Jeremías
36 Josiaspa churin Judá rey Jehoiaquin+ tawa wataña kamachikushaqtinmi Jehová Diosqa Jeremiasta rimapayarqan, khaynatan nirqan: 2 “Juj qelqa k’uyuta jap’ispa chaypi Israel contra, Judá contra,+ llapa nacionkuna contra+ Josiaspa tiemponmantapacha kunankama rimapayasqay llapa simikunata qelqay.+ 3 Judá llaqtaman llapa ñak’ariykuna chayachinayta yachaspaqa yaqapaschá mana allin ñanninkuta saqepunkuman, chhaynapi mana allinkuna ruwasqankuta juchankutapas perdonapuyman”,+ nispa.
4 Jinan Jeremiasqa Neriaspa churin Baructa+ wajarqan Jehová Diospa llapa nisqankunata qelqananpaq, chaymi Barucqa qelqa k’uyupi qelqarqan.+ 5 Chaymantataq Jeremiasqa Baructa nirqan: “Manan Jehová Diospa wasinmanqa jaykuyta atiymanchu, jark’asqan kashani. 6 Chaymi qan jaykunki qelqa k’uyupi qelqachisqay Jehová Diospa siminta alto kunkawan leenaykipaq. Jehová Diospa wasinpin ayunana p’unchaypi leenki llaqta runakuna uyarinanpaq; chhaynatan leenki llaqtankumanta jamuq llapa Judá runakuna uyarinanpaq. 7 Yaqapaschá mañakusqankuta Jehová Dios uyarinman, yaqapaschá mana allin ñanninkuta saqepunkuman, kay llaqtapaq willasqan Jehová Diospa k’araq phiñakuyninqa manchakunapaqpunin”, nispa.
8 Chaymi Neriaspa churin Barucqa profeta Jeremiaspa llapa kamachisqanta ruwarqan; qelqa k’uyupi kaq Jehová Diospa simintan alto kunkawan leerqan Jehová Diospa wasinpi.+
9 Josiaspa churin Judá rey Jehoiaquin+ pisqa wataña kamachikushaqtinmi isqon kaq killapi llapa Jerusalén runakuna, Judapi kaq llaqtankunamanta Jerusalenman jamuq llapa runakunapas Jehová Diospa ñaupanpi ayunanankupaq kamachisqa karqanku.+ 10 Jinan Barucqa Jehová Diospa wasinpi alto kunkawan leerqan qelqa k’uyupi Jeremiaspa nisqanta. Copiaq* Safanpa+ churin Guemariaspa+ mijunan cuartopin llapa llaqta runakunaman leerqan, chayqa kasharqan pataniraq patiopin, Jehová Diospa wasinman jaykuna mosoq punku qayllapi.+
11 Safanpa churin Guemariaspa churin Micayataq qelqa k’uyupi llapa Jehová Diospa siminta uyarispa 12 reypa wasinman* rirqan secretarioq cuartonman. Chaypin tiyasharqanku llapa autoridadkuna; secretario Elisamá,+ Semayaq churin Delayá, Acborpa+ churin Elnatán,+ Safanpa churin Guemarías, Hananiaspa churin Sedequías, llapa wakin autoridadkunapas. 13 Jinan Micayaqa paykunaman willarqan Barucpa qelqa k’uyumanta llaqta runakunaman llapa leesqanta.
14 Chaymi llapa autoridadkuna Jeudita kacharqanku “llaqta runaman leesqayki qelqa k’uyuta aparikuspa jamuy” nispa Baructa nimunanpaq. Jeudiqa Netaniaspa churinmi karqan, Netaniastaq Selemiaspa churin, Selemiastaq Cusipa churin. Chaymi Neriaspa churin Barucqa qelqa k’uyuta aparikuspa chay autoridadkunaq kasqanman rirqan. 15 Paykunataq nirqanku: “Tiyaykuy jinaspa leepuwayku”, nispa. Jinan Barucqa leerqan.
16 Llapa chay simikunata uyarispataq sinchi mancharisqa qhawarinakuspa Baructa nirqanku: “Llapa kay simikunataqa reymanmi willamunanchis”, nispa. 17 Baructan tapurqanku: “Niwayku, ¿imaynatan kay simikunata qelqarqanki? ¿Jeremiaschu qelqachirqasunki?”, nispa. 18 Baructaq nirqan: “Arí, paymi llapa kay simikunata qelqay niwarqan, jinan noqaqa kay qelqa k’uyupi tintawan qelqarqani”, nispa. 19 Autoridadkunan Baructa nirqanku: “Phaway Jeremiaspiwan pakakamuychis, ama pipas yachachunchu maypi kasqaykichista”,+ nispa.
20 Chaymantan qelqa k’uyuta secretario Elisamapa cuartonman waqaychaspa reyman rirqanku, reywan patiopi tupaspataq llapa uyarisqankuta willarqanku.
21 Jinan reyqa Jeudita+ kacharqan qelqa k’uyuta apamunanpaq. Secretario Elisamapa cuartonmanta apamuspan Jeudiqa rey uyarishaqtin, ladonpi kaq autoridadkunapas uyarishaqtin leerqan. 22 Isqon kaq killapi,* chiri tiempopaq ruwakusqan wasipi raurashaq sansaq ñaupanpi rey tiyashaqtinmi chayqa karqan. 23 Kinsa tawa t’aqata Jeudí leeyta tukuqtinmi reyqa secretarioq cuchillonwan chay leesqan parteta kuchuspa raurashaq sansaman wijch’uykuq, chhaynatan ruwarqan llapa qelqa k’uyuta tukunankama. 24 Manan reypas ni llapa chay simikunata uyariq kamachinkunapas mancharikurqankuchu, manan p’achankutapas llik’ikurqankuchu. 25 Elnatanwan,+ Delayawan+ Guemariaswan+ imaña reyta valekurqanku qelqa k’uyuta ama kanananpaq chaypas, reyqa manan uyariqpas tukurqanchu. 26 Aswanpas reypa churin Jeramelta, Azrielpa churin Serayata, Afdelpa churin Selemiasta iman kamachirqan secretario Baructa profeta Jeremiastawan jap’imunankupaq, Jehová Diosmi ichaqa paykunata pakaykurqan.+
27 Jeremiaspa Barucwan qelqachisqan qelqa k’uyuta rey kanasqan qhepamanmi Jehová Diosqa Jeremiasta nillarqantaq:+ 28 “Juj qelqa k’uyupi qelqallaytaq Judá rey Jehoiaquinpa kanasqan qelqa k’uyupi kaq simikunata.+ 29 Judá rey Jehoiaquin contran ninki: Jehová Diosmi nin: Qanmi qelqa k’uyuta kanaspa nirqanki: ¿Imanaqtinmi, Babilonia reyqa jamunqapunin, kay suyutan thuninqa, mana runakunayoqta mana uywakunayoqtan saqenqa, nispa qelqarqanki?,+ nispa. 30 Chayraykun Judá rey Jehoiaquin contra Jehová Dios khaynata nin: Manan paymanta pipas Davidpa trononpi tiyaq kanqachu,+ ayanpas wijch’usqan kanqa, p’unchay ruphaypi, tutataq qasapi.+ 31 Cuentatan mañasaq paymanta, mirayninmanta, kamachinkunamantapas. Paykunaman, Jerusalenpi tiyaq runakunaman, Judá runakunamanwanmi willachisqay ñak’ariyta chayachisaq,+ paykunaqa manan uyarikuyta munarqankuchu,+ nispa”.
32 Jinan Jeremiasqa juj qelqa k’uyuta jap’ispa Neriaspa churin secretario Barucman qorqan,+ chaypin Jeremiasqa Judá rey Jehoiaquin ninapi kanaykusqan qelqa k’uyupi kaq simikunata qelqachirqan.+ Chaymantapas chayman rijch’akuq askha simikunatan yapakullarqantaq.