Job
41 ”¿Atiwaqchu cocodrilota*+ anzuelowan jap’iyta?
¿Atiwaqchu qalluntapas waskhawan wataruyta?
2 ¿Atiwaqchu waskhawan senqanta pasarachiyta?
¿Atiwaqchu qhaqllinta* ganchowan t’oqoruyta?
3 ¿Munayllatachu pay rimapayasunkiman?
¿Khuyapayaway nisunkimanchu?
4 ¿Pay qanwan rimanakunmanchu?
¿Wiñaypaq esclavoyki kasaq nisunkimanchu?
5 ¿Phalaq animalwan jina paywan pujllawaqchu?
¿Warmi wawaykikunawan pujllananpaq correawan wataruwaqchu?
6 ¿Atinkumanchu qhatuqkuna paywan negocio ruwayta?
¿Atinkumanchu negocio ruwasqankupi kayman jaqayman apakachayta?
7 ¿Atiwaqchu qaranta lanzakunawan sat’iruyta?+
¿Atiwaqchu umantapas t’urpunakunawan t’urpuruyta?
8 ¡Makillaykita pay pataman churaykuy,
chaypin payta reqsinki, jinan wananki!
9 Paytaqa manan jap’iyta atiwaqchu,
rikuspallaraqmi mancharikuwaq.
10 Manan pipas paymanqa qayllaykullanmanpaschu.
Chhaynaqa, ¿pin noqawan churanakuyta atinman?+
11 ¿Pin imallatapas qowarqan, chhaynapi noqa kutichipunaypaq?+
Jallp’a pachapi llapa ima kaqpas noqaqmi.+
12 Rimallasaqtaqmi cocodriloq chakinmanta,
kallpanmanta, allin ruwasqa cuerponmantapas.
13 ¿Pillapas cocodriloq aycha qaranta ch’utirqanchu?
¿Pillapas paypa simin ukhuman jaykunmanchu?
14 ¿Pillapas siminta kichayta atinmanchu?
Kirunkunaqa sinchi manchakuymi.
15 Wasanqa wachu-wachu sarphawan* tapasqan kashan,
llapanmi sarphawan qaqa k’askanachisqa kashan.
16 Sarphankunaqa allin k’iskinasqan kashan,
manan wayrapas chaynintaqa jaykunmanchu,
17 allin k’askanasqan, allin jap’inasqan kashan,
manan pipas chaytaqa t’aqayta atinmanchu.
18 Pay achhiqtinqa, achhisqanqa k’ancharinraqmi;
ñawinkunapas pacha illariy k’anchay jinaraqmi.
19 Llifllikiy jinaraqmi siminmanta k’anchay lloqsimun,
nina jinaraqmi siminmanta ch’eqemun.
20 Senqanmantan q’osñi lloqsimun,
t’otorawan kanasqa horno jinaraqmi q’osñirimun.
21 Samaynillanwanmi sansatapas raurarichin,
siminmantapas ninaraqmi lloqsimun.
22 Kunkanqa kallpasapallañan,
payta rikuspan lliupas khatatatanku.*
23 Wijsa aychanpas fierro jinaraqmi,
manan imanakunpaschu.
24 Sonqonpas ch’ila rumi jinan,
molino rumi jinan chuchullaña.
25 Pay sayariqtinqa atiyniyoq runakunapas mancharikunkun,
pay chhafchirikuqtinqa manan imatapas ruwayta atinkuchu.
26 Paytaqa manan ima espadapas ni lanzapas atipanmanchu,
manan ima flechapas ni ima t’urpunapas atipanmanchu.+
27 Paypaqqa fierropas ichhu jinallan,
cobrepas ismusqa k’aspi jinallan.
28 Flechapas manan paytaqa manchachinchu,
warak’asqa rumipas ch’aki qora jinallan paypaqqa.
29 Rakhu k’aspipas rastrojo* jinallan paypaqqa,
juch’uy lanza rimarisparaq phawamusqanpas asichinmi paytaqa.
30 Wijsanpas p’akisqa filo k’arpakuna* jinaraqmi,
t’uru pampanta suchuqtinpas fierro trillanawan jinaraqmi q’allarparin.+
31 Payqa t’impushaq mankata jinaraqmi unutapas t’impurichin,
t’impushaq jampi mankata jinaraqmi lamar-qochatapas phoqchirichin.
32 Unupi purispaqa unutaraqmi k’ancharichin,
yuraq chujchayoqta jinaraqmi unutaqa saqen.
33 Kay pachapiqa manan imapas pay jinaqa kanchu,
paytaqa mana manchakuqtan Diosqa kamarqan.
34 Payqa mana manchakuspan jatunchakuqkunata qhawan,
payqa llapa manchay salqa animalkunaq reyninmi”, nispa.