Hechos
6 Jesuspa discipulonkunaqa askhayasharqankun chay p’unchaykunapi, jinan juj kutipi griego rimaq judiokuna quejakurqanku hebreo rimaq judiokunaq contranpi, paykunamanta kaq viudakunamanmi sapa p’unchay rakikusqan mijuyta mana qoshasqakuchu.+ 2 Chaymi chunka iskayniyoq apostolkunaqa llapa iñiqkunata juñuspa nirqanku: “Noqaykupaqqa manan allinchu kanman Diospa simin yachachiyta saqespa mijuykunata rakiyqa.+ 3 Chayrayku, wayqeykuna, qankuna ukhumanta ajllaychis qanchis qharikunata, allin respetasqa kaqkunata,+ espirituwan yachaywan junt’a kaqkunata,+ chhaynapi chay ruwakunanpuni ruwaypi paykunata churanaykupaq;+ 4 noqaykuqa Diosmanta mañakuspa siminta yachachispa llank’ayllapiñan kasaqku”, nispa. 5 Lliu iñiqkunan chay nisqankutaqa allinpaq qhawarirqanku, chaymi ajllarqanku Estebanta, payqa allin iñiyniyoq runan karqan, junt’an kasharqan santo espirituwanpas, ajllallarqankutaqmi Felipeta,+ Procorota, Nicanorta, Timonta, Parmenasta, Antioquiamanta judioman tukupuq Nicolastapas. 6 Jinaspan apostolkunaman pusamurqanku, jinan apostolkunaqa Diosmanta mañakurqanku, chaymantataq paykuna pataman makinkuta churaykurqanku.+
7 Chhaynapin Diospa siminqa lliuman ch’eqerisharqan,+ Jerusalén llaqtapi iñiqkunapas askhamanmi tukupusharqanku;+ sacerdotekunapas askhan iñipusharqanku.+
8 Estebanqa Diospa sumaq qhawarisqan kaspa atiyninwanpas junt’a kaspa iman runakunaq ñaupanpi jatun milagrokunata señalkunata ima ruwasharqan. 9 Chayllamanmi jamurqanku Kacharisqakunaq Sinagogan* nisqamanta wakin runakuna, paykunawan kuskan jamusqaku Cirene runakuna, Alejandría runakuna, Cilicia runakuna, Asia runakunapiwan, paykunaqa Estebanwan discutiqmi jamusqaku. 10 Ichaqa manan Estebanta atipayta atirqankuchu yachaywan espirituq yanapayninwan ima rimasqanrayku.+ 11 Jinan paykunaqa pakallapi juj qharikunata kallpacharqanku: “Kay runatan uyariyku Moisesmanta Diosmantawan millayta rimashaqta”, nispa rimanankupaq. 12 Jinan chay runakunaqa llaqta runakunata, umalliq runakunata,* kamachikuy simita yachachiqkunatawan ch’aqwachirqanku, chaymi Estebanman phawaykuspa jap’irqanku, jinaspa Jatun Juntaman* aparqanku. 13 Pusarqankun llulla testigokunatapas, paykunan nirqanku: “Kay runaqa templo contra kamachikuy simi contra iman mana sayk’uspa imaymanata rimashan. 14 Paypa nisqanman jinaqa Nazaret llaqtayoq Jesussi templota thuninqa, cambianqas Moisespa saqewasqanchis kamachikuykunatapas”, nispa.
15 Jatun Juntaq juñunakuyninpi llapa tiyashaqkunataq payta qhawaykurqanku, jinan paypa uyanta rikurqanku juj angelpa uyanta jina.