Deuteronomio
19 ”Jehová Diosniykichispa qonan jallp’api kaq nacionkunata Jehová Diosniykichis chinkachiqtinqa jallp’ankutapas, llaqtankutapas, wasinkutapas qankuna jap’ikapuqtiykichisqa,+ 2 chay jallp’a ukhupin kinsa llaqtakunata ajllankichis, Jehová Diosniykichispa qonasuykichis jallp’apin chay kinsantin llaqtakunata ajllankichis.+ 3 Kinsamanmi t’aqankichis Jehová Diosniykichispa qonasuykichis jallp’ataqa, sapankapitaqmi juj pakakuna llaqta kanqa, chay llaqtakunaman riq ñankunaqa allin allichasqan kanqa, chhaynapi qonqaylla runamasin wañuchiqqa chay llaqtaman ayqekunanpaq.
4 ”Pipas mana yuyaypichu runamasinta wañuchinqa manataq cheqnikurqanpaschu chayqa, chay pakakuna llaqtakunamanta jujninmanmi ayqekunqa,+ chhaynapin mana wañuchisqachu kanqa. 5 Yaqapaschá payqa runamasinwan sach’a-sach’ata llant’aman rinman, sach’ata wit’unanpaq hachata oqariqtintaq hachaq uman k’aspinmanta phawarunman, chaytaq runamasinman chayanman, chhaynapitaq chay runaqa wañupunman. Chhayna ruwaykuna pasaqtinmi runa wañuchiqqa pakakuna llaqtakunamanta jujninman phawanqa mana wañunanpaq.+ 6 Pakakunapaq llaqtachus nishu karupi kanman chayqa, yaqapaschá yawarmanta vengakuq runaqa+ sinchi phiñasqa sonqon t’impuriqtin ayparunman jinaspa wañuchipunman. Ichaqa qonqay wañuchiq runaqa manataq runamasinta cheqnikuspachu chayta ruwarqan chayqa, manan wañunanchu karqan.+ 7 Chayraykun kamachishaykichis kinsa llaqtakunata ajllanaykichispaq.
8 ”Ñaupa taytaykichiskunaman prometesqanman jinan Jehová Diosniykichisqa jallp’aykichista jatunyachinqa,+ paykunaman prometesqan jallp’atan llapanta qopusunkichis.+ 9 Chaypaqmi ichaqa kunan qosqay kamachikuyta kasukunaykichis, chayman jinan Diosniykichis Jehová Diosta munakunaykichis, paypa ñannillanpin purinaykichis.+ Jallp’aykichis jatunyachisqa kaqtinqa kinsa pakakuna llaqtakunatawanmi chaymanqa yapankichis.+ 10 Chhaynapin Jehová Diosniykichispa herencia qonasuykichis jallp’apiqa mana jich’asqachu kanqa mana juchayoq runaq yawarninqa,+ manataqmi qankunapas yawar jich’aymantaqa juchayoqchu kankichis.+
11 ”Ichaqa, pipas runamasinta cheqnikunman,+ jinaspa maypipas suyapaspa* wañuchinman, wañurachispataq pakakuna llaqtaman ayqekunman chayqa, 12 llaqtanpi umalliqkunan* maskhachimuspa pusachimunqaku, pusamuqtinkutaq yawarmanta vengakuqman entreganqaku, paymi chay runataqa wañuchinqa.+ 13 Aman paytaqa khuyapayankichischu, chhaynapin Israel llaqtaqa mana juchayoqchu kanqa mana juchayoq runaq yawarnin jich’akusqanmanta,+ chhaynapin qankunaqa allillan kankichis.
14 ”Jehová Diosniykichispa qonan jallp’api herenciaykichista chaskispaykichisqa aman ñaupa taytaykichiskunaq lindero* churasqankutaqa suchuchinkichischu.+
15 ”Piña juj runata tumpanqa ima juchamantapas ima mana allin ruwaymantapas chayqa, aman juj runaq simillanmantaqa chay runataqa juchachankichischu.+ Iskaypas kinsapas testigokuna rimariqtinñan yachakunqa cheqaqchus chay icha manachus chayta.+ 16 Pipas runamasin mana allinpi tarikunanta munaspa Diospa kamachikuyninta mana kasuqmanta tumpanman chayqa,+ 17 iskayninkun Jehová Diospa ñaupanman jamunqaku, chaypin sacerdotekunaq ñaupanman chay p’unchaykunapi llank’aq juezkunaq ñaupanman ima qayllaykunqaku.+ 18 Chay juezkunan allinta qhawarinqaku cheqaqchus chay icha manachus chayta.+ Tumpaq runachus yanqa tumpashan runamasinta chayqa, llullakuspachus imatapas rimashan chayqa, 19 imatachus runamasinta ruwayta munarqan chaytan payta ruwankichis,+ chhaynapin qankuna ukhumanta mana allin kaqta chinkachinkichis.+ 20 Runakunataq chayta uyarispa manchakunqaku, manañataq jayk’aqpas chhayna sinchi mana allin ruwaytaqa ruwanqakuñachu.+ 21 Aman chay runataqa khuyapayankichischu,+ aswanmi paytaqa pagachinkichis kausaymanta kausaywan, ñawimanta ñawiwan, kirumanta kiruwan, makimanta makiwan, chakimanta chakiwan.+