Joel
2 “¡Sion orqopi waqrata tocaychis!+
Ch’uya orqoypi maqanakuypaq jina qapariychis.
Kay jallp’api kaqkuna khatatatachunku,*
¡Jehová Diospa p’unchayninqa chayamushanñan!+ ¡Qayllapiñan kashan!
2 Chay p’unchayqa tutayaq laqhayaq p’unchaymi,+
tutayaq yana phuyu p’unchaymi,+
imaynan pacha illarimuqtin k’anchay orqo patakunaman mast’arikun chhaynan chay p’unchayqa.
Kanmi juj ancha jatun llaqta, atiyniyoq llaqta,+
manan jayk’aqpas chhayna llaqtataqa rikukurqanchu,
manataqmi wajmantaqa jayk’aqpas rikukunqañachu,
qhepa miray runakunapas manan chaytaqa rikunqakuchu.
3 Chay llaqtaq ñaupantan manchay nina rauray rishan,
qhepantataq ch’usaqyachiq nina rauray rishan.+
Maymanchus rishan chay jallp’aqa Edén huerta jinan,+
qhepantaq ch’usaq pampallaña kashan,
manapunin imapas qhepanñachu.
4 Chay llaqta runakunaqa caballokuna jinan kanku,
guerrapaq yachachisqa caballokuna jinataqmi phawankupas.+
5 Orqo patakunapi carretakunaq raqraqesqan jinaraqmi suenasqankuqa uyarikun,+
ch’aki qoratapas nina ruphaykushanman jinaraqmi uyarikun.
Paykunaqa maqanakunankupaq listo kashaq kallpasapa soldadokuna jinan kanku.+
6 Paykunata rikuspan llaqtakunaqa khatatatanqakuraq,
manchakuymantan chiriyanqakuraq.
7 Paykunaqa maqanakuqkuna jinan phawaykunku,
soldadokuna jinan perqakunatapas seqanku.
Mayninchus rinankutan sapankapas phawanku,
manan maymanpas q’ewinkuchu.
8 Manan tanqanakunkuchu,
sapankan mayninchus phawanankuta phawanku.
Mayqenninkupas flechawan k’irisqa urman chayqa,
manan jujkunaqa ayqekunkuchu.
9 Llaqtamanmi phawaykunku, perqa patankunatan phawanku.
Wasikunamanmi seqanku, suwa jinan ventanankunata jaykunku.
10 Paykunaq ñaupanpiqa kay pachapas khatatatanmi, cielopas chhafchirikunmi.
Intipas killapas tutayanmi,+
ch’askakunapas arphayapunmi.
11 Jehová Diosqa soldadonkunaq ñaupanpin fuerteta qaparinqa,+ paypa ejercitonqa sinchi askhan.+
Diospa rimasqanta junt’aqqa atiyniyoqmi.
Jehová Diospa p’unchayninqa jatunmi, manchakunapaq p’unchaymi.+
¿Pitaq chay p’unchaytari aguantayta atinman?”.+
12 Jehová Diosmi nin: “Tiempoqa kashanraqmi, tukuy sonqoykichiswan noqaman kutirikamuwaychis,+
ayunaspa,+ waqaspa, khuyayta llakikuspa kutirikamuwaychis.
13 Sonqoykichista llik’ikuychis+ ama p’achallaykichistachu,+
Jehová Diosniykichisman kutirikuychis,
payqa sumaq sonqo, khuyapayakuq Diosmi,
pacienciakuq,*+ mana tukukuq may jatun munakuyniyoq Diosmi.+
Payqa ñak’ariyta chayachimunanpaq piensasqantapas cambianmanmi.
14 Jehová Diosqa cambianmanpaschá yuyaykusqanta,+
bendecinmanpaschá chajraykichistapas,
chhaynapi jak’u ofrendata vino ofrendatapas payman jaywanaykichispaq.
15 ¡Sion orqopi waqrata tocaychis!
Ayunanankupaq runakunata kamachiychis.* Diosniykichista yupaychanaykichispaq juñukuychis.+
16 Llaqta runakunata juñuychis, runakunata ch’uyanchaychis.+
Kuraq runakunata* juñuychis, erqekunata ñuñuq wawakunatapas juñuychis.+
Casarakuq qhari cuartonmanta lloqsimuchun, casarakuq warmipas puñunan wasimanta lloqsimuchun.
17 Diospa wasin punkumanta altarman rinapi,+
Jehová Diospa kamachin sacerdotekuna waqaspa nichunku:
Jehová Diosniyku, khuyapayay kay llaqtaykita.
Amayá p’enqaypiqa saqerpariwaykuchu,
amayá waj nacionkunaq makinpiqa saqerpariwaykuchu.
Amayá waj llaqtakunaqa, ¿maytaq Diosninkuri?,+ nichunkuchu, nispa.
18 Jinan Jehová Diosqa anchata sientespa jallp’anta pakaykunqa,
llaqtantapas khuyapayanqa.+
19 Llaqtantan Jehová Diosqa ninqa:
Qankunamanmi qoshaykichis trigota, vinota, aceiteta,
chaykunawanmi qankunaqa sajsa kankichis.+
Waj nacionkunapas manañan pisichasunkichischu.+
20 Wichay ladomanta jamuqtan qankunamanta karuman apasaq,
ch’inneq ch’aki pampamanmi wijch’usaq.
Ejercitonpa ñaupanta purimuqtan inti lloqsimuy lado qochaman* wijch’usaq,
ejercitonpa qhepanta purimuqtataq inti jaykuy lado lamar-qochaman* wijch’usaq.
Chaypin ayanqa asnarinqa,
putuntaraqmi asnarinqa.+
Ancha jatun ruwaykunatan ruwasaq, nispa.
21 Jallp’a pacha, ama manchakuychu, aswanpas kusikuy,
Jehová Diosqa musphanapaq jina kaqkunatan ruwanqa.
22 Campokunapi animalkuna, ama manchakuychischu,
lliu ch’inneq pampakunan q’omer kapunqa,+
sach’akunapas sumaqtan rurunqa.+
Higos sach’apas uvas sach’apas allintan rurunqa.+
23 Sionpi tiyaqkuna, kusikuychis, Jehová Diosniykichispa ruwananmanta kusikuychis.+
Payqa ñaupaq paratapas paranallantan chayachimusunkichis.
Askhanpin parataqa chayachimusunkichis,
ñaupa tiempopi jinan ñaupaq paratapas qhepa paratapas chayachimusunkichis.+
24 Era patakunapin* askha trigo kanqa,
uvas sarunakunapipas phullchishaqraqmi vinopas aceitepas kanqa.+
25 Kachamusqay jatun ejercitoq mijusqanta,+
askha watakuna mijusqan cosechaykichistan kutichipusaykichis,
rafrayoq langostaq,* mana rafrayoq langostaq, tukuyta q’aruq langostaq, rajrapu* langostaq mijusqantan kutichipusaykichis.
26 Sajsanaykichiskaman mijunkichis,+
chaymantataq Jehová Diosniykichista jatunchankichis,+
payqa musphanapaq kaqkunatan ruwapurqasunkichis.
Manañan jayk’aqpas llaqtayqa p’enqaypi tarikunqañachu.+
27 Chhaynapin qankunaqa yachankichis Israel llaqta ukhupi kashasqayta,+
noqa Jehová Diosniykichis kasqaytapas.+ ¡Manan waj Diosqa kanchu!
Manañan jayk’aqpas llaqtayqa p’enqaypi tarikunqañachu.
28 Chaykuna qhepatan imaymana clase runakunaman espirituyta jich’aykamusaq,+
jinan churiykichiskunapas ususiykichiskunapas profetizanqaku,
kuraq runaykichiskunapas imaymanatan mosqokunqaku,
qankuna ukhupi kaq waynakunapas rijuriykunatan rikunqaku.+
29 Qhari kamachiykunamanpas warmi kamachiykunamanpas,
chay p’unchaykunapin espirituyta jich’aykamusaq.
30 Admiranapaq ruwaykunatan janaq pachapipas kay pachapipas ruwasaq,
yawarmi kanqa, kallanqataqmi ninapas q’osñipas.+
31 Manaraq Jehová Diospa manchakunapaq jatun p’unchaynin+ chayamushaqtinmi,
inti tutayanqa, killapas yawarman tukunqa.+
32 Jehová Diospa sutinta llapa wajakuqkunaqa salvasqan kanqaku.+
Jehová Diospa nisqanman jinan ayqekuqkunaqa+ Sion orqopi Jerusalenpi ima kashanqaku.
Jehová Diospa wajasqan mana wañuchisqa kaqkunaqa chaypin kashanqaku”, nispa.