1 Samuel
12 Chaymantataq Samuelqa llapa Israel runakunata nirqan: “Tukuy mañakusqaykichistan ruwapurqaykichis, reytapas churapuykichisñan kamachinasuykichispaq.+ 2 ¡Kayqa reyniykichis, paymi umallisunkichis!*+ Noqaqa ñan machuña soqo umaña* kapuni. Wawaykunapas qankuna ukhupin kashan.+ Noqaqa wayna kasqaymantapachan umallishaykichis.+ 3 Kunanqa kaypin kashani, qankunaq ñaupaykichispi. Jehová Dioswan ajllakusqan reypiwan testigo kachunku.+ ¿Jayk’aqllapas asnoykichistapas toroykichistapas qechurqaykichischu?+ ¿Jayk’aqllapas pitapas maltratarqaykichischu, suwarqaykichischu? ¿Jayk’aqllapas regalota chaskirqanichu pitapas juzgashaspa payman sayapakunaypaq?+ Chhaynata ruwarqani chayqa, kunan uyaypi niwaychis kaqta qopunaypaq”,+ nispa. 4 Jinan paykunaqa nirqanku: “Manan jayk’aqpas maltratawarqankikuchu nitaq imatapas suwawarqankikuchu, manataqmi pimantapas regalotaqa chaskirqankichu”, nispa. 5 Samueltaq nirqan: “Chhaynaqa manan imapas kanchu juchachawanaykichispaq,* Jehová Dios testigo kachun chaymanta, jinallataq ajllakusqan reypas”, nispa. Jinan paykunaqa nirqanku: “Arí, testigo kachun”, nispa.
6 Chaymantataq Samuelqa llapa llaqtantin runakunata nirqan: “Chhaynaqa Moiseswan Aaronwan ñaupa taytaykichiskunata Egiptomanta orqochimuq Jehová Dios testigo kachun.+ 7 Kunanqa llapaykichis qayllaykamuychis, Jehová Diospa ñaupanpi juzgasaykichis. Chaytan ichaqa ruwasaq qankunapaqpas ñaupa taytaykichiskunapaqpas Jehová Diospa tukuy imaymana ruwasqanta* yuyarichispa.
8 ”Jacob Egipto llaqtaman jaykupuqtinmi+ ñaupa taytaykichiskunaqa Jehová Diospa yanapayninta mañakurqanku.+ Jinan Jehová Diosqa Moisesta Aarontawan kacharqan+ Egiptomanta orqomuspa kayman pusamunankupaq.+ 9 Ñaupa taytaykichiskunan ichaqa Jehová Diosta qonqapurqanku, jinan Diosqa paykunata entregarqan+ Azor llaqta soldadokunaq umallin Sisaraman,+ Filistea runakunaman,+ Moab reyman+ ima. Paykunan ñaupa taytaykichiskunawan maqanakuq jamurqanku. 10 Jinan paykunaqa Jehová Diospa yanapayninta mañakuspa+ nirqanku: Jehová Diosniyku juchallikuykun.+ Qanta saqespaykun Baalkunata+ Astoret idolokunatawan+ yupaycharqayku. Kunanqa ama jinachu kay, enemigoykuq makinmanta librawayku qanllata yupaychanaykupaq, nispa. 11 Chayta mañakuqtinkun Jehová Diosqa Jerubaalta,+ Bedanta, Jefteta,+ Samuelta+ ima kachamurqan enemigonkunamanta paykunata librananpaq, chhaynapi qankuna thajpi kausanaykichispaq.+ 12 Anmón runakunaq reynin Najás+ qankunaman phawaykamuqtintaq, Jehová Dios reyniykichis kashaqtinpuni,+ qankunaqa sapa kuti mañakuwarqankichis: ¡Reyniyoq kaytan munayku!,+ nispa. 13 Kayqa mañakusqaykichis rogapakusqaykichis rey. ¡Qhawariychis! Paytan Jehová Dios qankunapaq ajllapusunkichis.+ 14 Allillan kayta munankichis chayqa Jehová Diosta manchakuychis,+ payta serviychis,+ paypa siminta kasukuychis,+ ama jayk’aqpas Jehová Dios contraqa jatariychischu. Qankunapas reyniykichispas Jehová Diosllatapuni serviychis. 15 Ichaqa manachus Jehová Diospa siminta kasukunkichis, Jehová Dios contrachus jatarinkichis chayqa, qankunata taytaykichiskunatawanmi Jehová Diosqa castigasunkichis.+ 16 Alistakuychis, kunallanmi Jehová Diosqa ñawiykichispa rikushasqan manchana ruwayta ruwanqa. 17 Kunanqa trigota cosechana tiempon kashan ¿riki? Kunallanmi Jehová Diosmanta mañakusaq rayota t’ojachimunanpaq parachimunanpaqwan. Chhaynapin yachankichis juj reyta mañakuspa sinchi mana allinta Jehová Diospa ñaupanpi ruwasqaykichista”,+ nispa.
18 Chay qhepamanmi Samuelqa Jehová Diosmanta mañakurqan, jinan Jehová Diosqa rayota t’ojachimuspa parachimurqan. Chayta rikuspan llapa Israel runakunaqa Jehová Diosmanta Samuelmantawan sinchita mancharikurqanku. 19 Jinaspa Samuelta nirqanku: “Jehová Diosniykimanta mañapuwayku,+ manan wañuyta munaykuchu. ¡Juj reyta mañakuspaykun noqaykuqa astawan juchata yapakullaykutaq!”, nispa.
20 Chaymi Samuelqa paykunata nirqan: “Ama manchakuychischu. Arí, imaymana mana allinkunatan ruwarqankichis. Kunanmanta ichaqa Jehová Diosllata kasukuychis,+ Jehová Diosllata tukuy sonqoykichiswan serviychis.+ 21 Amapuni jayk’aqpas Diosmantaqa t’aqakuychischu, amataq idolokunataqa yupaychaychischu.+ Chaykunaqa manan jayk’aqpas salvasunkichischu mana valeq kasqankurayku.+ 22 Ancha jatun sutinraykun+ Jehová Diosqa manapuni jayk’aqpas llaqtantaqa saqenqachu.+ Qankunaqa Jehová Diospa ajllakusqan llaqtan kankichis.+ 23 Noqaqa mañapusaykichismi Jehová Diosmantaqa, manachus chayta ruwayman chayqa Dios contrachá juchallikushayman. Chaymantapas noqaqa mana sayk’uspan yachachisaykichis allin kaqkunatapas chanin kaqkunatapas ruwanaykichispaq. 24 Ichaqa Jehová Diosllata manchakuychis,+ payllata tukuy sonqowan serviychis. Chaymantapas amapuni qonqaychischu qankunarayku ancha musphanapaq ruwaykuna ruwasqanta.+ 25 Mana p’enqarikuspachus mana allinkunata ruwankichis chayqa, chinkachisqan kankichis+ qankunapas reyniykichispas”,+ nispa.