2 Crónicas

17 Chaymantataq Asapa churin Jehosafat+ rey kapurqan, paypa kamachikuyninqa allin tajyasqan Israelpiqa kapurqan. 2 Jehosafatqa Judá ayllupi kaq allin perqasqa llaqtakunapin churarqan askha soldadokunata. Chaymantapas payqa tropantintan soldadokunata churarqan lliu Judá ayllupi, jinallataq taytan Asá jap’ikapusqan Efraín ayllupi kaq llaqtakunapipas.+ 3 Jehosafatqa ñaupa taytan David jinan Diospa kamachisqanman jina kausarqan,+ payqa manan Baal idolokunamanqa k’umuykurqanchu, chaymi Jehová Diosqa Jehosafat-ta yanapashallarqan. 4 Jehosafatqa taytanpa Diosnintan maskharqan,+ paypa kamachikuyninkunatan kasukurqan, jinaspapas payqa manan Israel runakuna jinachu kausarqan.+ 5 Jehová Diosmi Jehosafatpa kamachikuyninta allinta tajyachirqan,+ Judá ayllu runakunataq payman regalokunata apaqku. Chhaynapin Jehosafatqa aswan atiyniyoqman tukupurqan, qhapaqtaq kapurqanpas.+ 6 Jehosafatqa tukuy sonqowanmi kallpachakurqan Jehová Diospa kamachisqanman jina kausananpaq, chaymi payqa Judá ayllumanta yupaychana patakunata* chinkachirqan,+ yupaychanapaq sayashaq k’ullukunatapas* wit’urqan.+

7 Kinsa wataña kamachikushaspan Jehosafatqa wajachirqan Judá ayllupi kaq autoridadkunata, chhaynapi chay ayllupi kaq llaqtakunapi runakunata yachachinankupaq. Paykunan karqanku: Ben-Ail, Abdías, Zacarías, Netanel, Micayapiwan. 8 Paykunawan kuskan kasharqan Leví ayllumanta kay runakuna: Semaya, Netanías, Zebadías, Asael, Semiramoj, Jehonatán, Adonías, Tobiya, Tof-Adoniaspiwan. Chaymantapas paykunawanmi kashallarqantaq sacerdote Elisamá sacerdote Jehorampas.+ 9 Paykunan llapa Judá ayllupi kaq llaqtakunaman rirqanku, jinaspa llapa runakunaman yachachirqanku Jehová Diospa kamachikuynin qelqamanta.+

10 Chayraykun Judá aylluq muyuriqninpi kaq llaqtakunaqa Jehová Diosta sinchitapuni manchakurqanku, chaymi chay llaqta runakunaqa mana Jehosafat contra maqanakurqankuchu. 11 Filistea runakunan impuestota paganankupaq Jehosafatman apamuqku regalokunata qolqeta ima. Arabia runakunataq apamuqku qanchis waranqa qanchis pachaj orqo ovejakunata, qanchis waranqa qanchis pachaj orqo cabrakunatawan.

12 Jehosafatqa aswan-aswan atiyniyoqmi kapurqan.+ Payqa Judá ayllupin jatarichishallarqan allin perqayoq llaqtakunata,+ mijuy waqaychana llaqtakunatapas.+ 13 Chaymantapas payqa Judá ayllupi kaq llaqtakunapin imaymanakunata ruwarqan. Allin maqanakuq soldadonkunataq Jerusalén llaqtapi kasharqan. 14 Chay soldadonkunan t’aqasqa karqanku mayqen familiamantachus kasqankuman jina. Judá ayllumantan karqan waranqa-waranqa soldadokunaq umallinkuna. Jujninmi karqan umalli Ajná, paypa soldadonkunan karqan kinsa pachaj waranqa allin maqanakuq soldadokuna.+ 15 Juj kaq umallitaq karqan Jehoanán, soldadonkunataq karqan iskay pachaj pusaq chunka waranqa soldadokuna. Jehoananpa umallintaq karqan Ajná. 16 Juj umallitaq karqan Zicripa churin Amasía, soldadonkunataq karqan iskay pachaj waranqa allin maqanakuq soldadokuna. Amasiaqa payllamantan ofrecekurqan Jehová Diosta servinanpaq, paytapas Ajnami umallirqan. 17 Benjamín ayllumantataq+ karqan allin maqanakuq Eliadá, soldadonkunataq karqan iskay pachaj waranqa, chay soldadokunan karqanku flechana arcokunayoq jark’apakuna escudokunayoq ima.+ 18 Juj umallitaq karqan Jehozabaj, paypa soldadonkunataq karqan pachaj pusaq chunka waranqa soldadokuna, chay soldadokunaqa guerrapaq allin preparasqan karqanku. Jehozabajpa umallintaq karqan Eliadá. 19 Llapa paykunan reyta servirqanku. Judá ayllupi kaq allin perqasqa llaqtakunapi kaq soldadokunapas reytan servirqanku.+