Gálatas

6 Wayqeykuna,* yaqapaschá pipas mana reparakuspa imapipas pantanman, chhaynaña kaqtinpas, qankuna iñiypi allin poqosqa kaqkuna llamp’u sonqollawan chay runata yanapaychis.+ Ichaqa sapankaykichis allinta qhawarikuychis,+ chaytaq qankunapas tentasqa kawaqchis.+ 2 Jujkuna-jujkunawan yanapanakuychis q’epiykichista apaypi,+ chhaynapin junt’ankichis Cristoq kamachikuyninta.+ 3 Pipas mana imapas kashaspa imapas kanman jinapaqraq creekun chayqa,+ pay kikintan engañakushan. 4 Chayrayku sapanka qhawarikuchun imaynas kashan imapas ruwasqankuna chayta,+ chhaynapi ama jujwan igualakuspachu kusikunanpaq,+ aswanpas paypa imachus ruwasqanwan kusikunanpaq. 5 Sapankan apanan q’epitaqa apanqa.*+

6 Pipas Diospa siminmanta yachashaqqa yachachiqninwan tukuy allin kaqkunata qonakuchun.+

7 Ama engañakuychischu: Dioswanqa manan pipas pujllakunmanchu. Imatachus runaqa tarpunqa chayllatataqmi cosechanqapas.+ 8 Aychaq munasqanman jina tarpuqqa mana allin kaqtan chay tarpusqanmanta cosechanqa, espirituq munasqanman jina tarpuqmi ichaqa wiñay kausayta cosechanqa.+ 9 Chhaynaqa kallpachakushallasun allin kaqta ruwanapaq, mana pisipaspa chayta ruwashallasun chayqa, tiempollanpin cosechasun.+ 10 Chayrayku, atishaspaqa lliupaq imachus allin kaqta ruwapusun, astawanqa iñiqmasinchiskunapaq.

11 Kay cartataqa noqa kikiymi qelqamushaykichis; qhawariychis may jatun letrakunawanchus qelqamushaykichis chayta.

12 Runakunaq allin qhawarisqan kayta munaqkunan qhari kayniykichis qaracha kuchuchikunaykichistaqa munashanku, chaytaqa ruwashanku Cristorayku* mana qatikachasqa kayta munaspankun. 13 Paykunaqa qhari kayninku qarachataña kuchuchikunku chaypas, manan waqaychankuchu kamachikuy simitaqa,+ aswanmi paykunaqa qankunamanta alabakunankupaq qhari kayniykichis qaracha kuchuchikunaykichista munashanku. 14 Noqan ichaqa manapuni imamantapas alabakusaqchu, aswanpas ñak’arina k’aspipi* wañupuq Señorninchis Jesucristollamantan alabakusaq;+ noqapaqqa k’aspipi wañuchisqan kay pachaqa kashan, noqapas k’aspipi wañuchisqallataqmi kay pachapaqqa kashani. 15 Qhari kay qaracha kuchuchikuypas mana kuchuchikuypas manan imapaqpas valenchu,+ aswanpas mosoqmanta kamasqa kayllan valen.+ 16 Chay kamachikuyman jina llapa kausaqkunan khuyapayasqa kanqaku thaj kaytapas chaskinqaku, paykunaqa Diospa Israel llaqtanmi kanku.+

17 Cuerpoypiqa sut’in kashan Jesuspa kamachin kasqay marcakuna,+ chayrayku amaña pipas contraypiqa rimashachunchu.

18 Wayqeykuna,* Señorninchis Jesucristoq ancha sumaq sonqo kaynin imayna yuyayniyoqchus kasqaykichiswan kachun. Amén.