Deuteronomio
20 ”Enemigoykichiswan maqanakuq rispaykichischus rikunkichis paykunaq caballonkunata, carretankunata, soldadonkunatapas qankunaqmanta aswan askhata chayqa, aman mancharikunkichischu, qankunawanqa Egiptomanta orqomuqniykichis Jehová Diosmi kashan.+ 2 Maqanakuyta qallarinaykichispaqña kashaqtinmi sacerdoteqa soldadokunata ninqa:+ 3 Israel runakuna, uyariwaychis. Enemigoykichiskunawan maqanakunaykichis patapiñan kashankichis, aman pisi kallpayankichischu, aman paykunataqa manchakunkichischu, amallataq manchakuymantapas khatatatankichischu.* 4 Jehová Diosniykichismi qankunawan kuska rishan enemigoykichiskunawan maqanakuq, paymi salvasunkichis,+ nispa.
5 ”Chaymantapas soldadokunata kamachiqkunan ninqaku: ¿Kashanchu qankuna ukhupi pillapas mosoq wasita ruwakuspa manaraq chaypi tiyaq? Pillapas kan chayqa, ripuchun wasinta. Paqtapas maqanakuypi wañupunman, jinataq waj runa wasinpi tiyapunman. 6 ¿Kashanchu pillapas chajranpi uvasta plantaspa chaypa rurunta manaraq mijuq? Pillapas kan chayqa, ripuchun wasinta. Paqtapas maqanakuypi wañupunman, jinataq waj runa chajranta jap’ikapunman. 7 ¿Kashanchu pillapas casarakunanpaq rimanasqa? Pillapas kan chayqa, ripuchun wasinta.+ Paqtapas maqanakuypi wañupunman, jinataq juj runa rimanakusqan warmiwan casarakunman, nispa. 8 Soldadokunata kamachiqkunan nillanqakutaq: Mayqennillaykichispas manchapakushan, pisi kallpayashan chayqa,+ ripuchun wasinta. Paqtapas manchakuspa wayqenkunata pisi kallpayachinman,+ nispa. 9 Chaykunata rimayta tukuspan paykunaqa soldadokunata pusananpaq umallikunata churanqaku.
10 ”Mayqen llaqtawanpas maqanakunkichis chayqa, manaraq maqanakushaspan chaypi tiyaq runakunata ninkichis imatachus ruwananku mana wañuchinaykichispaq chayta.+ 11 Sumaqtachus kutichimusunkichis, llaqtankumanpas jaykuchisunkichischus chayqa, llapan chay llaqtapi kaqkunatan llank’achinkichis, paykunaqa kamachiykichiskunan kapunqaku.+ 12 Manachus chay nisqaykichista kasukunqaku aswanpas qankunawan maqanakuytachus munanqaku chayqa, chay llaqtatan muyuykunkichis. 13 Jehová Diosniykichisqa entregasunkichismi chay llaqtata, qankunataq llapa chaypi kaq qharikunata wañuchinkichis. 14 Ichaqa jap’ikapunkichismi chay llaqtapi kaq warmikunata, wawakunata, uywakunata, chaypi imaymana kaqkunatapas.+ Enemigoykichismanta llapa qechusqaykichismi qankunapaq kanqa, chaykunaqa Jehová Diosniykichispa qosqasuykichismi.+
15 ”Chaytaqa ruwankichis jap’ikapunaykichis nacionkunamanta karupi kaq llaqtakunatan. 16 Jehová Diosniykichispa qonasuykichis nacionkunapi runakunatan ichaqa llapanta wañuchinkichis.+ 17 Jehová Diosniykichispa kamachisqanman jinan llapanta wañuchinkichis Het runakunata, amorreo runakunata, Canaán runakunata, perizita runakunata, heveo runakunata, Jebús runakunatapas.+ 18 Chhaynapi diosninkupaq ruwasqanku millay mana allin ruwaykunata ama yachachinasuykichispaq, Jehová Dios contra ama juchallichinasuykichispaqwan.+
19 ”Mayqen llaqtatapas jap’ikapunaykipaq muyuykuspa askha p’unchaytaña paykunawan maqanakushanki chayqa, aman chaypi kaq sach’akunataqa wit’unkichischu. Chay sach’akunaq rurunqa mijunaykichispaqmi kanqa, chaymi ama wit’unkichischu.+ Aman sach’ataqa imaynan runata chinkachinkichis jinataqa chinkachinkichischu. 20 Mana ruruq sach’akunallatan wit’unkichis. Chay sach’akunawantaq mayqen llaqtachus qankunawan maqanakuyta munan chay llaqtata wisq’ankichis, paykunata atipanaykichiskama.