Gálatas
4 Herencia chaskiqchus wawallaraq kanman chayqa, manan wasipi kamachimantaqa imapipas maschu kanman paypaña tukuy ima kanman chaypas ¿riki? 2 Aswanmi payqa taytanpa señalasqan p’unchaykama cuidaqkunaq, mayordomokunaq makillanpiraq kashan. 3 Chhaynallataqmi noqanchiswanpas karqan, wawa jinallaraq kashaspanchisqa kay pachaq ruwasqanman jina piensasqanman jinan kausaq kanchis.+ 4 Ichaqa señalasqa tiempo junt’akuqtinmi Diosqa Churinta kachamurqan. Payqa juj warmimantan nacerqan,+ kamachikuy simiq nisqanman jinataqmi kausarqanpas,+ 5 chhaynapi kamachikuy simiman jina kausaqkunata rantispa librananpaq;+ chhaynapitaq Diospa uywakapusqan wawakuna jina kananchispaq.+
6 Wawankunaña kasqaykichisraykun Diosqa Churinman qosqan santo espirituta noqanchispa sonqonchismanpas churan,+ chay espiritun rimachiwanchis: “¡Aba,* Papáy!”,+ nispa. 7 Chhaynaqa manañan kamachiñachu kankichis aswanpas Diospa wawanñan. Wawanñataq kankichis chayqa, qankunapas payraykun herenciata chaskinkichis.+
8 Manaraq Diosta reqsishaspan ichaqa yanqa dioskunaq kamachin karqankichis. 9 Kunanqa ñataq Diosta reqsinkichisña, otaq nisunman ñataq paypa reqsisqanña kankichis chayqa, ¿imaynapitaq qankunari mana valeq yanqa ruwaykunaman kutirishankichis?+ ¿Wajmantachu chaykunaq kamachin kayta munashankichis?+ 10 ¿Imaynapitaq qankunari wajmanta waqaychashankichis wakin p’unchaykunata, mosoq killakunata,+ fiestakunata, jatun watakunatapas? 11 Yanqapaqchus jina kallpachakurqani qankunata yanapanaypaqqa.
12 Wayqeykuna,* imaynan kunan kashankichis chhaynan noqapas ñaupaqqa karqani, ichaqa cambiapurqanin, chayraykun valekuykichis qankunapas noqa jina cambiapunaykichispaq.+ Ñaupaqqa manamá riki qankunaqa millaytachu qhawariwarqankichis. 13 Yachasqaykichis jina, onqosqayraykun ñaupaqpiqa allin willakuykunata willarqaykichis. 14 Sasa aguantayña qankunapaq onqoyniy karqan chaypas, manamá riki pisichawarqankichischu ni millakuwarqankichispaschu;* aswanpas Diospa angelninpas kayman karqan, Cristo Jesuspas kayman karqan jinataraqmá riki sumaqta chaskiwarqankichis. 15 Chay tiempopiqa kusisqan kasharqankichis, ¿maytaq chay kusikuyniykichisri? Chay tiempopiqa, atiwaqchis karqan chayqa, ñawiykichista orqorukusparaqchá noqaman qowankichisman karqan.+ 16 ¿Cheqaqllata imatapas nisqayraykuchu enemigoykichista jina qhawariwankichis? 17 Chay runakunaqa tukuy atisqankutan ruwanku sonqoykichista suwanasuykichispaq, ichaqa manan allinniykichista munaspachu; aswanpas noqamantan t’aqayta munashasunkichis, chhaynapi paykunaman k’askakunaykichispaq. 18 Ichaqa pipas allinniykichista munaspa tukuy tiempo qankunata maskhasunkichisman, manataq noqa qankunawan kashallaqtiychu maskhasunkichisman chayqa, allinmi kanman. 19 Wawallaykuna,+ qankunaraykun onqokushaq warmi jinaraq wajmanta sinchi nanaypi kashani, chhayna nanayllapichá riki kashasaq Cristo jina kanaykichiskama. 20 Maytan munayman kunanpacha qankunawan chaypi kashayta, chhaynapi qankunata munayllata rimapayashanaypaq. Manan allintachu entiendeshani imapunichus pasashasunkichis chayta.
21 Yau kamachikuy simita kasukuy munaqkuna, ¿manachu yachankichis kamachikuy simiq imachus nisqanta? 22 ¿Manachu chaypi willashan Abrahanqa iskay wawayoq kasqanmanta? Jujninmi nacerqan kamachi warmimanta+ jujnintaq libre kaq warmimanta.+ 23 Kamachi warmimanta naceq wawanqa lliu runakuna jinallan* nacerqan,+ libre kaq warmimanta naceqmi ichaqa Diospa promesanman jina nacerqan.+ 24 Chay pasasqanmi rikuchirqan imachus qhepaman pasanan karqan chayta. Chay warmikunan tupan iskay acuerdo ruwakusqanwan, jujninmi tupan Sinaí orqopi acuerdo ruwakusqanwan,+ payqa Agarmi, paymi kamachi kanankupaq wawakunata onqokun. 25 Chhaynaqa, Agarqa Arabia ladopi Sinaí orqowanmi tupan,+ kunan tiempotaq Jerusalén llaqtawan tupan, chay llaqta llapa wawakunantin kamachi kasqanrayku. 26 Wichaypi kaq Jerusalenmi ichaqa libre, paymi noqanchispa mamanchisqa.
27 Diospa simin qelqapipunin nishan: “¡Mana wijsallikuyta atiq warmi, kusikuy! Onqokuy nanaywan mana jap’ichikuq warmi, kusikuymanta qapariy. Mana wijsallikuyta atiq warmin askha wawakunayoq kapun qosayoq warmimantaqa”,+ nispa. 28 Chhaynaqa, wayqeykuna,* qankunaqa Diospa prometesqanman jina wawakunan kankichis, imaynan Isaacpas karqan chhayna.+ 29 Ichaqa imaynan lliu runakunaq nacesqanman jinalla* naceq wawaqa espirituman jina naceq wawata qatikacharqan,+ chhaynallataqmi kunanpas kashan.+ 30 Ichaqa, ¿imanishanmi Diospa simin qelqapiqa? “Chay kamachi warmita wawantinta kaymanta qarqopuy. Libre kaq warmiq wawanpa herencianqa manapunin chay kamachi warmiq wawanpaqwanqa kanmanchu”+ nispan nishan ¿riki? 31 Chhaynan wayqeykuna,* noqanchisqa manan kamachi warmiq wawankunachu kanchis, aswanpas libre kaq warmiq wawankunan kanchis.