Efesios
4 Señorninchisrayku preso kashaq+ noqa Pablon qankunata valekuykichis imapaqchus wajasqa karqankichis chayman jina kausanaykichispaq.+ 2 Tukuy k’umuykukuywan,+ llamp’u sonqo kaywan, pacienciakuywan,+ munakuywan aguantanakuspa ima kausanaykichispaq.+ 3 Chaymantapas jujkuna-jujkunawan sumaqta kausaychis, tukuy atisqaykichistataq ruwaychis jujllachasqalla kashanaykichispaq,+ chay jujllachasqa kaytaqa santo espirituraykun chaskirqankichis. 4 Imaynan wajasqa kasqaykichis suyakuyqa jujlla,+ chhaynallataqmi iñiq t’aqapas* jujlla,+ espiritupas jujllan,+ 5 Señorpas jujllan,+ iñiypas jujllan, bautismopas jujllan, 6 llapanchispa Taytanchis Diospas jujllataqmi, payqa lliutan kamachin, lliuwanmi imatapas ruwan, lliupitaqmi atiyninpas kashan.
7 Noqanchisqa sapankanchismi Diospa ancha sumaq sonqo kayninta chaskirqanchis, Cristotaqmi chay regalotaqa sapankanchisman qowarqanchis.+ 8 Chaymi Diospa simin qelqapiqa nishan: “Altomanmi wicharqan, presokunatan aparqan, runakunatan regalokunata jina qomurqan”,+ nispa. 9 ¿Imatan chaypi nishanman “wicharqan” nisqanwan? Wichananpaqqa kay pachamanraqchá riki ñaupaqtaqa uraykamurqan. 10 Chay kikin uraykamuqllataqmi lliu janaq pachaq altonkamaraq+ wicharqan,+ chhaynapi tukuy imaymanata junt’achinanpaq.
11 Paymi kachamusqan runakunamanta wakinta churarqan apóstol kanankupaq,+ wakinta profeta kanankupaq,+ wakinta allin willakuykunata willaq kanankupaq,+ wakinta michiq kanankupaq, wakintataq yachachiq kanankupaq;+ 12 chhaynapi iñiqkunata allin ñanllapi purichinankupaq, jujkunata servinankupaq, Cristoq cuerponta* wiñachinankupaqwan;+ 13 chaytaqa ruwanqaku iñiypi, Diospa Churinta allinta reqsiypipas jujllachasqa kananchiskaman, chhaynapi wiñay junt’asqa runa kananchispaq,+ arí, Cristoq junt’asqa sayaynin sayayniyoq kananchispaq. 14 Chhaynaqa, amaña wawakuna jinachu kasun, amataq llullakuspa yachachiqkunatapas uyarisunchu,+ paykunaqa munayllatan jujkunata pantachinku; paykunatachus kasukusunman chayqa, lamar-qochapi wayraq apakachasqan bote jinan kasunman. 15 Aswanpas cheqaq kaqta rimasunchis, munakuqtaq kasunchispas, chhaynapin umalliqninchis Cristowan+ jujllachasqa kaspa tukuy imaymanapi wiñasunchis. 16 Payraykun cuerpoq llapa partenkunaqa+ allin k’askanasqa kashan, allintataqmi yanapanakunkupas cuerpoq imachus necesitasqanman jina. Sapanka partechus ruwanankuta allinta junt’anku chayqa, llapa cuerpon allinta wiñan, chhaynapitaq cuerpoqa munakuypi qaqata sayan.+
17 Chhaynaqa, Señorpa sutinpin valekuykichis: Amaña waj nacionkunamanta runakuna jinaqa puriychischu,+ paykunaqa mana valeq yuyayninkuman jinan kausashanku.+ 18 Arí, paykunaqa tutayasqa yuyayniyoqmi kashanku, karupitaqmi kashanku Diosmanta jamuq kausaymantapas; chhaynapiqa tarikunku Diosmanta mana yachayta munasqankurayku, sonqonku rumiyasqa kasqanrayku iman. 19 Chaymantapas paykunaqa manañan ima juchatapas mana allinpaqchu qhawarinku, chaymi mana p’enqarikuspa juchallikunku;*+ tukuy millakuna kaqkunatapas sinchi munapayaywanmi ruwashanku.
20 Ichaqa yachasqaykichis jina, Cristoqa manan chhaynachu. 21 Paytachus uyarirqankichis paypa yachachisqantaqchus karqankichispas chayqa, allintachá chaytaqa yachashankichis; Jesuspin cheqaq kaqqa kashan. 22 Qankunaqa allin yachachisqamá riki karqankichis ñaupaqpi imayna runa kasqaykichista wijch’upunaykichispaqqa;+ chay mauk’a runaqa ñaupaqpi imaynachus purirqankichis chayman jinan kashan, pantachisuqniykichis mana allin munapayaykunawantaqmi aswan mana allinmanraq tukupushanpas.+ 23 Chayrayku mosoqyachishallaychis imaynachus piensasqaykichista,*+ 24 chaymantapas mosoq runa kaywan p’achakuychis;+ chayqa Diospa munayninman jinan kamasqa karqan cheqaq chanin kaypi, junt’aq sonqo kaypi ima.
25 Chhaynaqa, ñataq llullakuyta wijch’upurqankichisña chayqa, sapankaykichis cheqaq kaqta runamasiykichiswan rimaychis+ llapanchispas juj cuerpolla kasqanchisrayku.+ 26 Phiñakunkichischus chayqa, aman juchallikunkichischu;+ aman p’unchay ch’isiyaqqa phiñasqalla kankichischu.+ 27 Aman Saqramanpas campotaqa qonkichischu.+ 28 Suwakuqpas amaña suwakuchunñachu, aswanpas llank’achun, allin ruwaykunata makinwan ruwachun,+ chhaynapi pisichikuqkunaman imallatapas qoykunanpaq.+ 29 Amapunin simiykichismantaqa ima millay rimaypas lloqsinqachu;+ aswanpas necesitakusqanman jinan imachus allin jujkunata kallpachanapaq chayllata rimankichis, chhaynapin imapas rimasqaykichisqa uyariqniykichiskunaq allinninpaq kanqa.+ 30 Chaymantapas aman Diospa santo espirituntaqa llakichinkichischu,+ qankunaqa chay espirituwanmi sellasqa karqankichis+ preciowan librasqa kanaykichis p’unchaypaq.+
31 Chayrayku qankunamanta wijch’upuychis tukuy ima sintipakuq kayta,+ phiñasqa kayta, k’araq phiñakuyta, qaparkachayta, mana respetowan millay rimayta,+ tukuy ima k’araq simikunatapas.+ 32 Aswanpas jujkuna-jujkunawan sumaqta qhawarinakuychis, munakuywan khuyapayanakuychis,+ tukuy sonqowantaq perdonanakuychispas imaynan Diospas qankunata Cristorayku tukuy sonqowan perdonarqasunkichis chhaynata.+