Marcos

4 Wajmantan Jesusqa qocha patapi yachachiyta qallarirqan, chaypin ancha askha runakuna payman juñukamurqanku. Jinan juj boteman seqaspa qocha patamanta juj chhikan ukhuman jaykurqan, jinaspa chaypi tiyaykurqan, runakunataq llapanku qocha patallapi kasharqanku.+ 2 Chaypin Jesusqa askha rijch’anachiykunata willaspa* imaymanakunata yachachiyta qallarirqan,+ paykunatan nirqan:+ 3 “Uyariychis, muju t’akaq runan t’akaq rirqan.+ 4 T’akasqanman jinan wakin mujuqa ñan pataman chayarqan, phalaq animalkunataq jamuspa chaykunata pallapurqanku. 5 Wakin mujutaq pisi jallp’ayoq qaqaman chayarqan, jinan pisilla jallp’a kasqanrayku ratu lloqsimurqan.+ 6 Inti lloqsimuqtintaq naq’epurqan, jinaspa ch’akipurqan jawallapi saphin kasqanrayku. 7 Wakin mujutaq kiska-kiska ukhuman chayarqan, kiskakunataq wiñamuspa p’ampapurqan, chaymi mana rururqanchu.+ 8 Wakintaq ancha allin jallp’aman chayarqan, wiñaspataq ruruyta qallarirqan: wakin kinsa chunkata, wakin soqta chunkata, wakintaq pachajta”,+ nispa. 9 Jesusqa nillarqantaqmi: “Uyarinanpaq ninriyoqqa uyarichun”,+ nispa.

10 Sapallan kashaqtintaq discipulonkunaqa chunka iskayniyoq apostolninkunapiwan chay willakuy willasqanmanta tapuyta qallarirqanku.+ 11 Jinan Jesusqa paykunata nirqan: “Qankunaqqa kanmi yanapaqniykichis Diospa gobiernonmanta pakasqa ch’uya yachayta entiendenaykichispaq,+ jujkunapaqmi ichaqa tukuy imapas rijch’anachiy jinalla kashan,+ 12 chhaynapin qhawashaspankupas mana rikunqakuchu, uyarishaspankupas mana entiendenqakuchu, manataqmi Diosmanpas kutirikunqakuchu, chhaynapi mana perdonasqa kanankupaq”,+ nispa. 13 Chaymantan nillarqantaq: “Manataq chay rijch’anachiy willasqayta entiendenkichischu chayqa, ¿imaynapitaq wakin rijch’anachiytari entiendewaqchis?

14 ”Muju t’akaqqa Diospa siminta willaqmi.+ 15 Wakin runakunaqa ñan jinan kanku, paykunapin Diospa siminta t’akakun, ichaqa uyariqtinku jinan Satanasqa+ jamuspa sonqonkupi t’akasqa simita apapun.+ 16 Wakin runakunataq qaqa jina kanku, paykunaqa Diospa siminta uyarispa jinan ancha kusikuywan chaskikunku.+ 17 Sonqonkupi muju mana saphichakusqanraykun ichaqa juj tiempolla allin kanku, Diospa siminrayku ñak’ariy qatikachay ima kaqtintaq qhepaman kutipunku.* 18 Wakin runakunataq kiska-kiska jina kanku, paykunaqa uyarikunkun Diospa siminta.+ 19 Ichaqa kay tiempopi* llakipakuykuna,+ qhapaq kaykuna,*+ imaymana munapayaykuna+ iman sonqonkuman jaykuspa simita p’ampapun, chhaynapitaq mana ruruqman tukupun. 20 Wakin runakunañataqmi ichaqa allin jallp’a jina kanku, paykunaqa Diospa siminta uyarispan sumaqta chaskikunku, jinaspa rurunku wakin kinsa chunkata, wakin soqta chunkata, wakintaq pachajta”,+ nispa.

21 Jesusqa nillarqantaqmi: “Mecherotaqa* manan canasta* ukhumanchu nitaq puñunaq pachanmanchu churakun ¿riki? Aswanpas k’anchana patamanmi churakun.+ 22 Ima tapasqa kaqpas rijurichisqan kanqa, ima allin pakasqa kaqpas sut’iman orqosqan kanqa.+ 23 Uyarinanpaq ninriyoqqa uyarichun”,+ nispa.

24 Payqa nillarqantaqmi: “Tukuy yuyaywan uyariwaychis.+ Askhata qonkichis chayqa, askhallatataqmi chaskinkichis, chaymanta aswan askhataraqmi chaskinkichispas. 25 Pipas kaqniyoqmanqa astawanraqmi qokunqa,+ mana kaqniyoqmantan ichaqa imanña kanman chaypas, qechusqa kanqa”,+ nispa.

26 Jesusqa nillarqantaqmi: “Diospa gobiernonqa jallp’aman mujuta t’akaq runamanmi rijch’akun, 27 paymi tutapi puñun, p’unchayamuqtintaq jatarimun, chaykamataq mujuqa ch’ijchimuspa jatunta wiñan; chay runaqa manan yachanchu imayna chay kasqanta. 28 Jallp’aqa kikillanmantan pisi-pisimanta ruruchin: Ñaupaqtan q’achuta wiñachin, chaymantataq espigata rijurichimun, chaymantañataq espigapi ruruta junt’achin. 29 Ruru poqoqtintaq ichhunawan rutuyta qallarin cosecha tiempoña kasqanrayku”, nispa.

30 Jesusqa nillarqantaqmi: “¿Imawanmi tupanachisunman Diospa gobiernonta? ¿Ima rijch’anachiywanmi entiendesunman? 31 Chayqa mostaza muju jinan, chay mujuqa jallp’aman t’akasqa kashaspaqa kay pachapi kaq llapa mujukunamantapas aswan juch’uyllan.+ 32 Lloqsimuspanmi ichaqa huertapi llapa plantakunamantapas* aswan jatuntaraq wiñan, k’allmankunapas jatuntan wiñan, chaymi phalaq animalkunapas chaypi q’esachakuyta atinku”, nispa.

33 Jesusqa chhayna imaymana rijch’anachiykunata willaspan+ Diospa siminmanta runakunaman rimapayaq, entiendeyta atisqankuman jinallan chayta ruwaq. 34 Rijch’anachiykunata willaspapunin paykunamanqa rimapayaq, discipulonkunamanmi ichaqa sapaqllapi tukuy imatapas entiendechiq.+

35 Chay p’unchay ch’isintan Jesusqa discipulonkunata nirqan: “Jaku qocha chimpaman”,+ nispa. 36 Chaymi paykunaqa llapa runakunata kachapuspa imaynachus kasharqan jinallata Jesusta botepi aparqanku, chaypiqa juj botekunapas kashallarqantaqmi.+ 37 Jinan manchay wayra jatarirqan, chaymi unuqa sinchita aytikuspa boteman waqtakurqan, jinaspa millp’upusharqanña.+ 38 Jesusqa boteq qhepanpin saunaykukuspa puñusharqan. Jinan rijch’arichispa nirqanku: “Yachachikuq, ¿manachu imapas qokusunki? ¡Chinkaykushanchisñan!”, nispa. 39 Chaymi Jesusqa jatarimuspa wayrata phiñarikurqan, jinaspa qochata nirqan: “¡Ch’inlla kay! ¡Upallay!”,+ nispa. Wayrataq thanipurqan, jinan thaj kapurqan. 40 Paykunatataq nirqan: “¿Imaraykun sinchi mancharisqa kashankichis? ¿Manaraqchu iñiyniykichis kan?”, nispa. 41 Paykunataq sinchi mancharisqa ninakurqanku: “¿Pipunitaq kay runari, chaytaq wayrapas qochapas kasunri?”,+ nispanku.