1 Reyes

20 Siria rey Ben-Adajmi+ juñurqan llapa soldadonkunata, kinsa chunka iskayniyoq reykunatawan. Chay reykunaqa caballokunantin carretakunantinmi kasharqanku. Chaymantataq Samaria llaqtaman rirqanku, jinaspa chay llaqtata muyuykurqanku+ maqanakunankupaq. 2 Chaymantataq Ben-Adajqa kamachinkunata kacharqan Israel rey Ajabpa+ kasqanman, jinan paykunaqa Ajabta nirqanku: “Ben-Adajmi nisunki: 3 Qolqeykipas qoriykipas noqaqmi, aswan munay esposaykikunapas, kallpasapa churiykikunapas noqaqmi, nispa”. 4 Chaymi rey Ajabqa nirqan: “Arí reyníy, nisqayki jinapunin, noqapas tukuy imaypas qanpaqpunin”,+ nispa.

5 Chaymantataq Ben-Adajpa kamachinkunaqa jujmanta kutillarqankutaq, jinaspa nirqanku: “Ben-Adajmi nisunki: Noqan willachimurqayki qolqeykita, qoriykita, esposaykikunata, churiykikunatawan qowanaykipaq. 6 Chaymantapas paqarinmi kay horasta jina kamachiykunata kachamusaq, paykunan wasiykitapas oficialniykikunaq wasintapas jaykunqaku, jinaspa lliu valeq kaqniykichiskunata apapunqaku, nispa”.

7 Chayta uyarispan rey Ajabqa Israelpi kaq lliu umalliqkunata* wajachirqan, jinaspa nirqan: “Qhawariychis, Ben-Adajmi niwan: Qolqeykita, qoriykita, esposaykikunata, churiykikunatawan qoway, nispa. Chayta niwaqtinqa manan noqaqa negakurqanichu. Chaywanpas payqa munashallanmi Israel llaqtata sasachakuyman churayta”, nispa. 8 Israel umalliqkunataq ichaqa llapa runakunapiwan nirqanku: “Chay nisqasuykitaqa ama kasuychu, ama uyariychu”, nispa. 9 Jinan Ajabqa Ben-Adajpa kamachinkunata nirqan: “Kayta wiraqochay Ben-Adajman nimuychis: Ñaupaqpi mañawasqaykitaqa qosaykin, kunan mañawasqaykitan ichaqa mana atiymanchu, nispa”. Jinan kamachinkunaqa Ben-Adajman chayta willamurqanku.

10 Chaymi Ben-Adajqa Ajabman willachirqan: “¡Soldadoykunaqa sinchi askhapunin, chaymi Samaria llaqtata ch’usaqman tukuchisaq! ¡Sichus Samariapi jallp’a qhepanman sapanka runaykunaman juj jaft’ayta* jina qonaypaq chayqa, dioskuna sinchita castigawachun!”, nispa. 11 Jinan Israel reyqa nirqan: “Ben-Adajta khaynata nimuychis: Ama alabakuychu manaraq maqanakuyta atipashaspaqa,+ nispa”. 12 Chaytan Ben-Adajman willamurqanku yanapaqnin reykunapiwan karpankupi machashaqtinku. Jinan Ben-Adajqa kaq ratupacha kamachinkunata nirqan: “¡Alistakuychis kay llaqtawan maqanakunanchispaq!”, nispa. Chaymi llapa soldadokunaqa alistakurqanku.

13 Rey Ajabpa+ kasqanmanmi ichaqa juj profeta rirqan, jinaspa nirqan: “Jehová Diosmi nisunki: ¿Rikushankichu khaytukuy soldadokunata? Kunanmi paykunataqa qanpa makiykiman entregasayki, chhaynapin yachanki noqa Jehová Dios kasqayta,+ nispa”. 14 Jinan Ajabqa nirqan: “¿Pitaq yanapawanqari?”, nispa. Profetataq nirqan: “Jehová Diosmi nisunki: Provinciakunapi kamachikuqkunaq yanapaqnin waynakunan yanapasunki, nispa”. Ajabtaq jujmanta tapurqan: “¿Pitaq maqanakuytari qallarinqa?”, nispa. Profetataq nirqan: “Qanmi qallarinki”, nispa.

15 Jinan Ajabqa provinciakunapi kamachikuqkunaq yanapaqninkunata yuparqan, llapanpiqa karqanku iskay pachaj kinsa chunka iskayniyoq waynakunan. Yupallarqantaqmi Israelpi llapa qharikunatapas, jinan karqan qanchis waranqa qharikuna. 16 Jinaspan chaupi p’unchayta maqanakuq lloqsirqanku. Ben-Adajmi ichaqa kinsa chunka iskayniyoq yanapaqnin reykunapiwan karpankupi machasharqanku. 17 Ñaupaqtaqa provinciakunapi kamachikuqkunata yanapaq waynakunan lloqsimurqanku, chaymi Ben-Adajqa kamachinkunata qhawaqta kacharqan, paykunataq kutimuspa nirqanku: “Samaria llaqtamantan soldadokuna maqanakuq lloqsimushanku”, nispa. 18 Jinan Ben-Adajqa nirqan: “Sumaqpiña jamushanku chaypas, maqanakuqña jamushanku chaypas, chay runakunata kausashaqta apamuwaychis”, nispa. 19 Provinciakunapi kamachikuqkunata yanapaq waynakuna llapa Israel soldadokunapiwan lloqsimuspan ichaqa, 20 sapankanku enemigonkuta wañuchirqanku. Jinan wakin Siria soldadokunaqa ayqekurqanku,+ Israel soldadokunataq paykunata qatiparqanku. Ben-Adajmi ichaqa wakin soldadokunapiwan caballopi sillaykusqa ayqekapurqanku. 21 Rey Ajabpas llaqtamanta lloqsimuspan Siria soldadokunawan maqanakurqan; paymi maqanakurqan caballopi sillaykusqa soldadokunawan carretapi kaq soldadokunawanpas. Jinan chay p’unchayqa Siria soldadokunata lliuta atiparqanku.*

22 Chay qhepamanmi Diospa profetanqa+ Israel rey Ajabpa kasqanman rirqan, jinaspa nirqan: “Jamuq wata qallariytan Siria soldadokuna jujmanta jamullanqakutaq qanwan maqanakuq,+ chayrayku allinta yuyaykuy imatachus ruwanaykita, soldadoykikunatapas allinta preparay”,+ nispa.

23 Siria rey Ben-Adajtataq kamachinkuna nirqanku: “Israel runakunaq Diosninqa orqokunapi tiyaq Diosmi, chaymi paykunaqa atipawarqanchis. Sichus pampallapi maqanakusunchis chayqa noqanchismi atiparusunchis. 24 Chaymantapas yanapaqniyki reykunaq rantinpi oficialkunata churay+ soldadokunata umallinankupaq. 25 Jinallataq ñaupaqpi jayk’a soldadokunawanchus, jayk’a caballokunawanchus, jayk’a carretakunawanchus Ajabwan maqanakuq rirqanki, chhaynallatataq kunanpas juñuy. Pampapi paykunawan maqanakusun chayqa atiparusunpunin”, nispa. Ben-Adajqa kamachinkunaq yuyaychasqanman jinan ruwarqan.

26 Jinan Ben-Adajqa wata qallariyta Siria soldadokunata juñurqan, jinaspa Israel soldadokunawan maqanakunankupaq Afec+ llaqtakama rirqan. 27 Israel soldadokunapas maqanakunankupaqmi juñukullarqankutaq, jinaspa mijunankupaq imaymanata aparikuspa Siria soldadokunawan maqanakuq rirqanku, jinaspa Siria soldadokunaq chimpanpi karpakurqanku. Siria soldadokunaqa jallp’antinmanraqmi junt’aykurqanku,+ Israel soldadokunan ichaqa pisilla karqanku, iskay juch’uy t’aqa cabrachakuna jinalla. 28 Jinan Diospa profetanqa Ajabpa kasqanman rispa nirqan: “Jehová Diosmi nin: Siria runakunan nishanku: Jehová Diosqa orqokunapi tiyaq Diosmi, manan pampakunapi tiyaq Dioschu, nispa. Chayraykun sinchi askhaña kanku chaypas paykunata makiykiman entregasayki.+ Chhaynapin qankunaqa yachankichis noqa Jehová Dios kasqayta,+ nispa”.

29 Israel soldadokunawan Siria soldadokunawanqa qanchis p’unchaymi maypichus karpakusqankupi chimpapura kasharqanku, qanchis kaq p’unchaytataq maqanakuyta qallarirqanku. Jinan Israel soldadokunaqa juj p’unchayllapi pachaj waranqa Siria soldadokunata wañuchirqanku. 30 Iskay chunka qanchisniyoq waranqa puchuq Siria soldadokunataq Afec+ llaqta ukhuman ayqekurqanku, chay soldadokunatan ichaqa llaqta perqa urmaykamuspa llapankuta wañuchipurqan. Ben-Adajpas chay llaqta ukhuman jaykuspan juj wasi ukhupi pakakurqan.

31 Jinan kamachinkunaqa Ben-Adajta nirqanku: “Israel reykunaqa khuyapayakuqsi kanku.* Wiraqocháy, ¿manachu rey Ajabman riruykuman qhasqa p’achata cinturaykuman watarukuspa, kunkaykumanpas waskhakunawan k’uyurukuspa? Chayta ruwasaqku chayqa yaqapaschá mana wañuchisunkichu”,+ nispa. 32 Jinan paykunaqa qhasqa p’achata cinturankuman watarukuspa, kunkankumanpas waskhakunawan k’uyurukuspa rey Ajabpa kasqanman rirqanku, jinaspa nirqanku: “Kamachiyki Ben-Adajmi rogakusunki: Perdonaykuway, ama wañuchiwaychu, nispa”. Ajabtaq nirqan: “¿Kausashanchu? Payqa wayqey jinan”, nispa. 33 Jinan Ben-Adajpa kamachinkunaqa chay nisqanta allinpaq qhawarirqanku, jinaspa cheqaqtapuni rimashasqanta piensaspa nirqanku: “Arí, Ben-Adajqa wayqeykin”, nispa. Ajabtaq nirqan: “Phaway pusaramuychis”, nispa. Ajabpa kasqanman Ben-Adaj riqtintaq Ajabqa carretanman wichachirqan.

34 Jinan Ben-Adajqa nirqan: “Papaykimanta papaypa qechusqan llaqtakunatan kutichipusayki. Chaymantapas Damasco llaqtapin callekunata ajllakunki chaypi negociota ruwanaykipaq, imaynan papaypas Samaria llaqtapi ruwarqan jinata”, nispa.

Chaymi Ajabqa nirqan: “Sichus nisqaykiman jina acuerdota ruwasun chayqa, kacharipusaykin”, nispa.

Jinan Ajabqa Ben-Adajwan acuerdota ruwaspa kacharipurqan.

35 Jehová Diospa kamachisqanmi profetakunaq churinqa*+ ladonpi kashaq runata nirqan: “Ama jinachu kay, saqmaway”, nispa. Chay runan ichaqa mana kasukurqanchu. 36 Jinan profetakunaq churinqa nirqan: “Jehová Diosta mana kasukusqaykiraykun, kaymanta ripuqtiyki juj león wañuchisunki”, nispa. Jinan chay runataqa ripuqtin juj león wañuchipurqan.

37 Chaymantataq chay profetaqa juj runatañataq nirqan: “Ama jinachu kay, saqmaway”, nispa. Jinan chay runaqa saqmaspa k’irirqan.

38 Chaymantataq chay profetaqa ripuspa ñan patapi rey Ajabta suyarqan. Payqa rey mana reqsinanpaqmi ñawinta vendawan k’uyurukurqan. 39 Rey Ajab chayninta pasashaqtintaq chay profetaqa alto kunkawan nirqan: “Reyníy, kay kamachiykin maqanakuyman rirqan, jinan chaypi kashaqtiy juj soldado juj runata apamuspa niwarqan: Kay runata makilla qhawanki, escapakunqa chayqa qanmi vidaykiwan paganki,+ mana jinataq juj talento* pesaq qolqeta paganki, nispa. 40 Kay kamachiykiqa imaymanatan ruwasharqan, chaykaman chay runaqa mana kapusqachu”, nispa. Chayta willaqtinmi Israel rey Ajabqa nirqan: “¡Qan kikiykin simiykiwan juchachakunki! ¡Chay castigotan kunan chaskinki!”, nispa. 41 Jinan chay profetaqa venda churakusqanta usqhaylla orqorukurqan, chayraqmi rey Ajabqa repararqan profeta kasqanta.+ 42 Chay profetataq reyta nirqan: “Kaytan Jehová Dios nisunki: Wañuchinaykipaq makiykiman entregasqay runatan qanqa kacharparipurqanki,+ chaymi chay runaq vidanmanta vidaykiwan paganki,+ llaqtaykipas vidanwanmi paganqa chay runaq llaqtanmanta,+ nispa”. 43 Chayta niqtinmi rey Ajabqa llakisqa phiñasqa Samaria+ llaqtapi kaq wasinman kutipurqan.