2 Crónicas
13 Jeroboán+ chunka pusaqniyoq wataña Israelpi kamachikushaqtinmi Abiasqa Judá ayllupi rey kapurqan. 2 Abiasqa kinsa watan Jerusalenmanta kamachikurqan. Paypa mamanmi karqan Guibeá+ llaqtayoq Urielpa ususin Micaya.*+ Abiaswan Jeroboanwanqa guerrapin kallarqankutaq.+
3 Abiasmi guerraman maqanakuq rirqan tawa pachaj waranqa kallpasapa allin maqanakuq soldadokunantin.+ Jeroboanpas paywan maqanakuqmi jamurqan pusaq pachaj waranqa kallpasapa allin maqanakuq soldadokunantin. 4 Abiastaq Efraín orqo-orqopi kaq Zemarain orqo patapi sayaykuspa paykunata nirqan: “¡Israel runakuna, qanpas Jeroboán, uyariwaychis! 5 Yachasqaykichis jina, Israelpa Diosnin Jehová Diosqa Davidtan churinkunatawan+ churarqan Israelpi wiñaypaq kamachikunankupaq,+ chayta junt’ananpaqtaq Davidwan wiñaypaq rimanakurqan.*+ 6 Nebajpa churin Jeroboanmi+ ichaqa Salomonpa* kamachin kashaspa reynin contra jatarirqan.+ 7 Chaymantapas Jeroboanqa millay qella runakunawanmi juñukurqan. Jinan paykunaqa Salomonpa churin Rehoboam waynallaraq kasqanrayku mana experienciayoq kasqanrayku facil-llata pay contra jatarirqanku, paytaq mana ima ruwaytapas atirqanchu.
8 ”Kunantaq qankunaqa aswan kallpayoq kanaykichispaq piensashankichis; jinaspa Jehová Dios contra, Davidpa churinkuna contra maqanakuq jamushankichis. ¿Aswan askha kasqaykichisraykuchu, qori torillokunayoq kasqaykichisraykuchu aswan atiyniyoq kanaykichispaq yuyaykushankichis? Chay qori torillokunataqa Jeroboanmi ruwarqan diosniykichis kananpaq.+ 9 ¿Manachu chaykunarayku qankunaqa Jehová Diospa sacerdotenkunata, Aaronpa mirayninkunata, Leví ayllu runakunatapas qarqorqankichis;+ jinaspa waj llaqtayoq runakuna jina, juj sacerdotekunata ajllakurqankichis?+ Qankunaqa pipas malta toroyoq jamuqtinmi, qanchis malta ovejakunayoq jamuqtinmi yanqa diosniykichiskunaq sacerdoten kananpaq ajllakurqankichis. 10 Noqaykuq Diosniykun ichaqa Jehová Dios,+ paytaqa manapunin saqerqaykuchu. Aaronpa mirayninmanta sacerdotekunapas Jehová Diostan servishallanku, wakin Leví runakunapas sacerdotekunatan yanapashallanku. 11 Paykunaqa sapa tutamantanmi sapa tardenmi Jehová Diosman jaywashallanku ruphachina ofrendakunata,+ q’apachina inciensokunatapas.+ Chaymantapas paykunaqa ch’uya qorimanta mesa patapi kaq Diosman jaywana t’antatapas*+ churashallankun, sapa tardentaqmi qori candeleroq+ mecheronkunatapas*+ jap’ichishallanku. Chhaynatan noqaykuqa Jehová Diospaq imachus ruwanaykutaqa ruwashallayku, manan qankuna jinachu saqepuyku. 12 ¡Allinta reparaychis! Diosqa noqaykuwanmi kashan, paymi sacerdotenkunawan pusarishawanku, sacerdotenkunapas liston kashanku guerrapaq trompetata tocanankupaq. Israel runakuna, ¡uyariwaychis! Ama ñaupa taytaykichispa Diosnin Jehová Dios contraqa maqanakuychischu, manan paytaqa atipayta atiwaqchischu”,+ nispa.
13 Jeroboanmi ichaqa soldadonkunata iskayman t’aqarurqan, chhaynapi wakin soldadonkuna Judá ayllu contra phawaykunankupaq, wakintaq pakallapi qhepanta phawaykamunankupaq. 14 Jinan Judá ayllu soldadokunaqa qhawarikuspa repararqanku Jeroboanpa soldadonkunaqa qhepankumanta ñaupankumanta phawaykamushasqankuta. Chaymi paykunaqa Jehová Diospa yanapayninta mañakurqanku,+ sacerdotekunataq trompetankuta fuerteta tocasharqanku. 15 Chaymantataq Judá ayllu soldadokunaqa maqanakuypaq fuerteta qaparirqanku, jinan Diosqa Abiaspa ñaupanpi Judá ayllu runakunaq ñaupanpi Jeroboanta llapa Israel runakunatawan atiparqan. 16 Jinan Israel soldadokunaqa ayqekurqanku, Diosmi ichaqa paykunata Judá ayllu soldadokunaq makinman entregarqan. 17 Abiastaq soldadonkunapiwan pisqa pachaj waranqa allin maqanakuq Israel soldadokunata wañuchirqan. 18 Chhaynapin Israel runakunaqa pisichasqa karqanku, Judá ayllu runakunataq ñaupa taytankuq Diosnin Jehová Diospi confiasqankurayku Israel runakunata atiparqanku.+ 19 Abiasqa Jeroboantan qatipashallarqan, jinan kay llaqtakunata qechurqan: Betel+ llaqtata muyuriqninpi kaq llaqtachakunatawan, Jesaná llaqtata muyuriqninpi kaq llaqtachakunatawan, Efrén+ llaqtata muyuriqninpi kaq llaqtachakunatawan. 20 Abiaspa kamachikusqan p’unchaykunapiqa manañan Jeroboanqa atirqanchu ñaupaqpi jina atiyniyoq kaytaqa, jinan Jehová Diosqa Jeroboanta wañuchirqan.+
21 Abiasmi ichaqa pisi-pisimanta atiyniyoqman tukupurqan. Paypa esposankunan karqan chunka tawayoq,+ churinkunataq karqan iskay chunka iskayniyoq, ususinkunataq karqan chunka soqtayoq. 22 Abiaspa wakin ruwasqankunapas, rimasqankunapas profeta Idopa qelqasqankunapin+ qelqasqa kashan.