Mateo
7 ”Amaña pitapas juchachaychischu,+ chhaynapi mana juchachasqa kanaykichispaq, 2 imaynatachus juchachasqaykichisman jinan qankunapas juchachasqa kallankichistaq,+ imaynatachus jujkunata ruwankichis chhaynallataqmi qankunapas ruwasqa kankichis.+ 3 Chhaynaqa, ¿imaraykun wayqeykiq ñawinpi kaq ichhuta qhawanki, manataq reparakunkichu ñawiykipi kaq rakhu k’aspitaqa?+ 4 ¿Imaynapin wayqeykita niwaq: Ñawiykipi kaq ichhuta orqorusayki, nispa, ñawiykipi juj rakhu k’aspi kashaqtin? 5 ¡Iskay uya! Ñaupaqtaqa ñawiykimantaraq chay rakhu k’aspita orqokuy, chayraqmi allinta rikunki wayqeykiq ñawinpi kaq ichhuta orqonaykipaq.
6 ”Aman Diospa kaqninkunataqa alqokunaman qonkichischu, amallataq perlaykichiskunatapas* khuchikunaman wijch’unkichischu,+ paqtan sarunchankuman, kutirimuspataq llik’irparisunkichisman.
7 ”Mañakushallaychis, chaskinkichismi;+ maskhashallaychis, tarinkichismi; punkutapas takashallaychis, kicharimusunkichismi.+ 8 Pipas mañakuqqa chaskinmi,+ pipas maskhaqqa tarinmi, pipas takaqmanqa punkupas kichasqan kanqa. 9 ¿Mayqenniykichistaq wawaykichis t’antata mañakushaqtin rumita qowaqchis? 10 ¿Challwata mañakuqtinpas mach’aqwaytachu qowaqchis? 11 Qankunaqa millay runaña kashaspapas yachankichismi wawaykichiskunaman allin regalokuna qoytaqa ¿riki? ¿Chaychu janaq pachapi kaq Taytaykichisqa mañakuqninkunaman allin kaqkunata mana qonman?+
12 ”Chhaynaqa, imatachus runakuna ruwapunasuykichista munankichis, chhaynallatataq qankunapas paykunapaq ruwaychis;+ chhaynatan nin kamachikuy simipas profetakunaq qelqasqanpas.+
13 ”K’illku* punkunta jaykuychis,+ ama jatun punkuntaqa; chayninta jaykuq anchollaña jatun ñanqa wañuymanmi apan, askhataqmi chaynintaqa rishanku; 14 k’illku punkunta jaykuq ñañu ñanmi ichaqa kausayman apan, pisillataqmi chaytaqa tarinku.+
15 ”Allinta waqaychakuychis falso profetakunamanta,+ paykunaqa ovejaman tukuspan qankunaman jamusunkichis,+ ukhunkupin ichaqa sinchi yarqasqa lobokuna* kanku.+ 16 Paykunataqa imachus ruwasqankupin* reqsinkichis. ¿Pallakunmanchu uvasta kiskakunamanta, higostapas qorakunamanta? Manan ¿riki?+ 17 Allin sach’aqa allin rurutan rurun, mana allin sach’an ichaqa mana allin ruruta rurun.+ 18 Allin sach’aqa manan mana allin rurutaqa rurunmanchu, nitaqmi mana allin sach’apas allin rurutaqa rurunmanchu.+ 19 Allin ruruta mana ruruq sach’aqa wit’usqa kaspan ninaman wijch’uykusqa kanqa.+ 20 Chhaynaqa, imachus ruwasqankupin chay runakunataqa reqsinkichis.+
21 ”Manan llapa, ¡Señor! ¡Señor!, niwaqniychu janaq pacha gobiernomanqa jaykunqa, aswanpas janaq pachapi kaq Taytaypa munayninta ruwaqllan.+ 22 Chay p’unchaypiqa askhan niwanqaku: Señor, Señor,+ ¿manachu sutiykipi rimarqayku, sutiykipi supaykunata qarqorqayku, sutiykipi askha milagrokunatapas* ruwarqayku?,+ nispa. 23 Jinan paykunata nisaq: ¡Manapunin reqsiykichischu! ¡Ripuychis qayllaymanta, mana allin kaqta ruwaqkuna!,+ nispa.
24 ”Pipas kay nisqaykunata uyarispa junt’aqqa qaqa patapi wasinta ruwaq allin yuyayniyoq runa jinan.+ 25 Sinchita paramuqtinmi unu yapakurqan, jinaspa chay wasiman jaykurqan, wayrapas sinchita wayramuspa wasiman waqtakurqan, chay wasin ichaqa mana thunikurqanchu qaqa patapi ruwasqa kasqanrayku. 26 Pipas kay nisqaykunata uyarispa mana junt’aqmi ichaqa, aqo patapi wasinta ruwaq mana yuyayniyoq runa jina.+ 27 Sinchita paramuqtinmi unu yapakurqan, jinaspa chay wasiman jaykurqan, wayrapas sinchita wayramuspa wasiman waqtakurqan,+ chay wasitaq urmaspa manchayta thunikapurqan”, nispa.
28 Chaykunata Jesús rimayta tukuqtintaq runakunaqa anchatapuni admirakurqanku imayna yachachisqanmanta.+ 29 Payqa Diospa nisqanman jinapunin yachachiq,*+ manan kamachikuy simita yachachiqkuna jinachu.