Romanos
2 Chayrayku, yau runa, piña kanki chaypas,+ jujkunata juchachashanki chayqa, qan kikiykitan juchachakushanki, chaymi mana defiendekuyta atiwaqchu, qanpas juchachasqayki runakunaq ruwasqallantataq ruwasqaykirayku.+ 2 Yachasqanchis jina, Diosqa cheqaq kaqman jinan chhayna ruwaqkunataqa juzgan.
3 Yau runa, chhayna ruwaqkunata juchachashaspa qanpas paykuna jinallataq ruwashawaq chayqa, ¿niwaqchu: “Noqamanqa manan chayamuwanqachu Diospa juicionqa”, nispa? 4 Icha, ¿mana valeqpaq jinachu qhawarinki Diospa ancha sumaq sonqo kasqanta,+ ancha aguantaq kasqanta,+ ancha pacienciayoq kasqantapas?+ ¿Manachu reparanki Diosqa sumaq sonqo kayninpi juchaykimanta pesapakunaykipaq yanapay munashasqasuykita?+ 5 Qanqa k’ullu kasqaykirayku juchaykimanta mana pesapakuyta munasqaykirayku iman Diospa phiñakuynin p’unchaypaq sinchi phiñakuyta juñushanki. Chay phiñakuytan Diosqa rikuchinqa runakunata juzganan p’unchaypi, payqa chanintapunin juzganqa.+ 6 Chaypachan payqa sapankaman pagapunqa imachus ruwasqanman jina:+ 7 Wiñay kausaytan qonqa pikunachus allin ruwaykunapi aguantaspa jatunchasqa kayta, respetasqa kayta, mana jayk’aq ismuyta atiq cuerpoyoq kayta+ ima maskhashanku chaykunaman. 8 Pikunataqchus maqanakuyta jatarichishanku, manataq cheqaq kaqman jinachu kausashanku, aswanpas mana chanin kaqta ruwashanku chaykunapaqmi ichaqa k’araq phiñakuy sinchi phiñakuy ima kanqa.+ 9 Lliu mana allin ruwaqkunapaqmi sinchi ñak’ariy sinchi llakikuy ima kanqa. Ñaupaqtaqa judío runapaq, chaymantataq griego runapaq. 10 Ichaqa llapa allin kaqta ruwaqkunapaq kachun jatunchaypas, respetaypas, thaj kaypas; ñaupaqta judío runapaq,+ chaymantataq griego runapaq.+ 11 Diospaqqa lliupas igual-llan kanchis.+
12 Diospa kamachikuyninta mana yachashaspa juchallikuqkunaqa wañunqakun manaña juchachaqninku kamachikuy kanchu chaypas;+ Diospa kamachikuyninta yachashaspa juchallikuqkunan ichaqa chay kamachikuyman jina juzgasqa kanqaku.+ 13 Manan kamachikuy simita yachaqkunatachu Diosqa chaninpaq qhawarinqa, aswanpas chay kamachikuy simiman jina kausaqkunatan chaninpaqqa qhawarinqa.+ 14 Waj nacionkunamanta runakunaqa manaña Diospa kamachikuyninta yachankuchu chaypas,+ chay kamachikuypa nisqanman jinan mayninpiqa imatapas ruwanku, chaymi rikuchin sonqonkupi juj kamachikuy kasqanta. 15 Imachus ruwasqankupin paykunaqa rikuchinku kamachikuy simi sonqonkupi qelqasqa kasqanta. Concienciankupas paykunawan kuskan rikuchin ima ruwasqankupas allinchus kashan icha manachus chayta, chhaynapin yuyayninku paykunata reparachin imamantapas juchayoqchus kanku icha manachus chayta. 16 Tukuy chaykunaqa kanqa maypachachus runakunaq pakallapi ruwasqankuta Cristo Jesuswan Dios juzgachiqtinmi.+ Kaykuna qelqamusqayqa allin willakuykuna willasqayman jinan kashan.
17 Yau “judion kani” niq runa,+ “kamachikuy simipin confiani” niq, “Diospa llaqtanpi kasqaymantan kusikuni” niq, 18 qanqa yachankichá imachus Diospa munaynin chayta, allintachá reparanki imakunachus allin chaytapas kamachikuy simita yachachisqasuykikurayku.+ 19 Qanqa “ñausakunata pusaqmi kani, tutayaqpi kaqkunapaqpas k’anchaymi kani” ninkipaschá, 20 chaymantapas “mana allin yuyaywan ruwaqkunatapas yuyaychanin, wawa jina kaqkunatapas yachachinin; noqaqa kamachikuy simipin yachani yachaypa qallariyninta, cheqaq kaqpa qallariynintapas” nispapaschá ninki. 21 Yau runa, jujkunata yachachispaqa, ¿imanaqtintaq qanri mana yachachisqaykiman jinachu kausanki?+ ¿Imanaqtintaq “aman suwakunkichu”+ nishaspari suwakushanki? 22 ¿Imanaqtintaq “aman jujwan pantankichu”+ nishaspari jujwan pantashanki? ¿Imanaqtintaq idolokunata cheqnikushaspari templokunata suwakushanki? 23 ¿Imanaqtinmi kamachikuy simiwan alabakushaspapas kamachikuy simita mana kasukuspa* Diosta p’enqayman churashanki? 24 Qelqasqa kasqanman jina, “qankuna jawan Diospa sutinqa waj nacionkunapi k’amisqa kashan”.+
25 Qhari kayniyki qarachata kuchuchikusqaykiqa+ kamachikuy simiman jina kausallaqtiykin valen,+ ichaqa manachus kamachikuy simiman jina kausashanki chayqa, manapas qhari kayniyki qarachata kuchuchikuwaqchu karqan jinan kanman. 26 Chayrayku, qhari kaynin qaracha mana kuchusqa runachus+ kamachikuy simiman jina kausanman chayqa, qhari kaynin qarachatapas kuchuchikunman karqan jinan kanman.+ 27 Chhaynaqa, qhari kaynin qarachata mana kuchuchikushaspa kamachikuy simiman jina kausaqqa qantan juchachasunki, kamachikuy simita yachashaspayki qhari kayniyki qarachatapas kuchuchikushaspayki chay kamachikuyta mana kasukusqaykirayku. 28 Manan “judion kani” niqchu cheqaq judioqa,+ nitaq cuerpopi señalachikuychu* valenpas.+ 29 Aswanpas cheqaq judioqa sonqonpi judío kaqmi,+ cheqaq señalachikuypas Diospa espiritunwan sonqopi señalachikuymi,+ manataq kamachikuy simiman jina señalachikuychu.+ Chhayna runataqa manan runakunachu jatunchan, aswanpas Diosmi jatunchan.+