1 Samuel
2 Jinan Anaqa Diosmanta mañakurqan:
“Jehová Diosraykun sonqoyqa kusisqa kashan,+
Jehová Diosmi kallpa qowaqniyqa.
Simiymi kicharikun enemigoykunapaq.
Diosníy, salvawasqaykimantan may kusisqa kashani.
2 Jehová Diosníy, manan pipas qan jina ch’uyaqa kanchu.
Manapunin pipas qan jinaqa kanchu.+
Manan pipas qan jina qaqaqa kanchu.+
3 Amaña jatunchakuspa rimaychisñachu.
Amaña alabakuspa rimaychisñachu,
Jehová Diosqa lliutan imatapas yachan,+
payqa chanintan runakunaq ruwasqanta juzgan.
4 Kallpasapa runakunaq flechanan arcotan ñut’un,
pisi kallpa runakunatataq kallpachan.+
5 Askha mijunayoqkunan kunanqa llank’anku,
yarqachikuqkunataq sajsa mijusqa kanku.+
6 Jehová Diosmi kausay qoqpas kausay qechuqpas.
Paymi runakunata Sepulturaman* apaykuqpas, chaymanta kausarichimuqpas.+
7 Jehová Diosmi wajchayachiqpas* qhapaqyachiqpas.+
Paymi k’umuykachiqpas jatunchaqpas.+
Paykunatan autoridadkunawan kuskata tiyachin,
paykunamanmi jatunchasqa puestokunata qon.
Jehová Diosmi kay pachaq cimentacionninkunata churaqqa,+
paymi chay pataman ruruchiq jallp’atapas churaqqa.
Runaqa manan kallpallanwanqa imatapas atipanmanchu.+
10 Jehová Diosmi pay contra sayariqkunata ñut’unqa,+
phiñakuyninmi chay runakunapaq rayo jinaraq t’ojanqa.+
Jehová Diosqa lliu kay jallp’a pachantintan juzganqa.+
Paymi ajllakusqan reyman atiyta qonqa.+
Paymi ajllakusqanman kallpata qonqa”,+ nispa.
11 Chaymantataq Elcanaqa Ramá llaqtapi wasinman ripurqan, wawan Samueltataq Elí sacerdotewan kuskata saqerqan Jehová Diosta servinanpaq.+
12 Sacerdote Elipa churinkunaqa millay runakunan karqanku,+ paykunaqa manan Jehová Diosta respetaqkuchu. 13 Paykunamanqa Israel runakunan sacerdote kasqankurayku tupaqninta qoqku,+ ichaqa manan chaywan contentochu kaqku. Pipas sacrificiota jaywaqtinqa sacerdoteq yanapaqninmi aycha t’impushasqan ratu kinsa puntayoq trincheta aparikuspa jamuq. 14 Chay trincheta mankakunaman winaykuspataq aychata orqoqku, tukuy chaywantaq sacerdote qhepakapuq. Chaytan ruwaqku llapan Israel runakuna Siló llaqtaman riqtinku. 15 Chaymantapas manaraq wirata ruphachishaqtinkun+ sacerdoteq yanapaqninqa sacrificio jaywaq runata niq: “Sacerdoteman aychata qoy q’aspananpaq. Payqa janku aychatan munan, manan t’impusqa aychataqa munanchu”, nispa. 16 Sacrificio jaywaq runataq niq: “Ñaupaqtaqa wirantaraq ruphachiychis,+ chaymantaña ima munasqaykitapas apakunki”, nispa. Jinan sacerdoteq yanapaqninqa niq: “Apuray qoway, mana jinaqa qechurusaykin”, nispa. 17 Sacerdotekunata yanapaqkuna chay ruwasqankuqa sinchi mana allinpunin Jehová Diospaqqa karqan,+ paykunaqa manan respetaqkuchu Jehová Diospa ofrendanta.
18 Samuelqa waynachallaraq kashaspapas Jehová Diospa wasinpin servisharqan,+ linomanta unkuwantaqmi*+ p’achakuqpas. 19 Chaymantapas Anaqa sapa watanmi wawanpaq mana mangayoq p’achata ruwapuq, chaytan Samuelpaq apaq qosanwan kuska sacrificio jaywaq rispa.+ 20 Sacerdote Elitaq Elcanaman esposanmanwan bendicionninta qoykurqan, nirqanmi: “Jehová Diospaq wawaykita entregasqaykirayku, Jehová Dios juj qhari wawatawan qosunki”,+ nispa. Chaymantataq wasinkuman kutipurqanku. 21 Jehová Diosmi Anata khuyapayaykurqan, chaymi payqa jujmanta onqoq rijurirqan.+ Chhaynapin payqa wawakunayoq karqan, kinsa qharikuna iskay warmikuna ima. Samueltaq Jehová Diosta servispa* wiñasharqan.+
22 Sacerdote Eliqa kuraqñan kasharqan. Payqa yacharqanmi churinkuna imatachus Israel runakunata ruwasqanta.+ Chaymantapas payqa yacharqanmi Diospa karpan punkupi serviq warmikunawan churinkuna puñusqanta.+ 23 Chaymi payqa churinkunata niq: “¿Imaraykun kaykunata ruwankichis? Llapa runakunan mana allinkunata qankunamanta willashawanku. 24 Wawallaykuna, amaña chaykunata ruwaychisñachu. Manan allinchu Jehová Diospa llaqtanpi qankunamanta chhaynata rimasqankuqa. 25 Juj runachus runamasin contra juchallikunman chayqa, yaqapaschá pipas payrayku Jehová Diosmanta mañapunman. Ichaqa, juj runachus Jehová Dios contra juchallikunqa+ chayri, ¿pin payrayku Diosmanta mañapunqa?”, nispa. Paykunan ichaqa taytanta mana kasukurqankuchu, Jehová Diosqa ñan yuyaykusqaña paykunata wañuchinanpaq.+ 26 Samueltaq allintaña wiñasharqan, paytaqa runakunapas Jehová Diospas wiñasqanman jinan astawan munakusharqanku.+
27 Diospa profetanmi sacerdote Eliman rispa nirqan: “Jehová Diosmi nin: Ñaupa taytaykimanmi sut’ita reqsichikurqani Egiptopi familiantin kashaqtin, faraonpa* esclavonkuna kashaqtinku.+ 28 Paytan llapa Israel ayllukunamanta ajllakurqani+ sacerdotey kananpaq. Paytan ajllakurqani altarniypi+ sacrificiota jaywamuwananpaq, inciensota q’apachimuwananpaq, sacerdote unkuwan churakuspa serviwananpaqwan. Chaymi ñaupa taytaykiq churinkunata nirqani, Israel runakunaq apamusqan sacrificiomanta wakinta oqarikunankupaq.+ 29 Ichaqa, ¿imaraykun mana respetankichischu wasiyman apamuwasqanku sacrificiokunata ofrendakunatapas?+ ¿Imaraykun churiykikunata noqamanta astawanraq jatunchashanki? Qankunaqa llaqtaypa apamusqan ofrendakunamanta aswan allin kaqkunata mijuspan wirayashankichis,+ ¿allintachu chayta ruwashankichis?
30 ”Chaymi noqa Israelpa Diosnin Jehová Dios niyki: Familiaykiman ñaupa taytaykiq familianman iman prometerqani mana saqespa serviwanaykichispaq,+ nispa. Kunanmi ichaqa noqa Jehová Dios niyki: Manañan chayqa chhaynañachu kanqa, noqaqa pichus jatunchawaqniytan jatunchasaq,+ pichus pisichawaqniytataq pisichasaq, nispa. 31 Chhaynaqa, p’unchaykunan chayamunqa, chaypin atiyniykita, taytaykiq familianpa atiynintawan chinkachisaq. Familiaykimantaqa manan pipas machuyanankamaqa kausanqachu.+ 32 Israel runakuna bendecisqaña kanqaku chaypas, wasiypiña+ kanki chaypas qanpaqqa kallanqapunin juj enemigo. Familiaykipiqa manapunin pipas machuyanankamaqa kausanqachu. 33 Familiaykimanta mayqentachus altarniypi serviwananpaq jinallata saqesaq chay runan sinchi llakita apamusunki, paymi ñawiykikunataraq tutayachinqa. Familiaykimanta yaqa llapanmi ichaqa espadawan wañuchisqa kanqa.+ 34 Iskaynin churiykikuna Ofniwan Finehaswan wañusqanmi qanpaq juj señal kanqa, paykunaqa juj p’unchayllapin iskayninku wañunqaku.+ 35 Jinaspan juj junt’aq sonqo sacerdoteta ajllakusaq,+ payqa sonqoypaq jinan imatapas ruwanqa. Paypaqmi mana thunikuq wasita ruwapusaq, payqa ajllakusqay runatan tukuy tiempo servinqa. 36 Familiaykimanta puchuqkunan payman k’umuykunqaku, jinaspa pagota t’antawan mañakunqaku. Paytan ninqaku: Manachu sacerdote kayman, chhaynapi mijunaypaq t’antallapas kananpaq,+ nispa”.