Mateo

21 Jerusalén llaqtaman qayllaykushaspankun Olivos orqopi Bejfagué llaqtachaman chayarqanku, chaymantan Jesusqa iskay discipulonkunata kacharqan:+ 2 “Jaqay rijurimushaq aylluman riychis, chayman jaykuspaykichis jinan tarinkichis juj china asnota malta asnontin watarayashaqta, jinaspa paskaruspa aysamunkichis. 3 Pipas imanispapas nisunkichisman chayqa, Señormi munashan nispan ninkichis. Jinan payqa aysachimusunkichispacha”, nispa.

4 Chayqa karqan profetaq nisqan junt’akunanpaqmi, paymi nirqan: 5 “Sion llaqtata* niychis: ¡Qhawariy! Reyniykin jamushasunki.+ Payqa llamp’u sonqon,+ asnopi sillaykusqan jamushan, malta orqo asnopin jamushan, arí, cargana uywaq uñanpi sillaykusqan jamushan,+ nispa”.

6 Jinan discipulokunaqa rispa Jesuspa kamachisqanman jina ruwarqanku.+ 7 China asnotan maltantinta aysamurqanku, jinaspa chay asnokunata jawa p’achankuwan caronarqanku, Jesustaq malta asnopi sillaykukurqan.+ 8 Yaqa llapa runakunan jawa p’achankuta ñan pataman mast’arqanku,+ wakintaq sach’aq k’allmankunata wit’uspa chayta mast’arqanku. 9 Ñaupanta qhepantawan riq runakunataq fuerteta qaparisharqanku: “¡Salvasqa kachun Davidpa Churinqa!+ ¡Sumaqpaq qhawarisqa kachun Jehová* Diospa sutinpi jamuqqa!+ ¡Janaq pachapi tiyaq payta salvachun!”,+ nispa.

10 Jerusalén llaqtaman jaykuqtintaq chaypi llapa runakuna afantaraq ninakurqanku: “¿Pitaq kayri?”, nispa. 11 Paywan kashaq runakunataq nirqanku: “¡Payqa Galileapi kaq Nazaret llaqtayoq Jesusmi! Paymi jamunan karqan chay profetaqa”,+ nispa.

12 Jesustaq temploman jaykuspa jawaman qarqomurqan chaypi llapa vendeqkunata rantiqkunata ima, qolqe cambiaqkunaq mesankunatapas paloma vendeqkunaq tiyanankunatapas t’ijrarparirqanmi.+ 13 Jinaspa paykunata nirqan: “Qelqasqan kashan: Wasiyqa Diosmanta mañakuna wasi nisqan kanqa,+ nispa. Qankunataq ichaqa suwakunaq t’oqonman tukuchipusqankichis”,+ nispa. 14 Chaymantapas templopin payman qayllaykurqanku ñausakuna wist’ukuna ima, jinan paykunata qhaliyachirqan.

15 Umalli sacerdotekunan kamachikuy simita yachachiqkunapiwan sinchita phiñakurqanku+ Jesuspa milagrokuna ruwasqanta rikuspa, templopi waynachakunaq “¡salvasqa kachun Davidpa Churinqa!”+ nispa qaparisqankutawan uyarispa. 16 Chaymi Jesusta nirqanku: “¿Uyarishankichu kaykunaq imachus nisqankuta?”, nispa. Jinan Jesusqa nirqan: “Arí, uyarishanin. ¿Manachu leerqankichis: Erqechakunan rimasqanwan, ñuñuq wawakunan siminwan jatunchasunki, nisqa kasqanta?”,+ nispa. 17 Chay llaqtamanta lloqsispan Betania llaqtachaman rirqan, chaypitaq samarqan.+

18 Jerusalén llaqtaman tutallamanta kutishaspan Jesusqa yarqachikurqan.+ 19 Ñan patapi higos sach’ata rikuspataq chayman qayllaykurqan, ichaqa manan ima rurutapas chaypi tarirqanchu, aswanpas raphillatan,+ jinan chay sach’ata nirqan: “Kunanmantaqa manañan jayk’aqpas rurunkiñachu”,+ nispa. Chaymi chay higos sach’aqa kasqan ratu ch’akipurqan. 20 Discipulonkunataq chayta rikuspa admirasqa nirqanku: “¿Imaynapitaq kay higos sach’ari kasqan ratu ch’akirapun?”,+ nispa. 21 Jinan Jesusqa paykunata nirqan: “Cheqaqtan niykichis: Sichus iñinkichis, manataq iskayankichischu chayqa, manan kay higos sach’awan imatachus ruwasqayta jinallachu ruwankichis, aswanmi kay orqopas, jatarispa lamar-qochaman wijch’uykukuy, niqtiykichisqa wijch’uykukunqa.+ 22 Iñiywanchus tukuy imatapas mañakunkichis chayqa, chaskinkichismi”,+ nispa.

23 Temploman jaykuspa chaypi yachachishaqtintaq payman qayllaykurqanku llaqtapi umalliqkuna* umalli sacerdotekuna ima, jinaspa nirqanku: “¿Piqpa kamachisqantaq qanri kaykunata ruwanki? ¿Pin kachamurqasunki kaykunata ruwanaykipaq?”,+ nispa. 24 Jesustaq paykunata nirqan: “Noqapas jujta tapullasaykichistaq. Kutichiwankichis chayqa, noqapas nillasaykichistaqmi piqpa kamachisqanchus kaykunata ruwashani chayta. 25 ¿Pin Juanta kachamurqan bautizananpaq? ¿Dioschu* icha runakunachu?”, nispa. Jinan paykunapura ninakurqanku: “Diosmi nisunchis chayqa, ¿imaraykun mana creerqankichischu?,+ niwasunchá riki. 26 Runakunan nisunchis chaypas, llaqtachá imanawasunmanraq, lliumi Juantaqa profetapaq jap’inku”, nispa. 27 Chaymi Jesusta nirqanku: “Manan yachaykuchu”, nispa. Jesustaq paykunata nirqan: “Chhaynaqa manan noqapas nisaykichischu piqpa kamachisqanchus kaykunata ruwani chayta.

28 ”¿Imaniwaqchistaq? Juj runaqmi karqan iskay wawankuna. Kuraq kaqman asuykuspan nirqan: Wawáy, kunan p’unchay uvas chajrapi llank’amuy, nispa. 29 Jinan payqa nirqan: Manan riymanchu, nispa, chay nisqanmanta pesapakuspan ichaqa rirqan. 30 Sullk’a kaqman asuykuspan kaqta nillarqantaq. Paytaq nirqan: Risaqmi papáy, nispa, ichaqa manan rirqanchu. 31 ¿Iskayninkumanta mayqen kaqmi taytanpa munayninta ruwarqan?”, nispa. Paykunataq nirqanku: “Kuraq kaqmi”, nispa. Jinan Jesusqa nirqan: “Cheqaqtan niykichis: Impuesto cobraqkunapas ramera warmikunapas qankunaq ñaupaykichistaraqmi Diospa gobiernonman rishanku. 32 Juanmi qankunaman jamurqan allin kaq ñanta yachachispa, qankunataq mana creerqankichischu. Aswanpas impuesto cobraqkunan, ramera warmikunan creerqanku,+ qankunataq chayta rikushaspapas mana pesapakurqankichischu nitaq creerqankichischu.

33 ”Juj rijch’anachiytawan* willasaykichis: Juj runan chajranpi uvasta plantarqan,+ jinaspa llapa muyuriqta cercarqan, chaypin uvas sarunata t’oqorqan juj torretapas perqarqan,+ jinaspa llank’aqkunaman arrendopi qospa karu llaqtaman ripurqan.+ 34 Cosecha tiempo chayamuqtintaq kamachinkunata uvas chajrapi llank’aqkunaman kacharqan, chhaynapi chajraq rurusqanmanta payman tupaqta juñumunankupaq. 35 Llank’aqkunan ichaqa chay kamachikunata jap’ispa jujninta maqaykurqanku, jujnintataq wañuchipurqanku, jujnintañataq rumiwan ch’aqespa wañuchipurqanku.+ 36 Wajmantan juj kamachikunata kachallarqantaq ñaupaq riqkunamanta aswan askhata, paykunatapas kaqtan ruwallarqankutaq.+ 37 Qhepatañataq churinta kacharqan, churiytaqa respetanqakuchá, nispa. 38 Llank’aqkunataq churita rikuruspa ninakurqanku: Kaymi herencia chaskiqqa.+ ¡Jaku wañuchimusun, chhaynapi herencianta jap’ikapunanchispaq!, nispa. 39 Chaymi paykunaqa uvas chajramanta jawaman aysamuspa wañuchipurqanku.+ 40 Chhaynaqa, uvas chajrayoq jamuspa, ¿imatan chay llank’aqkunata ruwanqa?”, nispa. 41 Jinan umalliqkunapas umalli sacerdotekunapas nirqanku: “Millay kasqankuraykun paykunata wañuchinqa, chajrantataq arrendanqa chajraq rurusqanta tiempollanpi qoq llank’aqkunaman”, nispa.

42 Jesustaq paykunata nirqan: “Diospa simin qelqan nin: Perqaqkunaq wijch’usqan rumin esquina jap’iq jatun kaq rumi kapun.+ Chayqa Jehová* Diosmantan jamun, ancha munaytaqmi noqanchispaqqa, nispa. ¿Manachu chayta leerqankichis?+ 43 Chaymi niykichis: Diosmi qankunamanta gobiernonta qechusunkichis, jinaspa munayninta ruwaq nacionman qopunqa. 44 Pipas chay rumiman urmaqqa ñut’usqan kanqa,+ pimanchus chay rumi urmanqa chaytaq saqtasqa kanqa”,+ nispa.

45 Chaykuna willasqanta uyarispan umalli sacerdotekunapas fariseokunapas repararqanku paykunamanta rimashasqanta.+ 46 Chaymi jap’iyta munarqanku, ichaqa runakunatan manchakurqanku Jesusta profetapaq jap’isqankurayku.+