Ezequiel
21 Jujmantan Jehová Diosqa rimapayamuwarqan, paymi niwarqan: 2 “Runaq churin, Jerusalenman uyaykita kutiriy, ch’uya cheqas contra rimay, Israel llaqta contra willay. 3 Israel llaqtata niy: Jehová Diosmi nin: Qan contran jamushani, espadayta orqospan+ chanin runata millay runatawan qanmanta chinkachisaq. 4 Chanin runata millay runatawantaq qanmanta chinkachisaq chayqa, llapa runa contran espadayqa uray ladomanta wichay ladokama jamunqa. 5 Chhaynapin llapa runakuna yachanqaku noqa Jehová Dios espadayta orqomusqayta. Chay espadaqa manan jaykunqañachu churananmanqa,+ nispa.
6 ”Qantaq, runaq churin, manchakuymanta khatatataspa* samapakuy. Paykunaq ñaupanpi sinchi llakisqa samapakuy.+ 7 Pipas nisunki, ¿imaraykun llakisqa samapakushanki?, nispa chayqa, juj willakuymi chayamun, nispan ninki. Chay willakuyqa junt’akunqapunin, jinan sonqokuna mancharikunqaku, llapa makikunan mana kallpayoq kapunqa, manan ganas kapunqachu, moqokunamantan* unu sut’unqa.*+ Chayqa jamunqapunin, junt’akunqapunin, ninmi tukuy munayniyoq Señor Jehová Dios”, nispa.
8 Jujmantan Jehová Diosqa rimapayamuwarqan, paymi niwarqan: 9 “Runaq churin, imachus pasananta willay, khaynata niy: Jehová Diosmi nin: ¡Qhawariychis! Juj espadan filollaña kashan,+ llusk’allañan kashan. 10 Chay espadaqa lliuta wañuchinapaqmi filochasqa kashan, llifllikiy jina k’ancharinanpaqmi llusk’achasqa kashan, nispa”.
Runakunan nirqanku: “Kunanqa kusikusunchis”, nispa.
Diosmi ichaqa nirqan: “Imaynan espadaqa sach’akunata wit’un chhaynatan churiypa kamachinan varatapas wit’unqa.+
11 ”Chay espadaqa filochasqa kananpaqmi entregasqa karqan, chaywan runakuna wañuchisqa kananpaq. Chay filochasqa, allin llusk’ayachisqa espadaqa juj wañuchiqpa makinpin kashan.+
12 ”Runaq churin, waqay, pesapakuy;+ chay espadaqa llaqtay contran jamun, Israelpi umallikuna contran kashan.+ Paykunaqa llaqtaywan kuskan wañuchisqa kanqaku. Chayrayku sinchi llakisqa chakaykita takapakuy. 13 Llaqtaymi qhawasqa kashan.+ ¿Iman pasanqa chay espada kamachikuy varaq kasqankama chayaqtin?, chay varaqa chinkapunqan.+ Noqa tukuy munayniyoq Señor Jehová Diosmi chayta nini.
14 ”Runaq churin, imachus kananta willay, t’aqllapakuspa kinsa kutita niy: ¡Juj espada!, nispa. Chay espadaqa wañuchiq espadan, askhanpi wañuchiq espadan, llaqtata muyuykuq espadan.+ 15 Manchakuymantan sonqonkuraq chinkarinqa,+ askhan llaqtanku punkupi wijch’u-wijch’u kanqaku. Lliumi espadawan wañuchisqa kanqaku. Chay espadaqa llifllikiy jinaraqmi k’anchashan, wañuchinapaqmi llusk’allaña kashan. 16 Yau filochasqa espada, ¡pañaman kuchuy! ¡Lloq’eman waqtakuy! ¡Maymanchus filoyki rishan chayman riy! 17 Noqapas t’aqllapakusaqmi, k’araq phiñakuyniytan thasnusaq.+ Noqa Jehová Diosmi chayta nini”, nispa.
18 Jujmantan Jehová Diosqa rimapayamuwarqan, paymi niwarqan: 19 “Runaq churin, Babilonia reypa espadan purinanpaq iskay ñanta dibujay. Chay ñankunaqa kaq llaqtallamantan llosimunqa. Maypichus iskayman t’aqakunqa, maypichus iskay llaqtaman rinapaq t’aqakunqa chaypin juj señalta churanki. 20 Jujnin ñanmi rinqa Anmón runakunaq tiyasqan Rabá llaqtaman,+ juj kaq ñantaq rinqa Judapi allin perqasqa Jerusalén llaqtaman;+ chaynintan espadaqa chay llaqtakunaman chayanqa. 21 Babilonia reymi maypichus ñan iskayman t’aqakun chaypi kashan, chaypin watuqkunata tapukushan, flechankunata chhafchirispan terafim* idolonkunata tapukushan, higadotan* qhawashan. 22 Paña makinpi lloqsiqmi Jerusalenman señalashan. Chay qhawasqanpin lloqsin Jerusalenman perqa thunina carretakunata apananpaq, chaypi runakunata wañuchinanpaq, chay llaqtaman phawaykunanpaq, llaqta punkupi perqa thunina carretakunata sayachinanpaq, llaqta perqaman jallp’ata montonanpaq, llaqta muyuriqta cercananpaq ima.+ 23 Juramento ruwaqkunapaqqa* manan cheqaqchu kanqa chay watusqanpi lloqsimusqanqa.+ Paymi ichaqa imachus ruwasqankuta yuyarinqa jinaspa paykunata jap’inqa.+
24 ”Tukuy munayniyoq Señor Jehová Diosmi nin: Imaymana ruwasqaykichista sut’iman orqosqaykichisraykun, jujkuna rikushaqtin imaymana millaykunata ruwasqaykichisraykun juchaykichisqa mana qonqasqachu kashan. Llapa ruwasqaykichis yuyarisqa kasqanraykun mana munashaqta* apasunkiku, nispa.
25 ”Israelpi millay umalli, wañunayashaq umalli, p’unchayniykin chayaramun,+ castigasqa kanayki tiempon chayaramun. 26 Tukuy munayniyoq Señor Jehová Diosmi nin: Uma k’uyunan ch’utisqa kanqa, coronan orqosqa kanqa.+ Manan ñaupaq jinañachu imapas kanqa.+ K’umuchisqa kaqmi jatunchasqa kanqa,+ jatunchasqa kaqtaq k’umuchisqa kanqa.+ 27 ¡Raqay-raqay* kachun! ¡Thunisqa kachun! ¡Raqay-raqaytan saqesaq! Kamachinanpaq derechoyoq kaq chayamunankaman chay coronataqa mana pipas chaskinqachu,+ paymanmi noqaqa chay coronata qosaq,+ nispa.
28 ”Qan, runaq churin, imachus pasananta willay, khaynatan ninki: Tukuy munayniyoq Señor Jehová Diosmi Anmón runakunamanta k’amikusqankumantawan khaynata nin: ¡Qhawariychis! Juj espadan listo kashan, runakunata wañuchinanpaqmi listo kashan, mijunanpaqmi llusk’ayachisqa kashan, llifllikiy jinaraq k’ancharinanpaqmi listo kashan. 29 Ima rijuriytaña qanmanta* rikurqanku chaypas, imataña qanmanta waturqanku chaypas, wañusqakuna patamanmi churasunkiku. Castigasqa kanankupaq p’unchayninku chayamuq mana allin runakuna patamanmi churasunkiku. 30 Espadaqa churananmanmi jaykupunqa. Maypichus kamasqa karqanki, maymantachus kanki chaypin juzgasayki. 31 Coleraytan qanman chayachimusayki, k’araq phiñakuyniytan ninata jinaraq phukuykamusayki. Sinchi millay runakunamanmi entregasayki, runakuna chinkachiqmanmi qosayki.+ 32 Kanasqan kanki.+ Yawarniykin jallp’antinpi puririnqa, manan pipas yuyarisunkiñachu. Noqa Jehová Diosmi chayta nini, nispa”.