Jeremías
30 Kay simikunatan Jeremías Jehová Diosmanta chaskirqan: 2 “Jehová Diosmi, Israelpa Diosninmi nin: Juj libropi qelqay llapa imachus nisqayta. 3 Israel llaqtayta Judá llaqtaytawan preso apasqa kasqankumanta apakampunaypaqmi p’unchaykuna chayamushanña,+ ninmi Jehová Dios. Ñaupa taytankuman qosqay jallp’amanmi kutichimpusaq, wajmantan jallp’anku kapunqa,+ ninmi Jehová Dios, nispa”.
4 Jehová Diosmi Israelta Judatawan kaykunata nirqan.
5 Jehová Diosmi khaynata nin:
“Manchakuymanta qapariyllan uyarikushan,
manchakuyllan kashan, manan thaj kay kanchu.
6 Tapurikuychis, ¿juj qhari onqokunmanchu wawata?
Chhaynaqa, ¿imaraykutaq llapa kallpasapa qharikunata wijsanku jap’iykusqatakama rikushani?
¿Imaraykutaq onqokuq warmi jinari kashanku?+
¿Imaraykutaq uyankuri q’ellullaña kashan?
7 ¡Sinchi manchakunapaq* p’unchaymi chayqa!+
Chay p’unchay jinaqa manan juj p’unchay kanchu.
Sinchi llakikuy tiempon Jacobpaq.
Ichaqa chay manchakuy tiempomantan salvasqa kanqa”, nispa.
8 Ejercitokunata kamachiq Jehová Diosmi nin: “Chay p’unchaymi yugonta p’akisaq, kunkanmantan orqopusaq, watanantapas iskaymanmi p’itisaq; waj llaqtayoqkunaqa* manañan payta* kamachinman tukuchinqachu. 9 Paykunaqa noqa Jehová Diosninkutan serviwanqaku, paykunapaq churasqay reyninku Davidtan servinqaku”,+ nispa.
10 Jehová Diosmi nin: “Kamachiy Jacob, ama manchakuychu,
Israel llaqtalláy, ama sinchita mancharikuychu.+
Karu jallp’amantan kutichimpusayki,
preso apasqa kasqanku jallp’amantan mirayniykita kutichimpusaq.+
Jacobqa kutimpunqan, allillanmi kashanqa, thajmi kashanqa,
manan pipas manchachinqachu”,+ nispa.
11 Jehová Diosmi nin: “Qanwanmi kashani, noqan salvasayki.
Ichaqa may nacionkunamanchus ch’eqechirqayki chaykunatan chinkachisaq,+
qantan ichaqa mana chinkachisaykichu.+
Maykamachus wanachinay chaykaman wanachisayki,*
manan jinallaqa kawaqchu, castigasaykipunin”,+ nispa.
12 Jehová Diosmi khaynata nin:
“K’iriykiqa mana thaniqmi,+
k’iriykiqa mana jampiy atinan.
13 Manan pipas qanman sayapakuq kanchu,
manan lleq nishaq k’iriykitaqa jampiyta atikunmanchu.
Manan qanpaqqa jampi kanchu.
14 Llapa anchata munakuqniykikunan qonqapusunki.+
Manañan maskhamusunkikuchu.
Enemigoyki jinan k’irirqayki,+
millay runa jinan castigarqayki,
jatun juchaykimantan, imaymana mana allinkuna ruwasqaykimantan castigarqayki.+
15 ¿Imaraykun k’iriykimanta qaparinki?
¡Nanayniykiqa mana thaniqmi!
Jatun juchaykimantan, imaymana mana allinkuna ruwasqaykimantan+ chaytaqa ruwarqayki.
Llapa ch’utiqniykikunan ch’utisqa kanqaku,
llapa suwaqniykikunan suwasqa kanqaku”,+ nispa.
17 Jehová Diosmi nin: “Pisicharqasunkikuña chaypas,
mana piqpa maskhanan Sion nirqasunkikuña chaypas,+
qhaliyachisaykin, k’iriykitan jampisayki”,+ nispa.
18 Jehová Diosmi khaynata nin:
“Jacobpa miraynintan preso apasqa kasqankumanta apakampusaq,+
maypichus tiyanankutan khuyapayasaq.
Ñaupa sayasqan moqo patapin llaqtaqa sayarichisqa kanqa,+
allin perqasqa torreqa maychus kananpin kashanqa.
19 Paykunaqa graciasta qoy takikunatan takinqaku, kusisqan kashanqaku.+
20 Jacobpa wawankunaqa ñaupa tiempopi jinan kanqaku,
allin tajyasqa llaqtamanmi ñaupaypi tukuchisaq.+
Noqan sarunchaqninkunata castigasaq.+
21 Umallinqa runankuna ukhullamantataqmi kanqa,
kamachikuqninqa paykuna ukhumantan lloqsinqa.
Asuykamuway, niqtiymi payqa asuykamuwanqa.
Mana chayqa, ¿pitaq payllamanta asuykamuwanman?”,* nispa. Chhaynatan Jehová Dios nin.
22 Diosmi nin: “Qankunan llaqtay kankichis,+ noqataq Diosniykichis kasaq”,+ nispa.
23 ¡Qhawariychis! Jehová Diosmantan sinchi atiyniyoq wayra phiñakuywan jatarimunqa,+
ch’usaqyachiq wayra jinaraqmi, muyuq wayra jinaraqmi millay runakunaq umankuman uraykamunqa.
24 Jehová Diospa k’araq phiñakuyninqa manapunin thaninqachu,
imachus yuyaykusqanta junt’anankaman mana thaninqachu,
sonqonpa munasqanta ruwanankaman mana tiyaykunqachu.+
Qankunaqa tukukuy p’unchaykunapin chayta entiendenkichis.+