Marcos
7 Jerusalén llaqtamantan jamurqanku fariseokuna kamachikuy simita wakin yachachiqkunapiwan, jinaspa Jesusman juñukamurqanku.+ 2 Paykunan Jesuspa wakin discipulonkunata rikurqanku mana ch’uyanchasqa makinkuwan mijushaqta, mana maqchisqa makiwan* mijushaqta. 3 (Fariseokunapas llapa judiokunapas kukuchunkukama* makinkuta maqchikuspallan mijunku, chhaynapin ñaupa runakunaq costumbrenman k’askakunku, 4 mercadomanta kutimuspapas manan mijunkuchu manachus maqchikunku chayqa; chaymantapas askha costumbrekunatawanmi chaskirqanku, chaykunamanmi paykunaqa k’askakunku, chaymi copakunata, p’uyñukunata, cobremanta serviciokunatapas unuman challpunku).+ 5 Chayraykun fariseokunapas kamachikuy simita yachachiqkunapas Jesusta tapurqanku: “¿Imanaqtinmi discipuloykikuna mana ñaupa runakunaq costumbrenman jinachu ruwanku, aswanpas mana ch’uyanchasqa makintin mijunku?”,+ nispa. 6 Jinan Jesusqa paykunata nirqan: “Iskay uyakuna, sut’illantan profeta Isaiasqa qankunamanta qelqarqan: Kay runakunaqa simillankuwanmi jatunchawanku, sonqonkun ichaqa noqamanta karupi kashan.+ 7 Yanqapaqmi adorashawanku, paykunaqa runakunaq kamachikusqallantan yachachinku,+ nispa. 8 Qankunaqa Diospa kamachikuyninta saqerparispan runakunaq costumbrenman k’askakunkichis”,+ nispa.
9 Jesusqa nillarqantaqmi: “Qankunaqa costumbreykichisman jina ruwanaykichisraykun mana reparachikuq jinalla Diospa kamachikuyninkunata saqerparinkichis.+ 10 Moisesmi nirqan: Tayta-mamaykitan sumaqta qhawarinki,+ nispa. Nillarqantaqmi: Pipas taytanmantapas mamanmantapas millayta rimaqqa* wañuchisqa kachun,+ nispa. 11 Qankunan ichaqa ninkichis: Pipas taytantapas mamantapas nillanmanmi: Qanta yanapanaypaq imapas qonay kaqqa corbanmi, nispa (corbanqa “Diospaq ofrenda” ninantan nin). 12 Chhaynapin qankunaqa manaña imapipas taytantapas mamantapas yanapachinkichisñachu.+ 13 Chhaynapitaq yachachisqaykichis costumbrekunarayku Diospa siminta mana valeqman tukuchipunkichis.+ Maychá chhaynakuna ruwasqaykichisqa kashanpas”,+ nispa. 14 Wajmanta runakunata wajaspataq nirqan: “Llapallaykichis, uyariwaychis, jinaspa entiendeychis.+ 15 Runataqa manan siminman imapas jaykuqchu qhellichan, aswanpas siminmanta lloqsimuqmi qhellichan”,+ nispa. 16 *——
17 Runakunata saqespa juj wasiman jaykuqtintaq discipulonkunaqa chay willasqanmanta tapuyta qallarirqanku.+ 18 Jinan Jesusqa paykunata nirqan: “¿Paykuna jinachu qankunapas mana entiendenkichis? ¿Manachu reparankichis tukuy imapas simiman jaykuqqa runata mana qhellichasqanta? 19 Simiman imapas jaykuqqa manan sonqomanchu jaykun, aswanmi wijsaman, jinaspa jisp’akunapi jisp’asqa kapun”, nispa. Chhaynapin rikuchirqan llapa mijuykuna ch’uya kasqanta. 20 Jesusqa nillarqantaqmi: “Imachus sonqonmanta lloqsimun chaymi runataqa qhellichan.+ 21 Runaq sonqonmantan+ lloqsimun sinchi millay piensaykuna: qhelli jucha* ruwaykuna, suwakuykuna, runa wañuchiykuna, 22 jujwan pantaykuna, sinchi munapayaykuna, millay ruwaykuna, engañaykuna, mana p’enqarikuspa juchallikuykuna,* envidiakuykuna, pisichaspa k’amiykuna, uma oqariykuna, mana yuyaywan ruwaykuna ima. 23 Llapan chay millay kaqkunan sonqomanta lloqsimuspa runataqa qhellichan”, nispa.
24 Chaymanta jatarispataq Jesusqa Tiro llaqta, Sidón llaqta ladokunaman rirqan.+ Chayman chayasqanta mana pipas yachananta munaspan juj wasiman jaykurqan, chaywanpas runakunaqa yacharurqankun. 25 Paymanta uyarispa jinan juj warmi jamurqan, jinaspa ñaupanpi pampakama k’umuykurqan.+ Paypa ususichanmanmi millay espíritu junt’aykusqa. 26 Chay warmiqa griego runakunaq mirayninmi kasqa, ichaqa Siria provinciapi kaq Fenicia llaqtapin tiyasqa.* Paymi askha kutita Jesusta rogakurqan ususinmanta supayta qarqonanpaq. 27 Jesusmi ichaqa payta nirqan: “Ñaupaqtaqa wawakunaraq sajsachunku, manan allinchu wawakunaq t’antanta uña alqochakunaman qoyqa”,+ nispa. 28 Paytaq nirqan: “Arí, wiraqocha, ichaqa uña alqochakunapas wawakunaq mesa ukhuman usuchisqan t’antataqa mijunkun”, nispa. 29 Jinaqtinmi Jesusqa payta nirqan: “Sumaqlla wasiykiman kutipuy, chayta nisqaykiraykun supayqa ususiykimanta lloqsipunña”,+ nispa. 30 Jinan chay warmiqa wasinman kutipurqan, chayaspataq erqechata puñunapi tarirqan, supayqa ñan paymanta lloqsipusqaña.+
31 Tiro ladomanta kutimuspataq Jesusqa Sidón jallp’anta Decápolis* jallp’anta rispa inti lloqsimuy ladonta Galilea qochaman chayarqan.+ 32 Chaypin* payman pusamurqanku sasachakuspa rimaq roqt’u runata,+ jinaspa rogakurqanku payman makinta churaykunanpaq. 33 Jinan Jesusqa runakunaq qayllanmanta sapaqllaman pusaspa dedonkunata ninrinman winaykurqan, chaymantataq dedonman thoqaykuspa chay runaq qallunta tupaykurqan.+ 34 Cielota qhawarispataq ukhumanta samarispa nirqan: “Efata”, nispa. Chayqa “kicharikuy” ninantan nin. 35 Jinan chay runaq ninrinqa kicharikurqan,+ qallunpas paskarikurqan, allintataqmi rimaytapas qallarirqan. 36 Jesustaq runakunata kamachirqan ama pimanpas chayta willanankupaq,+ paykunataq ichaqa chhaynata kamachishaqtinpas astawanraq willarqanku.+ 37 Paykunaqa ancha admirasqan+ nirqanku: “Tukuy imatapas allintapunin ruwan. Roqt’ukunatapas uyarichinmi, mana rimay atiqkunatapas rimarichinmi”,+ nispa.