Salmos
Davidpa takin.
28 Diosníy Jehová, pakakunay qaqa, sapa kutillanmi wajakamuyki,+
ama mana uyariqmanqa tukuychu, uyarimuway wajakusqayta.
Manachus mañakusqayta uyarimunki chayqa,
jallp’a sonqoman jaykupuqkuna jinan kapusaq.+
2 Qaparisparaq yanapay mañakusqayta uyarimuway,
ch’uya wasiykiq ukhu kaq cuartonman makiyta jaywarispa wajakamusqayta uyarimuway.+
3 Ama millay runakunatawan kuskataqa aysawaychu,
ama mana allin ruwaykunaman yachasqa kaqkunatawanqa apawaychu;+
paykunaqa simillankuwanmi runamasinkuta sumaqta rimapayanku,
sonqonkun ichaqa millay ruwaykunawan junt’a kashan.+
4 Imachus ruwasqankuman jina paykunaman kutichipuy,+
mana allin ruwasqankumanta paykunata castigay.
Makinkuq imachus ruwasqanman jina paykunaman pagapuy,
ruwasqankuman jinapuni paykunamanqa kutichipuy.+
5 Paykunaqa manan reparankuchu Jehová Diospa ruwasqankunataqa,+
manan reparaqpas tukunkuchu makinkunaq imachus ruwasqankunataqa.+
Diosmi paykunataqa ñut’unqa, manan yanapanqapaschu.
6 Jatunchasqa kachun Jehová Diosqa,
wajakusqaytan payqa uyarin.
Paypa yanapaynintan chaskirqani,
yanapayninwanmi sonqoy kusisqa kashan.
Takiywanmi payta jatunchasaq.
8 Jehová Diosmi llaqtanpa kallpanqa,
paymi pakakuna allin perqasqa llaqtaqa,
paymi ajllakusqanta libraqqa.+
9 Llaqtaykita libray, herenciayki llaqtata bendeciy.+
Paykunata michiy, wiñaypaq marq’ayniykipi apay.+