1 Samuel
23 Tiempowanmi Davidman willarqanku: “Filistea runakunan Queilá+ llaqtaman phawaykushanku, erakunamantan* mijuykunata suwashanku”, nispa. 2 Jinan Davidqa Jehová Diosta tapurqan:+ “¿Risaqchu chay Filistea runakunawan maqanakuq?”, nispa. Jehová Diostaq nirqan: “Arí, rillay. Filistea runakunawan maqanakuspa Queilá llaqtata salvamuy”, nispa. 3 Davidpa runankunan ichaqa payta nirqanku: “Kay Judá ayllupi kashaspapas ñamá manchasqaña kashayku,+ ¿chaychu kunan Queilá llaqtata risunman Filistea soldadokunawan maqanakuq?”,+ nispa. 4 Jinan Davidqa Jehová Diosta jujmanta tapullarqantaq,+ chaymi Jehová Diosqa nirqan: “Rillay Queilá llaqtata. Noqan Filistea runakunataqa makiykiman entregasayki”,+ nispa. 5 Jinan Davidqa runankunantin Queilá llaqtata rirqanku Filistea runakunawan maqanakuq. Chaypin askha Filistea runakunata wañuchirqanku, uywankunatapas qechumurqanku. Chhaynatan Davidqa Queilá llaqta runakunata salvarqan.+
6 Aimelecpa churin Abiatar+ Queilá llaqtapi Davidpa kasqanman ayqekushaspaqa makinpin sacerdote unkuta* aparqan. 7 Jinan Saulman willarqanku: “Davidqa Queilá llaqtapin kashan”, nispa. Chaymi Saulqa nirqan: “Diosmi makiyman entregashawan.+ Chay llaqtamantaqa manan ayqekuyta atinqachu, pay kikinmi allin punkukunayoq llaqtaman jaykurun”, nispa. 8 Chaymantataq Saulqa llapa soldadonkunata juñurqan maqanakuq rinankupaq, chhaynapi Queilá llaqtaman rispa Davidta runankunantinta muyuykunankupaq. 9 Chayta yacharuspan Davidqa sacerdote Abiatarta nirqan: “Apamuy sacerdote unkuta”,+ nispa. 10 Chaymi Davidqa nirqan: “Israelpa Diosnin Jehová Diosníy, Saulsi kay Queilá llaqtaman jamuyta munashan noqaq causaypi kay llaqtata thuninanpaq.+ 11 ¿Cheqaqchu chay uyarisqay? ¿Entregawanqakuchu Saulman Queilá llaqta umallikuna? ¿Jamunqapunichu Saúl kayman? Israelpa Diosnin Jehová Diosníy, sut’illanta willaykuway kay kamachiykiman”, nispa. Jehová Diostaq kutichirqan: “Arí, Saulqa jamunqapunin”, nispa. 12 Jinan Davidqa tapullarqantaq: “¿Entregawanqakupunichu noqatapas runaykunatapas Saulpa makinman Queilá llaqta umallikuna?”, nispa. Jehová Diostaq nirqan: “Arí, entregasunkichismi”, nispa.
13 Chaymi Davidqa soqta pachaj jina runankunantin Queilá llaqtamanta lloqsirqanku,+ jinaspa tukuy ladopi pakakurqanku. Saultaq Queilá llaqtamanta Davidpa ayqekusqanta yacharuspa manaña qatiparqanñachu. 14 Davidqa mana jaykuy atina ladokunapin pakakurqan, Zif+ llaqta ch’inneqpi kaq orqo-orqokunapi. Maytaña Saúl maskhaq chaypas manan tarirqanchu.+ Jehová Diosqa manan Davidtaqa entregarqanchu. 15 Zif ch’inneq Jorespi kashaspan Davidqa yacharurqan Saúl pay wañuchiq jamushasqanta.
16 Saulpa churin Jonatantaq Joresman rirqan Davidpa kasqanman. Chaypin Davidta kallpacharqan Jehová Diospi confiashanallanpaq.+ 17 Paymi nirqan: “Ama manchakuychu, papayqa manan tarisunkichu. Qanpunin Israelpiqa rey kanki,+ noqataq yanapasayki. Papaypas chaytaqa allintan yachan”,+ nispa. 18 Jinan paykunaqa Jehová Diospa ñaupanpi juj promesata ruwarqanku.+ Chaymantataq Jonatanqa wasinman ripurqan, Davidtaq Jorespi qhepakurqan.
19 Qhepamantaq Zif llaqta runakunaqa Guibeá+ llaqtaman rirqanku, chaypin Saulta nirqanku: “Davidqa tiyasqayku qayllallapin pakakushan,+ Jorespi kaq mana jaykuy atina qaqa-qaqakunapi,+ Akilá moqopi,+ Jesimonpa* uray ladonpi.*+ 20 Reyniyku, imay ratupas jamuyta munanki chayqa, jamullay. Noqaykuña makiykiman chay runata entregamusaykiku”,+ nispa. 21 Saultaq nirqan: “Jehová Diosmi bendecisunkichis noqata khuyapayawasqaykichismanta. 22 Ama jinachu kaychis, allintapuni yacharamuychis maypichus David pakakushan chayta, pichus chaypi rikurqan chaytawan. Willawasqankuman jinaqa payqa yuyaysapallañas. 23 Allinta yacharamuychis may ladokunapichus pakakun chayta, allinta yacharuspataq kayman jamuychis, jinan qankunawan kuska risunchis. Kay Judá ayllupi pakakushan chayqa tarinaykaman lliuta maskhasaq”, nispa.
24 Chaymantataq chay runakunaqa Saulpa ñaupanta Zif+ llaqtaman kutipurqanku. Davidtaq runankunapiwan Maón+ ch’inneqpi kasharqanku, Arabá+ wayq’opi, Jesimonpa uray ladonpi. 25 Chaymantataq Saulqa runankunapiwan Zif llaqtaman chayarqanku Davidta maskhaq.+ Chayta yacharuspan Davidqa Maón ch’inneqpi kaq qaqa-qaqaman uraykurqan,+ jinaspa chaypi qhepakurqan. Saultaq chayta yacharuspa Maón ch’inneqpi qhepanta qatiparqan. 26 Davidqa runankunantinmi juj orqoq ladonpi kasharqan, chaypi kashaqtinmi Saulqa chay orqoq juj ladonman chayarqan. Jinan Davidqa usqhaylla ayqekurqan,+ Saultaq runankunapiwan jap’irunankupaq ayparusharqankuña.+ 27 Chay ratun juj runa Saulman aypaspa nirqan: “¡Filistea runakunan llaqtanchispiña kashanku! ¡Usqhaylla kutimuy!”, nispa. 28 Chhaynapin Saulqa manaña Davidta qatiparqanñachu,+ aswanmi Filistea runakunawan maqanakuq rirqan. Chayraykun chay cheqastaqa suticharqanku T’aqanakuna Qaqa nispa.
29 Chaymantataq Davidqa rirqan En-Guedí+ llaqta ladoman, chaypin pakakurqan mana jaykuy atina ladokunapi.