1 Samuel

25 Tiempowanmi Samuelqa+ wañukapurqan. Chaymi Israel runakunaqa llapanku juñukuspa waqaykurqanku, chaymantataq tiyasqan Ramá+ llaqtapi p’ampapurqanku. Davidtaq Parán ch’inneqman jaykurqan.

2 Maón+ llaqtapin tiyarqan juj qhapaq runa, paypa uywankunan kasharqan Carmelo+ llaqtapi.* Ovejankunan karqan kinsa waranqa, cabrankunataq waranqa. Chay p’unchaykunapin payqa Carmelo llaqtapi ovejankunaq willmanta rutuchisharqan. 3 Chay runaqa karqan Calebpa familianmantan,+ sutinmi karqan Nabal,+ esposanpa sutintaq Abigaíl.+ Abigailqa munay warmin karqan, allin yuyayniyoqtaqmi karqanpas, qosanmi ichaqa millay runa karqan mana allinta ruwaq.+ 4 Ch’inneqpi kashaspan Davidqa yacharurqan Nabalqa ovejankunaq willmanta rutuchishasqanta. 5 Chaymi Davidqa chunka kamachinkunata nirqan: “Carmelo llaqtata riychis Nabalta maskhaq, jinaspa sutiypi tapuykapuwaychis imayna kashasqanta. 6 Jinaspan ninkichis: Unayta kausakuy, qanpas wasiykipi llapa tiyaqkunapas allillan kachunku, tukuy ima kaqniykikunapas allillanpuni kachun. 7 Ovejaykikunaq willmanta rutuchishasqaykitan willawanku. Michiqniykikuna noqaykuwan kashaqtinqa manan paykunataqa imanarqaykupaschu,+ manan pipas imallatapas qechurqanchu Carmelo jallp’api michishaqtinkuqa. 8 Tapullaypas runaykikunata, paykunan aswan allinta willasunkiku. Kay p’unchaykunaqa kusikunapaqmi, chayrayku valekuyki kamachiykunata sumaqta chaskiykapuwanaykipaq. Chaymantapas ama jinachu kay, kay kamachiykikunaman noqamanpas* imallatapas qoykuwayku,+ nispa”.

9 Jinan Davidpa runankunaqa Nabalpa kasqanman rirqanku, jinaspa Davidpa kamachisqanman jina nirqanku. Rimayta tukuqtinkutaq 10 Nabalqa Davidpa kamachinkunata nirqan: “¿Pitaq Davidri? ¿Imataq creekun chay Jesepa churinri? Kunan p’unchayqa askhamá patronninmanta ayqekuq runakunaqa kashan.+ 11 ¿Imaraykutaq qankunamanri unuytapas, t’antaytapas, aychaytapas qoykichisman? Chaykunaqa oveja rutuqniykunapaqmi. ¡Maymantaraqchá qankunaqa kakunkichispas!”, nispa.

12 Jinan Davidpa runankunaqa kutimpurqanku, jinaspa Nabalpa nisqanta lliuta Davidman willarqanku. 13 Chaymi Davidqa kaq ratu runankunata kamachirqan: “¡Sapankaykichis espadaykichista alistakuychis!”,+ nispa. Jinan runankunaqa llapallanku espadankuta alistakurqanku, Davidpas alistakurqanmi. Davidqa tawa pachaj jina runankunantinmi rirqan, iskay pachaj runankunataq q’epikunata cuidaq qhepakurqanku.

14 Chay pasashaqtinmi Nabalpa jujnin kamachinqa Abigailman willarqan: “Davidmi ch’inneqmanta kamachinkunata kachamusqa patronwan rimananpaq, paykunaqa napaykuytan apamusqaku, patronmi ichaqa phiñarikuspa millayta k’amiykun.+ 15 Chay runakunaqa sumaq sonqo runakunan karqanku, manan jayk’aqpas imanawarqankupaschu, allintan tratawarqanku. Paykunawan kashaqtiykuqa manan pipas imallaykutapas qechuwarqankuchu.+ 16 Paykunaqa allin perqa jinan tutapas p’unchaypas noqaykupaq karqanku. Chaymantapas ovejakunata michishaqtiykuqa tukuy tiempon cuidawarqanku. 17 Patronniyqa mana rimaykuna millay runan,+ chaymi qan qhawarinayki imachus ruwanaykita. Manachus imatapas ruwanki chayqa patronniymi wasinpi kaqkunapiwan sinchi mana allinpi tarikunqa”,+ nispa.

18 Jinan Abigailqa+ usqhaylla alistarqan iskay pachaj t’antata, iskay jatun jarrapi vinota, aderezasqa pisqa oveja aychata, pisqa canasta* jank’ata, pasasmanta pachaj tortakunata, ch’aki higosmanta iskay pachaj tortakunatawan.* Chaykunatan llapanta asnokunaman cargarqan.+ 19 Chaymantataq kamachinkunata nirqan: “Ñaupashaychisña, kunallan aypamusaykichis”, nispa. Qosan Nabalmanmi ichaqa mana imatapas willarqanchu.

20 Abigailqa juj asnopi sillaykuspan pakallapi orqo qhatata uraykamusharqan. Davidtaq runankunantin Abigailpa kasqanman jaykumusharqan, jinaspa qonqaylla tuparqanku. 21 Davidqa sonqollanpin nisharqan: “Yanqamá kay runaq kaqninkunataqa ch’inneqpi cuidaysishasqani. Noqa kashaqtiyqa manan pipas imallantapas qechurqanchu,+ paytaq ichaqa chay allin ruwapusqayta mana allinwan kutichiwan.+ 22 Sichus manaraq paqarimushaqtin kay runaq runankunata* lliuta mana wañuchisaqchu chayqa, Dios sinchita castigachun enemigoykunata”,* nispa.

23 Abigailtaq Davidta rikuspa usqhaylla asnonmanta uraykurqan, jinaspa Davidpa ñaupanpi qonqorikuspa pampakama k’umuykurqan. 24 Davidpa chakinman k’umuykuspataq nirqan: “Wiraqocháy, noqata juchachawayqa. Ama jinachu kay uyariykuway kay kamachiykita. 25 Wiraqocháy, ama kasuychu Nabalpa nisqasuykitaqa.+ Chay runaqa sutinpa nisqan jinan millay runa, chaymi sutinpas Nabal,* mana yuyayniyoq runa. Noqa kamachiykiqa manan tuparqanichu kachamusqayki runakunawanqa. 26 Wiraqocháy, wiñaypaq kausaq Jehová Diospa sutinpi qanpa sutiykipi iman jurani, Jehová Diosmi kay p’unchaypi jark’ashasunki+ amapuni qan kikiyki makiykiwan justiciata ruwanaykipaq, chhaynapi runaq wañusqanmanta ama juchachasqa kanaykipaq.+ Lliu enemigoykikuna qanta wañuchiy munaqkunapas Nabal jina kapuchunku. 27 Wiraqocháy, kay regalotan*+ apamushaykichis,+ chaskiykuway kay kamachiykimanta. 28 Imapipas phiñachirqayki chayqa perdonaykuway wiraqocháy. Noqaqa allintan yachani Jehová Diosqa qantapas familiaykitapas kay llaqtapi unayta kamachinaykichispaq churasqasuykichista.+ Qanqa manan ima mana allintapas ruwarqankichu,+ Jehová Diospa guerrankunapitaqmi+ maqanakunkipas. 29 Wiraqocháy, pipas wañuchinasuykipaq qatikachasunki chayqa, Jehová Diosmi kausay bolsapi kausayniykita allinta waqaychanqa. Enemigoykikunaq kausaynintan ichaqa rumita jina karuman warak’anqa. 30 Jehová Dios tukuy allinkuna prometesqasuykita junt’aqtinqa, Israelpi umallita churasuqtiykiqa,+ 31 manan sonqoykipi pesapakunkichu; sichus mana qan kikiykichu makiykiwan justiciata ruwanki chayqa, manataq pitapas wañuchinkichu chayqa manan imamantapas pesapakunayki kanqachu.+ Wiraqocháy, Jehová Dios bendicionninta qoykusuqtiykiqa kay kamachiykita yuyarikuwanki”, nispa.

32 Jinan Davidqa Abigailta nirqan: “¡Alabasqa kachun Israelpa Diosnin Jehová Diosqa! Paymi qantaqa kachamurqasunki. 33 ¡Alabasqa kachun allin yuyayniyoq kasqayki! Qanmi jark’awarqanki noqa kikiy justicia ruwanaymanta, runata wañuchinaymantapas,+ Diosmi chay ruwasqaykimantaqa bendecisunki. 34 Israelpa Diosninmi, wiñaypaq kausaq Jehová Diosmi jark’awarqan qanta ama imananaypaqpas,+ paypa sutinpin jurani, manachus kay p’unchay usqhaylla jamuwaq karqan chayqa,+ Nabalpa llapa wasinpi kaq runakunatan* manaraq paqarimushaqtin lliuta wañuchiyman karqan”,+ nispa. 35 Chaymantataq Davidqa Abigailpa apamusqanta chaskirqan, jinaspa nirqan: “Amaña llakikuychu, thajlla wasiykiman kutipuy. Niwasqaykitaqa llapantan uyarini, chayman jinataqmi ruwasaqpas”, nispa.

36 Jinan Abigailqa wasinman kutipurqan Nabalpa kasqanman. Nabaltaq ichaqa rey jinaraq festejakushasqa. Payqa kusisqan kashasqa, nishu machasqataqmi kashasqapas. Chaymi Abigailqa mana imanirqanpaschu. 37 Tutamantanmi ichaqa Nabalman lliuta willarqan machasqanmanta sanoña kashaqtin. Jinan Nabalpa sonqonqa wañusqa runaq sonqon jina kapurqan, cuerpontaq rumi jina mana kuyuripurqanchu. 38 Chunka p’unchaymanta jinataq Jehová Diosqa Nabalta wañuchipurqan.

39 Nabalpa wañupusqanta yacharuspan Davidqa nirqan: “¡Alabasqa kachun Jehová Diosqa! Nabalqa pisichawarqanmi,+ Jehová Diostaq defiendewarqan.+ Diosmi jark’awarqan mana allinta ama ruwanaypaq,+ Nabaltataq mana allin ruwasqanmanta castigarqan”, nispa. Chaymantataq Davidqa Abigailman willachimurqan paywan casarakunanpaq. 40 Jinan Davidpa kamachinkunaqa Carmelo llaqtaman chayaspa Abigailta nirqanku: “Wiraqochayku Davidmi kachamushawanku, paymi qanwan casarakuyta munan”, nispa. 41 Chayta niqtinku jinan Abigailqa pampakama k’umuykuspa nirqan: “Liston kashani wiraqochaypa kamachin kanaypaq, kamachinkunaq chakinta maqchinaypaqpas”,+ nispa. 42 Jinan Abigailqa+ usqhaylla sayarispa asnonman sillaykukurqan, jinaspa Davidpa kamachinkunawan kuska rirqan. Abigailpa qhepantataq pisqa warmi kamachinkuna chakillapi rirqanku. Jinan Abigailqa Davidpa esposan kapurqan.

43 Davidqa ñan casarakusqaña Jezrel+ llaqtayoq Ainoanwan,+ jinan Abigailwan Ainoanwanqa Davidpa esposankuna kapurqanku.+

44 Saulmi ichaqa Davidpa esposan Micalta+ casararachipusqa Galin llaqtayoq Lais runaq churin Paltiwan.+ Micalqa Saulpa ususinmi karqan.