2 Crónicas

18 Jehosafatqa atiyniyoq qhapaq runan karqan,+ ichaqa jujnin familiantan rey Ajabpa+ familianwan casarachirqan. 2 Chaymi Jehosafatqa qhepa watakunaman Samaria llaqtata rirqan Ajabwan tupaq.+ Jinan rey Ajabqa askha ovejakunata wakakunata ñak’achirqan* Jehosafatpaq runankunapaqwan. Chaymantataq Ajabqa Jehosafat-ta mat’ipayarqan Ramoj-Galaad+ contra maqanakuq rinankupaq. 3 Chaymantataq Israel rey Ajabqa Judá rey Jehosafat-ta nirqan: “¿Riysiwankichu Ramoj-Galaad llaqtata?”, nispa. Jinan payqa nirqan: “Jakuyá risunchis. Noqanchisqa kaqllan kanchis, llaqtaypas llaqtayki jinan, chay maqanakuypiqa noqapas llaqtaypas yanapasaykikun”, nispa.

4 Chaymantapas Jehosafatqa nillarqantaqmi: “Ñaupaqta ichaqa Jehová Diostaraq tapuy”,+ nispa. 5 Jinan Israel reyqa tawa pachaj profetakunata juñurqan, jinaspa nirqan: “¿Risaqkuchu icha manachu Ramoj-Galaad contra maqanakuq?”, nispa. Chay profetakunataq nirqanku: “Rillay, Diosmi paykunataqa makiykiman entregasunki”, nispa.

6 Jinan Jehosafatqa nirqan: “¿Manachu Jehová Diospa juj profetan kaypi kan?+ Paytapas tapullasuntaq”,+ nispa. 7 Chayta niqtinmi Israel reyqa Jehosafat-ta nirqan: “Arí, kashanraqmi juj profeta+ Jehová Diosta tapunanchispaq, payqa Inlapa churin Micayan. Ichaqa chay profetaqa noqa contrallan profetizan,+ chaymi cheqnikuni”, nispa. Jinan Jehosafatqa nirqan: “Rey Ajab, ama chhaynata rimaychu”, nispa.

8 Jinan Israel reyqa palacionpi kaq oficialta wajaspa nirqan: “Phaway usqhaylla Inlapa churin Micayata pusaramuy”,+ nispa. 9 Israel reywan Judá rey Jehosafatwanqa Samaria llaqta punkupin era patapi* kasharqanku, chaypin paykunaqa rey p’achankuwan churarusqa trononkupi tiyasharqanku, ñaupankupitaq llapa profetakuna profetizasharqanku. 10 Jinan Kenanapa churin Sedequiasqa fierromanta waqrakunata ruwarukuspa nirqan: “Jehová Diosmi nin: Kay waqrakunawanmi Siria runakunata chinkachinaykikama waqranki,* nispa”. 11 Wakin profetakunapas llapankun nisharqanku: “Rillay Ramoj-Galaad llaqtataqa, atipamunkipunin.+ Jehová Diosmi paykunataqa makiykiman entregasunki”, nispa.

12 Micayata wajamuq oficialmi Micayata nirqan: “Llapa profetakunan reyta nishanku: Chay maqanakuypiqa atipamunkin, nispa. Qanpas ama jinachu kay, kaqllatataq niy”,+ nispa. 13 Micayan ichaqa nirqan: “Wiñaypaq kausaq Jehová Diospa sutinpin jurayki, noqaqa Diosniypa nisqallantan rimasaq”,+ nispa. 14 Reypa kasqanman Micaya jaykuqtintaq reyqa payta tapurqan: “Micaya, ¿risaqkuchu icha manachu Ramoj-Galaad contra maqanakuq?”, nispa. Jinan Micayaqa kaq ratupacha nirqan: “Rillay, atipamunkin. Diosmi paykunataqa makiykiman entregasunki”, nispa. 15 Chayta uyarispan reyqa nirqan: “¿Jayk’a kutitan jurachisayki cheqaqllata niwanaykipaq? ¿Jayk’a kutitan nisayki Jehová Diospa nisqallantapuni niwanaykipaq?”, nispa. 16 Jinan Micayaqa nirqan: “Llapa Israel runakunatan orqokunapi ch’eqesqata rikushani mana michiqniyoq ovejakunata jina.+ Chaymi Jehová Diosqa nin: Paykunaqa mana michiqniyoq ovejakuna jinan kashanku. Sapankanku wasinkuman thajpi kutipuchunku, nispa”.

17 Jinan Israel reyqa Jehosafat-ta nirqan: “Nishaykin riki, kay runaqa mana allinllatapunin noqamantaqa profetizan”,+ nispa.

18 Chaymantataq Micayaqa nirqan: “Uyariy Jehová Diospa nisqanta. Jehová Diostan rikuni janaq pacha trononpi tiyashaqta.+ Paña ladonpi lloq’e ladonpi imataq angelkuna llapallanku sayashasqaku.*+ 19 Jinan Jehová Diosqa nirqan: ¿Pin Israel rey Ajabta engañaramunman Ramoj-Galaadta rinanpaq, jinaspa chaypi wañunanpaq?, nispa. Chaymi angelkunaqa khaynata jaqaynata nispa nirqanku. 20 Jinan juj angelqa*+ Jehová Diosman qayllaykuspa ñaupanpi sayaykurqan, jinaspa nirqan: Noqa engañaramusaq, nispa. Chaymi Jehová Diosqa nirqan: ¿Imaynatataq engañamunkiri?, nispa. 21 Jinan chay angelqa nirqan: Rispay chay profetakunaq siminman imatachus rimanankuta churaramusaq, chhaynapi pantasqata rimanankupaq, nispa. Chaymi Diosqa nirqan: Phaway nisqaykiman jina ruwamuy, yuyaykusqaykiqa allinmi kanqa, engañaramunkin, nispa. 22 Chayraykun Jehová Diosqa juj angelta kachamurqan kay profetakunata pantasqata rimachinanpaq.+ Jehová Diosmi ichaqa ña willanña imapichus tarikunaykita”, nispa.

23 Jinan Kenanapa churin Sedequiasqa+ Micayaman+ qayllaykuspa uyanpi ch’aqlarqan,+ jinaspa nirqan: “Chhaynaqa, ¿Jehová Diospa espiritunmi saqepusunki nishawankichu? ¿Kunanqa qanwanñataqchu rimashan? ¿Maynintataq qanmanri chimparurqan?”,+ nispa. 24 Jinan Micayaqa nirqan: “Chaytaqa yachanki wasi ukhuman pakakuq ayqekushaspaykiñan”, nispa. 25 Chaymi Israel reyqa nirqan: “¡Jap’iychis Micayata! Jinaspa llaqtaq umallin Amonman, reypa churin Joasmanwan entregamuychis. 26 Paykunatataq ninkichis: Reymi nin: ¡Kay runata carcelman wisq’aychis!+ T’antatapas unutapas pisillata qoychis maqanakuymanta atipaspa kutimunaykama, nispa”. 27 Micayan ichaqa nirqan: “Sichus maqanakuymanta atipaspa kutimunki chayqa, manapas Jehová Dios noqawan rimanmanchu jinan kanqa”,+ nispa. Llapa runakunatataq nirqan: “Allinta chayta uyariychis, ama qonqaychischu”, nispa.

28 Jinan Israel reyqa Judá rey Jehosafatwan Ramoj-Galaad llaqtata+ rirqanku. 29 Israel reymi Jehosafat-ta nirqan: “Noqaqa juj p’achawan churakuspan maqanakuq risaq, qantaq ichaqa rey p’achaykiwan rinki”, nispa. Jinan Israel reyqa juj p’achawan churakurqan, jinaspa maqanakuq rirqanku. 30 Siria reymi ichaqa carretakunapi kaq soldadokunaq comandantenkunata nisqaña: “Aman piwanpas maqanakunkichischu, juch’uywanpas ni jatunwanpas, aswanpas Israel reyllawanmi maqanakunkichis”, nispa. 31 Jinan chay comandantekunaqa Jehosafat-ta rikuruspa paykunapura ninakurqanku: “Payqa Israel reypunin”, nispa. Jinaspa paywan maqanakunankupaq usqhaylla phawaykurqanku, Jehosafatmi ichaqa qaparispa yanapayta mañakurqan.+ Chaymi Jehová Diosqa payta yanaparqan, kaq ratun paymanta runakunata karuncharqan. 32 Jinan chay comandantekunaqa mana Israel reychu kasqanta reparaspa manaña qatiparqankuñachu.

33 Juj runan ichaqa comunta flechasharqan, jinaspan qonqaylla Israel reyta jap’irachirqan, chay flechaqa reypa maqanakunan chalecontan* jaykurqan. Jinan Israel reyqa carretanta apaq soldadota nirqan: “Carretata kutirichiy, jaku juj ladoman, sinchitan k’iriruwanku”,+ nispa. 34 Chay p’unchay maqanakuyqa sinchipunin karqan. Israel reytaqa tardeyaykuykaman carreta patapi jap’isharqanku Siria runakuna qhawashaqta, jinan reyqa inti jaykuyta wañupurqan.+