Isaías
22 Kay willakuyqa rijuriykuna rikukusqan wayq’o* contran:+
¿Imaraykutaq qanri wasi patakunaman seqashanki?
2 Ch’aqwaywan qapariywan junt’a kaq llaqta,
tukuy tiempopas kusisqalla kaq llaqta;
wañuqniykikunaqa manan espadawanchu wañurqan,
manan guerrapichu wañurqan.+
3 Llapa kamachiqniykikunan ayqekapunku.+
Mana flechallawanmi presota jap’ipunku.
Llapa tarisqankutan presota apapunku,+
karumanña ayqekurqanku chaypas jap’isqan kapunku.
4 Chaymi nini: “Ama qhawamuwaychischu,
may atisqaytan waqasaq.+
5 Kay p’unchayqa manchakuy p’unchaymi, atipasqa kay p’unchaymi,+
tukuy munayniyoq Señormi, ejercitokunata kamachiq Jehová Diosmi manchakuyta chayachimun,
rijuriykuna rikukusqan wayq’omanmi llakita chayachimun.
Llaqta perqakunan thunisqa kashan,+
runakunan orqo wichayman qaparishanku.
6 Elammi+ oqarishan flecha apananta,
caballokunapi carretakunapi iman jamushan,
Quirpas+ jark’apakunan escudotan alistashan.
7 Munay wayq’o pampakunamanmi maqanakunapaq carretakuna junt’aykunqa,
jawa punkukunamanmi caballokuna* junt’aykunqa.
8 Judata jark’aqqa orqosqan kanqa.
”Chay p’unchaymi arma waqaychana Sach’a-sach’a nisqa wasita qhawarinki.+ 9 Davidpa Llaqtan+ nisqa perqakunatan raqra-raqrata* rikunkichis. Unutapas ukhu kaq estanquemantan orqonkichis.+ 10 Jerusalenpi wasikunatan yupanqaku, jinaspa thuninqaku llaqta perqata allichanankupaq. 11 Perqakunaq chaupinpin qochata ruwanqaku mauk’a estanquemanta unuta apanankupaq. Ichaqa manan qhawarinqakuchu chaykuna ruwaq Diosta, manan rikunqakuchu chaykuna kamaqta.
12 Chay p’unchaymi ejercitokunata kamachiq tukuy munayniyoq Señor Jehová Diosqa
lliuta kamachinqa waqanankupaq, sonqonkuta takakunankupaq,+
umanta k’isukunankupaq, qhasqa p’achawan churakunankupaq.
13 Qankunan ichaqa chaykuna ruwanaykichismantaqa fiestakunapi kusikushankichis,
wakakunatan ovejakunatan ñak’ashankichis,
aychatan mijushankichis, vinotan ujashankichis:+
Mijusunchis ujasunchis paqarinmi wañupusun, nispaykichis”,+ nispa.
14 Chayllamanmi ejercitokunata kamachiq Jehová Diosqa rimapayamuwarqan: “Wañupunaykichiskaman juchaykichisqa mana perdonasqachu kanqa,+ noqa ejercitokunata kamachiq tukuy munayniyoq Señor Jehová Diosmi chayta nini”, nispa.
15 Tukuy munayniyoq Señormi, ejercitokunata kamachiq Jehová Diosmi nin: “Phaway reypa palacionmanta encargakuq mayordomo Sebnapata riy,+ payta nimuy: 16 ¿Imaykitaq kaypiri kan? ¿Pin qan kanki kaypi aya p’ampanata ruwakunaykipaq?, nispa. Kay runaqa alto patapin sepulturanta ruwashan, ch’ila qaqapin p’ampakunan t’oqota t’oqoshan. 17 Nimullankitaqmi: ¡Yau runa! Jehová Diosmi qaqata jap’ispa pampaman chanqasunki. 18 Bolata jinan allinta k’uyusunki jinaspa karupi jatun jallp’aman chanqasunki. Chaypin wañunki, chaypin jatunchakusqayki carretakunapas chinkapunqa, patronniykipaqpas p’enqaymi kanki. 19 Imachus ruwanaykimantan qarqosqa kanki, mayordomo kasqaykimantan wijch’usqa kanki.
20 ”Chay p’unchaymi wajasaq Hilquiaspa churin kamachiy Eliaquinta.+ 21 Paymanmi churasaq jatun p’achaykita, paytan watasaq chumpiykiwan.+ Paymi qanpa rantiykipi autoridad kanqa, paymi tayta kanqa Jerusalén llaqtapi runakunapaq Judá runakunapaqpas. 22 Paypa rijranmanmi churasaq Davidpa wasin llaveta.+ Paypa kichasqantaqa manan pipas wisq’anqachu, paypa wisq’asqantapas manan pipas kichanqachu. 23 Mana orqoy atina clavota jinan clavasaq, payqa munay trono jinan kanqa taytanpa familianpi. 24 Paypin warkusqa kanqa taytanpa familianpa jatun kayninqa, chay familiamanta jamuq miraykunapas paymantan kanqaku; paypin warkusqa kanqaku p’ukukunapas p’uyñukunapas rakikunapas.
25 ”Chay p’unchaymi chay allin clavasqa clavoqa orqosqa kanqa,+ kuchusqan kanqa, jinan llapa chaypi warkusqa kaqkuna urmaykapunqa jinaspa lliu chhallukapunqa, ninmi Jehová Dios, nispa. Noqa ejercitokunata kamachiq Jehová Diosmi chayta nini”, nispa.