2 Crónicas
14 Chaymantataq Abiasqa ñaupa taytankuna jina wañukapurqan, jinaspa Davidpa Llaqtan nisqapi p’ampapurqanku.+ Chay qhepamantaq churin Asá rey kapurqan. Asá kamachikushaqtinqa chunka watan Judá ayllu runakunaqa thajpi tiyarqanku.
2 Asaqa Jehová Diosninpa munasqanman jinan tukuy imatapas allinta ruwarqan. 3 Chaymi payqa waj dioskunaq altarninta thunirqan,+ yupaychana patakunata* chinkachirqan, yupaychana sayashaq k’ullukunata*+ wit’urqan, yupaychana sayashaq rumikunatapas+ thunirqan. 4 Chaymantapas Judá ayllu runakunatan nirqan ñaupa taytankuq Diosnin Jehová Diosllata yupaychanankupaq, kamachikuyninkunatapas llapa nisqankunatapas kasukunankupaq. 5 Jinaspapas Asaqa lliutan Judá ayllupi kaq yupaychana patakunata, incienso q’apachina altarkunatapas chinkachirqan.+ Chhaynapin Judá ayllu runakunaqa Asá kamachikushaqtin thajpi tiyarqanku. 6 Chay tiempopin Asaqa Judá ayllupi jatarichirqan allin perqasqa llaqtakunata.+ Jinaspapas chay tiempokunapiqa manan mayqen enemigonkupas paykuna contraqa maqanakuq jamurqankuchu, paykunataqa Jehová Diosmi llapa enemigonkunamanta thajpi tiyachirqan.+ 7 Asá reymi Judá ayllu runakunata nirqan: “Kay llaqtakunata jatarichisunchis, jinaspa muyuriqta sayarichisunchis allin perqakunata, torrekunata ima,+ churasuntaq allin punkukunata, allin trancanakunatawan. Jehová Diosta kasukusqanchisraykun kay jallp’apiqa tiyashanchis, paytan noqanchisqa maskharqanchis, chaymi llapa enemigonchiskunamanta thajpi tiyachiwanchis”, nispa. Jinan Asaqa yuyaykusqanman jina llapa llaqtakunata jatarichirqan.+
8 Asaqa askha soldadokunayoqmi karqan; Judá ayllumanta soldadonkunan karqan kinsa pachaj waranqa, paykunan karqanku jark’apakuna jatun escudokunayoq lanzakunayoq ima. Benjamín ayllumanta kallpasapa soldadonkunataq karqan iskay pachaj pusaq chunka waranqa, paykunan karqanku jark’apakuna juch’uy escudokunayoq* flechana arcokunayoq ima.+
9 Tiempoq pasasqan qhepamanmi Judá ayllu runakunawan maqanakuq jamurqan Zéra sutiyoq Etiopía runa, paymi jamurqan juj millón* soldadokunantin kinsa pachaj carretakunantin ima.+ Maresá llaqtaman+ chayamuqtintaq 10 Asá reyqa paykunawan maqanakuq lloqsimurqan. Jinan Judá ayllu soldadokunapas Etiopía soldadokunapas Maresá llaqtaq qayllanpi Zefata wayq’opi maqanakunankupaq juñukurqanku. 11 Chaypin Asaqa Jehová Diosta rogakuspa+ nirqan: “Jehová Diosniyku, yanapaykuwayku, qanqa kallpasapatapas pisi kallpatapas atinkin yanapayta.+ Jehová Diosniyku, qanpin noqaykuqa suyakuyku,+ qanpa sutiykipin khaytukuy runakunawanpas maqanakuq jamuyku.+ Jehová Diosniyku, qanmi Diosniykuqa kanki, amayá runakunallawanqa atipachikuychu”,+ nispa.
12 Jinan Jehová Diosqa Asapa ñaupanpi Judá ayllu runakunaq ñaupanpi Etiopía runakunata atiparqan. Etiopía runakunataq ayqekurqanku.+ 13 Chaymi Asaqa soldadonkunapiwan Etiopía runakunata Guerar llaqtakama+ qatirqanku, jinaspan ayqekushaqtinku lliuta wañuchirqanku. Chhaynatan Jehová Diosqa ejercitonpiwan chay runakunata atiparqan. Chaymantataq Judá ayllu runakunaqa chay runakunaq kaqninkunata askhatapuni aparqanku. 14 Chaymantapas Guerar llaqtaq muyuriqninpi kaq llaqtakunamanwanmi Judá ayllu soldadokunaqa jaykurqanku, chay llaqta runakunaqa sinchitapunin Jehová Diosmanta mancharikurqanku. Jinan Judá ayllu runakunaqa llapanta chay llaqtakunamanta imaymana kaqninkuta apapurqanku, chay runakunaqa imaymana kaqniyoqmi karqanku. 15 Karpapi tiyaq uywa michiq runakunamanpas phawaykurqankun, jinan paykunamantapas askhata qechumurqanku ovejakunata camellokunata ima. Chaymantataq Jerusalén llaqtaman kutimpurqanku.