2 Samuel

2 Chaymantataq Davidqa Jehová Diosta tapurqan:+ “¿Risaqchu Judá aylluman?”, nispa. Jehová Diostaq nirqan: “Arí, rillay”, nispa. Jinan Davidqa nillarqantaq: “¿Mayqen llaqtamanmi risaq?”, nispa. Diostaq nirqan: “Hebrón+ llaqtaman riy”, nispa. 2 Chaymi Davidqa Hebrón llaqtaman ripurqan iskaynin esposantin. Paykunan karqanku Jezrel llaqtayoq Ainoan,+ Nabalpa viudan Abigailpiwan.+ 3 Davidqa llapa runankunantinmi ripurqan,+ chay runankunaqa familiantinkaman ripurqanku. Jinan tiyapurqanku Hebrón llaqtapi, muyuriqninpi kaq llaqtakunapiwan. 4 Chaymantataq Judá ayllu runakuna jamurqanku, jinaspa Davidta Judá ayllupi rey kananpaq aceitewan jich’aykurqanku.+

Chay runakunan Davidman willarqanku: “Jabés-Galaad llaqta runakunan Saultaqa p’ampapunku”, nispa. 5 Jinan Davidqa Jabés-Galaad runakunaman willachimurqan: “Qankunaqa wiraqochaykichis Saulta p’ampapuspaqa mana tukukuq munakuyniykichistan* payman rikuchirqankichis, chayraykun Jehová Diosqa bendecisunkichis.+ 6 Jehová Diosmi mana tukukuq munakuyninta rikuchisunkichis. Noqapas chay ruwasqaykichismantan qankunata sumaq sonqowan qhawarisaykichis.+ 7 Wiraqochaykichis Saulqa wañukapunmi. Kallpachakuychis, allin qhari kaychis. Judá ayllu runakunaqa noqatan rey kanaypaq ajllawanku”, nispa.

8 Saulpa soldadonkunaq umallin Abnertaq+ Saulpa churin Is-Boset-ta+ Manain+ llaqtaman pusarqan. Chay llaqtaqa kasharqan Jordán mayu chimpapin. 9 Chaypin Abnerqa Is-Boset-ta churarqan Galaad runakunaq,+ asurita runakunaq, Jezrel llaqta runakunaq,+ Efraín ayllu runakunaq,+ Benjamín ayllu runakunaq, llapa Israel runakunaq reynin kananpaq. 10 Saulpa wawan Is-Bosetqa tawa chunka watanpi kashaspan Israelpi kamachikuyta qallarirqan, iskay watataqmi kamachikurqan. Judá ayllu runakunan ichaqa Davidta reyninkuta jina qhawarirqanku.+ 11 Davidqa qanchis watata soqta killatawanmi Hebrón llaqtamanta Judá aylluta kamachirqan.+

12 Tiempowantaq Nerpa churin Abnerqa Is-Bosetpa kamachinkunapiwan Manain+ llaqtamanta Gabaón+ llaqtaman rirqanku. 13 Zeruyapa+ churin Joabpas+ Davidpa kamachinkunapiwanmi rillarqankutaq Gabaón llaqtaman, jinaspan tuparqanku chay llaqtapi kaq unu estanquepi. Abnerpa soldadonkunan kasharqanku unu estanqueq juj ladonpi, Joabpa soldadonkunataq juj kaq ladonpi. 14 Jinan Abnerqa Joabta nirqan: “Wayna kamachinchiskuna ñaupanchispi maqanakuchun”, nispa. Joabtaq nirqan: “Yá, maqanakuchunku”, nispa. 15 Jinan chay waynakunaqa maqanakunankupaq lloqsimurqanku. Benjamín ayllumanta Is-Bosetpa kamachinkunan karqanku chunka iskayniyoq, Davidpa kamachinkunapas chunka iskayniyoqmi kallarqankutaq. 16 Jinan chay waynakunaqa maqanakuyta qallarirqanku, jinaspan waqtanninku ladopi espadawan sat’inarukurqanku, chhaynapin llapanku wañupurqanku. Chaymantapachan chay parteta suticharqanku Elcaj-Azurin* nispa, chayqa Gabaón llaqtapin kashan.

17 Jinan chay p’unchayqa sinchitapuni maqanakuy qallarirqan. Davidpa kamachinkunan Abnerta Israel runakunatawan atipapurqanku. 18 Chaypin kasharqanku Zeruyapa kinsa churinkuna:+ Joabwan,+ Abisaiwan,+ Asaelpiwan.+ Asaelqa taruka jina phawaqmi karqan. 19 Chaymi payqa Abnerpa qhepanta mana chinkachispa usqhaylla qatiparqan. 20 Jinan Abnerqa qhepanta qhawarikuspa nirqan: “¿Qanchu kashanki Asael?”, nispa. Asaeltaq nirqan: “Arí, noqan kashani”, nispa. 21 Jinan Abnerqa nirqan: “Amaña qatipawaychu, aswanpas juj waynata jap’ispa tukuy kaqninkunata qechupuy”, nispa. Asaelmi ichaqa mana kasukuspa qatipashallarqan. 22 Jinan Abnerqa jujmanta nillarqantaq: “Yau, nishaykin, amaña qatipawaychu, paqtataq wañurachiykiman. Wañurachispayri, ¿ima uyaywantaq wayqeyki Joabmanri qayllaykusaq?”, nispa. 23 Asaelmi ichaqa qatishallarqan. Jinan Abnerqa lanzanpa mangonwan wijsanpi takaspa wasankamaraq pasarachipurqan,+ chhaynapin Asaelqa wañupurqan. Chaymi chayninta pasaq runakunaqa juj ratu chaypi sayaykuqku Asaelpa cuerponpa ladonpi.

24 Chaymi Joabwan Abisaiwanqa Abnerta qatiparqanku. Inti chinkaykuyta jinataq chayarqanku Guiaq chimpanpi kaq Amá moqoman. Chay moqoqa kashan Gabaón ch’inneqman riq ñanpin. 25 Benjamín ayllu runakunataq juj nisqalla moqo patapi Abnerpa qhepanpi juñukurqanku, paykunaqa maqanakunankupaq jinan listo kasharqanku. 26 Chay patamantan Abnerqa Joabta nimurqan: “¿Wañuchinakuspallachu kausasunchis? Maqanakushallasun chayqa sonqo nanayllan kanqa, ¿manachu chayta reparakunki? Llapanchispas wayqentinmi kanchis. Chayrayku runaykikunata niy amaña qatipawanankupaq”, nispa. 27 Chayta uyarispan Joabqa nirqan: “Wiñaypaq kausaq Diospa sutinpin jurayki, manachus chayta niwaq karqan chayqa, paqarinkamachá runaykunaqa wayqenkuta qatipashallankuman karqan”, nispa. 28 Jinan Joabqa oveja waqrata tocarqan, chhaynapin Joabpa runankunaqa manaña Israel wayqenkuta qatiparqankuñachu. Chhaynapin chay maqanakuyqa tukupurqan.

29 Abnerqa runankunantinmi Arabá wayq’onta+ tutantin purirqanku. Jordán mayuta chimpaspataq orqo qhatanta purispa Manain+ llaqtaman chayapurqanku. 30 Joabtaq Abnerta qatipasqan qhepaman llapa runankunata yuparqan, jinan Davidpa kamachinkunamanta Asaelwan chunka isqonniyoq runakunapiwan faltarqanku. 31 Davidpa kamachinkunan ichaqa Abnerpa runankunata Benjamín ayllumanta runakunatawan kinsa pachaj soqta chunka runakunata wañuchirqanku. 32 Asaelpa+ cuerpontataq Belén+ llaqtaman apapurqanku, jinaspa taytanpa sepulturanpi p’ampapurqanku. Chaymantataq Joabqa runankunantin tutantin purispanku Hebrón+ llaqtaman illarimuyta jina chayarqanku.