachataq wañusqa jina karqan, chaymi yaqa llapa runakuna “¡wañurapunmi!” nirqanku. 27 Jesustaq makinmanta jap’ispa aysarirqan, jinan waynachaqa jatarirqan. 28 Juj wasiman jaykuqtintaq discipulonkunaqa Jesusta sapaqllapi tapurqanku: “¿Imanaqtintaq noqaykuri mana qarqoyta atirqaykuchu?”,+ nispa. 29 Jinan Jesusqa nirqan: “Chhayna espiritukunataqa Diosmanta mañakuspallan qarqokun”, nispa.

30 Chaymanta lloqsispataq Galilea provincianta purirqanku, Jesusqa manan piqpa yachanantapas munarqanchu. 31 Payqa discipulonkunata yachachishaspan nirqan: “Runaq Churinqa enemigonkunaq makinmanmi jap’ichisqa kanqa, paykunan wañuchinqaku,+ ichaqa wañuchinqakuña chaypas, kinsa p’unchaymantan kausarimpunqa”,+ nispa. 32 Discipulonkunan ichaqa mana chay nisqanta entienderqankuchu, manchakurqankutaqmi tapuytapas.

33 Chaymantataq Capernaún llaqtaman chayarqanku. Jinan wasipi kashaspaña Jesusqa paykunata tapurqan: “¿Imamantan ñanpi discutimusharqankichis?”,+ nispa. 34 Paykunataq ch’inlla karqanku, mayqenninkuchus kuraq kasqankumanta ñanpi discutimusqankurayku. 35 Jinan Jesusqa tiyaykuspa chunka iskayniyoq apostolninkunata wajaspa nirqan: “Pipas jatun kayta munaqqa llapamanta aswan juch’uymi kanan, llapata serviqtaq kananpas”,+ nispa. 36 Juj erqechata wajaspataq chaupinkupi sayaykachirqan, abrazaykuspataq paykunata nirqan: 37 “Pipas khayna wawata sutiypi chaskiqqa+ noqatawanmi chaskiwan, pipas noqata chaskiwaqqa manan noqallatachu chaskiwan, aswanpas kachamuwaqniytawanmi chaskin”,+ nispa.

38 Juanmi Jesusta nirqan: “Yachachikuq, juj runatan rikumuyku sutiykipi supaykuna qarqoshaqta, chaymi payta jark’arqayku mana noqanchiswanchu purisqanrayku”,+ nispa. 39 Jinan Jesusqa nirqan: “Aman paytaqa jark’ankichischu, manan pipas sutiypi ima milagrotapas* ruwaqqa chay qhepallaman contraypi mana allinta rimanmanchu, 40 pipas mana contranchispichu kaqqa noqanchiswanmi kashan.+ 41 Pipas Cristoq kasqaykichisrayku juj vaso unuta jaywarisunkichis chayqa,+ manapunin premiontaqa chinkachinqachu.+ 42 Pitaqchus noqapi iñiq kay juch’uykunamanta jujninta urmachinman* chayqa, aswan allinmi paypaqqa kanman asnoq muyuchisqan molino rumita kunkanman warkuruspa lamar-qocha ukhuman wijch’uykusqa kaynin.+

43 ”Makiykichus juchaman urmachisunkiman chayqa, wit’urukuy; aswan allinmi qanpaqqa kanman ch’ulla makillayoq kausayman jaykuy iskay makintin Gehenaman* wijch’uykusqa kanaykimantaqa, chayqa mana jayk’aq wañuq ninan.+ 44 *—— 45 Chakiykitaqchus juchaman urmachisunki chayqa, wit’urukuy; aswan allinmi qanpaqqa kanman ch’ulla chakillayoq kausayman jaykuy iskay chakintin Gehenaman wijch’uykusqa kanaykimantaqa.+ 46 *—— 47 Ñawiykitaqchus juchaman urmachisunki chayqa, orqorparikuy;+ aswan allinmi qanpaqqa kanman ch’ulla ñawillayoq Diospa gobiernonman jaykuy iskay ñawintin Gehenaman wijch’uykusqa kanaykimantaqa,+ 48 chaypiqa manan kurupas wañunchu, ninapas manallataqmi wañunchu.+

49 ”Llapallankun ninawan kachichasqa kananku.*+ 50 Kachiqa ancha allinmi, ichaqa kachichus q’aymayapunman chayqa, ¿imaynapin wajmanta kachiman tukuchiwaqchis?+ Qankuna kikiykichis kachiyoq kaychis,+ jujkuna-jujkunawantaq sumaqta kausaychis”,+ nispa.