1 Corintios
5 ¿Cheqachu qankuna ukhupi qhelli jucha* ruway kashan?+ Juj runataqsi taytanpa warminwan tiyashán.+ Chhayna qhelli jucha ruwayqa manamá ni mana iñiqkuna ukhupipas* rikukunchu. 2 Icha, ¿kusisqachu chaywan kashankichispas? ¿Manachu aswanpas khuyay llakisqa kashanaykichis?+ ¿Manachu chay juchallikuq runatapas qankuna ukhumanta qarqonaykichis?+ 3 Manaña qankunawanchu kashani chaypas, yuyayniyqa qankunawanmi kashan,* chay jucha ruwaq runatapas ñan juchachaniña chaypipas kashayman jina. 4 Señorninchis Jesuspa sutinpi juñunakushaqtiykichismi noqapas Señorninchis Jesuspa atiyninwan yuyayniypi chaypi kashasaq, jinan qankunaqa 5 chay juchallikuq runata Satanasman entregankichis,+ chhaynapi aycha ch’usaqyachisqa kananpaq, espiritutaq Señorpa p’unchayninpi+ salvasqa kananpaq.
6 Manan allinchu kashan jatunchakusqaykichisqa. ¿Manachu yachankichis pisi levaduralla* llapa masata poqochisqanta?+ 7 Chay levadurayoq ñaupaq kaq masata wijch’uychis, chhaynapi mana levadurayoq mosoq masa kanaykichispaq. Pascua Fiestapaq corderonchis Cristoqa+ sacrificasqañan kapun.+ 8 Chayrayku chay fiestaman qatiq fiestataqa+ ama levadurayoq ñaupa masawanchu ruwasun, nitaq jucha ruway, millay ruway levadurawanchu; aswanpas ruwasun mana levadurayoq t’antawan, chayqa ch’uya sonqo kay cheqaq kay iman.
9 Apachimusqay cartapin qelqamurqaykichis: “Ama qhelli juchapi puriqkunawanqa juñukuychischu”, nispa. 10 Chaytaqa nimurqaykichis manan kay pachapi qhelli juchapi puriqkunamanta, sinchi munapayaqkunamanta, suwakunamanta, ídolo adoraqkunamantapas tukuy imapi t’aqakunaykichispaqchu,+ chhayna kaqtinqa kay pachamantachá lloqsipunaykichis kanman.+ 11 Kunanmi ichaqa niykichis: Pipas iñiqmasinchis kashaspa qhelli juchapi purishanman, sinchi munapayaqpas kanman,+ ídolo adoraqpas kanman, millay k’amikuqpas kanman, machaqpas kanman,+ suwapas kanman+ chayqa, ama chhayna runawanqa juñukuychischu,+ amapuni chhayna runawanqa mijuychispaschu. 12 Manan noqaq ruwanaychu jawapi kaqkunata juzgayqa. Qankunaqa iñiqkunatan juzganaykichis, 13 Diosñan juzganqa jawapi kaqkunataqa.+ Chayraykun Diospa simin qelqaqa nin: “Qankuna ukhumanta qarqoychis juchallikuq runata”,+ nispa.