1 Samuel

27 Davidmi ichaqa sonqollanpi nirqan: “Saulqa jayk’aqllapas wañuchiwanqapunin, aswanpas ripusaq+ Filistea runakunaq jallp’anman. Chayta ruwasaq chayqa manañan Saulqa Israelpi maskhawanqañachu,+ chhaynapitaq paymanta librakusaq”, nispa. 2 Jinan Davidqa soqta pachaj runankunapiwan+ Gaj llaqtaman ripurqanku, Maocpa churin Akís+ reypa kasqanman. 3 Chhaynapin Davidqa runankunantin Gaj llaqtapi qhepakurqan, Akís reypa kasqanpi. Davidpas runankunapas familiantinkaman chay llaqtapi qhepakurqanku. Davidwan kuskan kasharqanku iskaynin esposankuna, Jezrel llaqtayoq Ainoanwan,+ Carmelo llaqtayoq Abigailpiwan.+ Abigailpa ñaupa qosanqa Nabalmi karqan, payqa wañupurqanmi. 4 Gaj llaqtaman Davidpa ayqekusqanta yacharuspan Saulqa manaña maskharqanñachu.+

5 Davidmi Akista nirqan: “Ama jinachu kay, campopi jallp’ata qoykuway chaypi tiyanaypaq. Noqaqa kamachillan kani, ¿imaynapitaq reypa tiyasqan llaqtapiri tiyayman?”, nispa. 6 Jinan Akisqa Ziclag+ llaqtata Davidman qorqan. Chaymi kunankamapas chay llaqtaqa Judá ayllu reykunaq kapun.

7 Filistea runakunaq qosqan Ziclag llaqtapin Davidqa tiyarqan juj watata tawa killatawan.+ 8 Davidqa runankunantinmi Guesur runakunawan,+ guirzita runakunawan, Amalec runakunawan+ ima maqanakuq riq. Chay runakunaqa tiyaqku Telanmanta Shurkaman,+ jinallataq Egiptokama. 9 Chay jallp’akunapi tiyaq runakunawan maqanakuq rispaqa lliutan Davidqa wañuchiq, manan ni juj warmitapas ni qharitapas saqeqchu.+ Ovejankuta, wakankuta, asnonkuta, camellonkuta iman ichaqa apakapuq. Apakapullaqtaqmi qechusqanku p’achatapas. Chaymantataq Akís reypa kasqanman kutipuq. 10 Jinan Akís reyqa Davidta tapuq: “¿Maykunatan kunan p’unchay maqanakuq rirqanki?”, nispa. Davidtaq niq: “Judá aylluq uray ladontan”,*+ nispa; otaq: “Jeramel runakunaq jallp’anpa uray ladontan”,+ nispa; otaq: “Quenita runakunaq tiyasqan jallp’aq uray ladontan”,+ nispa. 11 Davidqa lliutan warmitapas qharitapas wañuchiq chhaynapi mana mayqenpas Gaj llaqtaman apasqa kananpaq. Paymi niq: “Kay runakunaqa Davidmi kayta jaqayta ruwashan nispapas willaramunkuman”, nispa. (Chhaynatan Davidqa ruwaq Filistea runakunaq llaqtanpi tukuy tiempo tiyashaspaqa). 12 Akisqa Davidpa nisqantan creeq, chaymi sonqonpi yuyaykuq: “Israel runakunaqa cheqnikapunkuchá, kunanqa noqaq kamachillaypunin kapunqa”, nispa.